ខេត្តព្រះវិហារ ៖ អគារស្នាក់ការគណបក្សប្រជាជនស្រុកសង្គមថ្មីមួយខ្នងសង់អំពីថ្ម ប្រក់ក្បឿង ដែលទើបនឹងសាងសង់រួច ត្រូវបានសម្ពោធដាក់ឱ្យប្រើប្រាស់ជាផ្លូវការកាលពីព្រឹកថ្ងៃ ១ សីហា ក្រោមអធិបតីភាពលោកនាយឧត្តមសេនីយ៍ មាស សុភា សមាជិកអចិន្ត្រៃយ៍នៃគណៈកម្មាធិការកណ្តាលគណ
ខេត្តព្រះវិហារ ៖ អគារស្នាក់ការគណបក្សប្រជាជនស្រុកសង្គមថ្មីមួយខ្នងសង់អំពីថ្មប្រក់ក្បឿង ដែលទើបនឹងសាងសង់រួច ត្រូវបានសម្ពោធដាក់ឱ្យប្រើប្រាស់ជាផ្លូវការកាលពីព្រឹកថ្ងៃ១ សីហា ក្រោមអធិបតីភាពលោកនាយឧត្តមសេនីយ៍ មាស សុភា សមាជិកអចិន្ត្រៃយ៍នៃគណៈកម្មាធិការកណ្តាលគណបក្សប្រជាជនកម្ពុជា និងជាប្រធានក្រុមការងារថ្នាក់កណ្តាលចុះជួយខេត្តព្រះវិហារ។ ចូលរួមក្នុងពិធីនោះមានលោកអ៊ុំ ម៉ារ៉ា អភិបាលខេត្ត និងជាប្រធានគណៈកម្មាធិការគណបក្សប្រជាជនខេត្ត ក្រុមប្រឹក្សាខេត្ត អភិបាលរងខេត្ត អភិបាល-អភិបាលរងស្រុក ក្រុមប្រឹក្សាស្រុកសង្គមថ្មី ព្រមទាំងសមាជិក សមាជិកាគណបក្សប្រជាជននៅទូទាំងស្រុកសង្គមថ្មី សរុបប្រមាណ១.១០០នាក់។
លោកឡុង សុវណ្ណ ប្រធានក្រុមប្រឹក្សាខេត្ត និងជាប្រធានក្រុមការងារគណបក្សប្រជាជនខេត្ត ចុះជួយស្រុកសង្គមថ្មី បានឱ្យដឹងថា ក្រុមការងារគណបក្សប្រជាជនខេត្តចុះជួយស្រុក បានសាងសង់អគារស្នាក់ការបក្សឃុំចំរើន ឃុំស្តៅ និងឃុំរអាង អំពីឈើប្រក់ហ្វ៊ីប្រូសីុម៉ង់ត៍ និងពីក្រោមមានចាក់សាប ដែលអគារទាំងនេះ បានសាងសង់ឡើងកាលពីខែកញ្ញា ឆ្នាំ២០១០ និងរួចរាល់ជាស្ថាពរក្នុងខែមករា ឆ្នាំ២០១១ ដោយទទួលការឧបត្ថម្ភទឹកប្រាក់ពីលោកនាយឧត្តមសេនីយ៍ មាស សុភា សរុបអស់ចំនួនជាង១ម៉ឺនដុល្លារ ។ ជាមួយនេះបានសាងសង់ស្នាក់ការគណបក្សឃុំចំនួនពីរទៀតក្នុងនោះមានឃុំរណសិរ្ស និងឃុំត្បែង១ ដែលទទួលការសាងសង់ដោយគណបក្សថ្នាក់ខេត្ត ស្រុក និងឃុំចំណាយថិវកាសរុបជិត៤០លានរៀល បានមកពីការជួយឧបត្ថម្ភពីថ្នាក់ដឹកនាំខេត្ត បណ្តាអង្គភាពខេត្ត និងសប្បុរសជននានា ។
លោកឡុង សុវណ្ណ បន្តថា ចំណែកស្នាក់ការគណបក្សស្រុកមួយខ្នងដែលសម្ពោធដាក់ឱ្យប្រើប្រាស់នាពេលនេះ ស្ថិតនៅទីប្រជុំជនស្រុក ក្នុងភូមិត្បែង ឃុំចំរើន នៅលើផ្ទៃដីប្រមាណ៩.១០០ម៉ែត្រក្រឡា ។ អគារស្នាក់ការគណបក្សស្រុកថ្មី១ខ្នងនេះ សង់អំពីថ្មប្រក់ក្បឿង ចាប់សាងសង់ពីថ្ងៃទី២០ កញ្ញា ឆ្នាំ២០១០ និងរួចរាល់ជាស្ថាពរនៅថ្ងៃទី៤ ឧសភា ឆ្នាំ២០១១ ។ អគារថ្មី១ខ្នងនេះ មានការឧបត្ថម្ភពីលោកអ៊ុំ ម៉ារ៉ា ចំនួន២ម៉ឺនដុល្លារអាមេរិក និងមានការចូលរួមឧបត្ថម្ភបន្ថែមពីសប្បុរសជនជាសមាជិក-សមាជិកាគណបក្សប្រជាជនពីគ្រប់ទិសទីមួយចំនួនទៀត។
លោកអ៊ុំ ម៉ារ៉ា អភិបាលខេត្ត និងជាប្រធានគណៈកម្មាធិការគណបក្សប្រជាជនខេត្ត បានថ្លែងកោតសរសើរការខិតខំប្រឹងប្រែងរបស់ក្រុមការងារថ្នាក់កណ្តាលចុះជួយស្រុកសង្គមថ្មី ដោយលោកបានបញ្ជាក់ថា កន្លងទៅការខិតខំប្រឹងប្រែងទាំងអស់របស់ក្រុមការងារថ្នាក់កណ្តាលចុះជួយខេត្ត និងកិច្ចសហការផ្ទៃក្នុងគណបក្សបានល្អ ធ្វើឱ្យសកម្មភាពទាំងនោះលេចចេញជាផ្លែផ្កា ហើយប្រជាពលរដ្ឋបង្កើនការជឿជាក់និងទុកចិត្តទៅលើគោលនយោបាយដឹកនាំដ៏ត្រឹមត្រូវរបស់គណបក្សប្រជាជនកម្ពុជា ដែលមានសម្តេចអគ្គមហាទាំងបីជាអ្នកដឹកនាំ ។
លោកមាស សុភា ប្រធានក្រុមការងារថ្នាក់កណ្តាលចុះជួយខេត្តព្រះវិហារ បានមានមតិសំណេះសំណាលដោយពាំនាំនូវប្រសាសន៍ផ្តាំផ្ញើសាកសួរសុខទុក្ខពីសំណាក់សម្តេចអគ្គមហាធម្មពោធិសាល ជា ស៊ីម ប្រធានគណបក្សប្រជាជនកម្ពុជា សម្តេចអគ្គមហាសេនាបតីតេជោ ហ៊ុន សែន អនុប្រធានគណបក្សប្រជាជនកម្ពុជា និងសម្តេចអគ្គមហាពញាចក្រី ហេង សំរិន ប្រធានកិតិ្តយសគណបក្សប្រជាជនកម្ពុជា ដែលគ្រប់ពេលវេលាសម្តេចទាំងបី មានការនឹករលឹកដល់ប្រជាពលរដ្ឋ និងតែងតែយកចិត្តទុកដាក់គិតគូរពីជីវភាពរស់នៅរបស់ប្រជាពលរដ្ឋនៅទូទាំងប្រទេស។
ក្នុងពិធីនាព្រឹកនោះ ក៏មានការប្រកាសបញ្ចូលសមាជិក-សមាជិកាគណបក្សប្រជាជនថ្មីដែលជាយុវជនចំនួន១៩៧នាក់ ក្នុងនោះស្រី៨៨នាក់ផងដែរ ។ បន្ទាប់មកក៏មានការបំពាក់មេដាយដល់សប្បុរសជនជាសមាជិក-សមាជិកាគណបក្សប្រជាជន ដែលបានបរិច្ចាគធនធានក្នុងការជួយកសាងស្នាក់ការគណបក្ស និងអ្នកដែលមានស្នាដៃល្អក្នុងការដឹកនាំ ចំនួន៤៧នាក់ ។ ចំណែកសមាជិក សមាជិកាដែលបានចូលរួមប្រមាណ១.១០០នាក់ ទទួលបានអំណោយដ៏ថ្លៃថ្លាពីសម្តេចតេជោ ហ៊ុន សែន និងលោកជំទាវកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ក្នុងម្នាក់ៗសារុង១៕
ចែករំលែកព័តមាននេះ