ខេត្តកណ្តាល ៖ សមត្ថកិច្ចកងរាជអាវុធ ហត្ថស្រុកខ្សាច់កណ្តាល សហការជាមួយកម្លាំង មន្ទីរស្រាវជ្រាវកងរាជអាវុធហត្ថខេត្ត បានធ្វើការបង្ក្រាបមុខ សញ្ញាចោរប្លន់ឆ្លងខេត្តមួយក្រុម ដែលបានរៀបគម្រោងធ្វើសកម្មភាពនៅចំណុចភូមិតាំងឫស្សី ឃុំរកាជន្លឹង កាលពីយប់ថ្ងៃទី២៩ កក្កដា ដោយឃាត់
ខេត្តកណ្តាល ៖ សមត្ថកិច្ចកងរាជអាវុធ ហត្ថស្រុកខ្សាច់កណ្តាល សហការជាមួយកម្លាំង មន្ទីរស្រាវជ្រាវកងរាជអាវុធហត្ថខេត្ត បានធ្វើការបង្ក្រាបមុខ សញ្ញាចោរប្លន់ឆ្លងខេត្តមួយក្រុម ដែលបានរៀបគម្រោងធ្វើសកម្មភាពនៅចំណុចភូមិតាំងឫស្សី ឃុំរកាជន្លឹង កាលពីយប់ថ្ងៃទី២៩ កក្កដា ដោយឃាត់ ខ្លួនបានជនសង្ស័យម្នាក់ និងរឹបអូសបានម៉ូតូ៤គ្រឿង។
លោកអនុសេនីយ៍ឯកស្វាយ សុខា ប្រធានស្តីទីនៃមន្ទីរស្រាវជ្រាវនិងយុត្តិធម៌កងរាជអាវុធហត្ថខេត្តបានឱ្យដឹងថា ប្រតិបត្តិការបង្ក្រាបមុខសញ្ញាចោរប្លន់ដ៏សកម្មនៅតាមបណ្តាខេត្ត និងរាជធានីបានដោយជោគជ័យនេះគឺដោយមានការបញ្ជាណែនាំពីលោកមេបញ្ជាការកងរាជអាវុធហត្ថលើផ្ទៃប្រទេស លោកអភិបាលខេត្ត និងមានការចង្អុលបង្ហាញពីលោកឧត្តមសេនីយ៍ត្រី មាស សុវណ្ណ មេបញ្ជាការកងរាជអាវុធហត្ថខេត្ត ឱ្យកម្លាំងមន្ទីរស្រាវជ្រាវនិងយុត្តិធម៌កងរាជអាវុធហត្ថខេត្តសហការជាមួយស្រុកខ្សាច់កណ្តាល ធ្វើការស្រាវជ្រាវបង្ក្រាបទល្មើសប្លន់ប្រដាប់អាវុធឱ្យខាងតែបាន។
លោកអនុសេនីយ៍ឯកស្វាយ សុខា បន្តថា មុខសញ្ញាចោរប្លន់ដ៏សកម្មដែលត្រូវកម្លាំងកងរាជអាវុធហត្ថឃាត់ខ្លួននោះឈ្មោះលី សារី ភេទប្រុស អាយុ២៨ឆ្នាំ មុខរបរមិនពិតប្រាកដ មានទីលំនៅក្នុងភូមិ«ឃ» សង្កាត់ច្រាំងចំរេះ២ ខណ្ឌឫស្សីកែវ រាជធានីភ្នំពេញ។ វត្ថុតាងដែលរឹបអូសបានពីមុខសញ្ញាប្លន់នោះគឺមានម៉ូតូស៊េរីទំនើប៤គ្រឿង ក្នុងនោះមាន ម៉ូតូC125 ស៊េរីឆ្នាំ២០១១ ចំនួន៣គ្រឿង និងម៉ូតូវីវ៉ា ស៊េរីឆ្នាំ២០០៨ មួយគ្រឿង បង់កាំភ្លើងដែលមានគ្រាប់អាកាចំនួន៣០គ្រាប់ ខ្សែអង្រឹង១១ខ្សែ ខ្សែភ្លើង១ខ្សែ ខ្សែជ័រ១ខ្សែ និងម៉ាស់បិទមុខចំនួន៧ ។
លោកអនុសេនីយ៍ឯកបានបញ្ជាក់ឱ្យដឹងទៀតថា មុខសញ្ញាជនសង្ស័យដែលត្រូវបានឃាត់ខ្លួននិងវត្ថុតាងដែលបានរឹបអូសនោះគឺបន្ទាប់ពីកម្លាំងកងរាជអាវុធហត្ថស្រុកខ្សាច់កណ្តាលនិងកម្លាំងនៃមន្ទីរស្រាវជ្រាវនិងយុត្តិធម៌ខេត្តបានបើកប្រតិបត្តិការបង្រ្កាបមុខសញ្ញាប្លន់ប្រដាប់ដោយកាំភ្លើងអាកាដែលកំពុងចេញដំណើរពីរាជធានីភ្នំពេញទៅធ្វើសកម្មភាពនៅចំណុចស្ពានព្រះគន្លង ក្នុងភូមិសាស្រ្តឃុំរកាជន្លឹង ស្រុកខ្សាច់កណ្តាល នាយប់ថ្ងៃទី២៩ កក្កដា ឆ្នាំ២០១១។ លោកបន្តថា ក្រុមចោរប្លន់មានគ្នា៨នាក់ ក្នុងនោះមានស្រី២នាក់ មធ្យោបាយធ្វើដំណើរម៉ូតូ៤គ្រឿង និងកាំភ្លើងអាកាស្វាយបត់ចំនួន៣ដើមដែលក្រុមជនសង្ស័យបានដាក់នៅក្នុងការុង ពណ៌ស។ ខណៈកម្លាំងសមត្ថកិច្ចកងរាជអាវុធហត្ថឡោមព័ទ្ធមុខសញ្ញាប្លន់ប្រដាប់អាវុធនោះ ក្រុមជនសង្ស័យធ្វើការបាញ់ប្រហារមកលើកម្លាំងសមត្ថកិច្ច ហើយកម្លាំងសមត្ថកិច្ចក៏បានបាញ់តបតវិញធ្វើឱ្យក្រុមជនសង្ស័យបានបំបែកគ្នាគេចខ្លួនដោយបន្សល់ទុកម៉ូតូចំនួន៤គ្រឿង និងបង់កាំភ្លើងអាកាមានគ្រាប់ចំនួន៣០គ្រាប់នៅនឹងកន្លែងកើតហេតុ។ ចំណែកឯជនសង្ស័យម្នាក់ឈ្មោះលី សារី ដែលបានរត់គេចខ្លួនទៅពួនក្នុងគុម្ពោតព្រៃជិតផ្លូវជាតិលេខ៨A បានត្រូវកម្លាំងកងរាជអាវុធហត្ថឃាត់ខ្លួនបានក្នុងយប់នោះ។
បើតាមចម្លើយសារភាពរបស់ជនឈ្មោះលី សារី បានឱ្យដឹងថា រូបគេចូលរួមធ្វើសកម្មភាពប្លន់ប្រដាប់អាវុធជាមួយបក្សពួកគេ៧នាក់នោះ គឺបានចំនួនតែ៤លើកប៉ុណ្ណោះ ដោយបានសម្រេចមួយលើក។ ចំណែកឯបក្សពួករបស់គេដែលមិនត្រូវបានសមត្ថកិច្ចឃាត់ខ្លួននោះ បានធ្វើសកម្មភាពជាង១០លើកមកហើយ គឺនៅទឹកដីខេត្តកំពត តាកែវ កណ្តាល រាជធានីភ្នំពេញ ព្រៃវែង និងខេត្តរតនគីរី។ ជននេះបានសារភាពទៀតថា រូបគេនិងបក្សពួកដែលត្រូវសមត្ថកិច្ចបង្ក្រាបបានមុននេះ គឺនៅថ្ងៃទី២៣-២៦-២៧ ខែកក្កដា ឆ្នាំ២០១១ ក្រុមគេបានចេញដំណើរពីផ្ទះជួលនៅសង្កាត់ទួលសង្កែ ខណ្ឌឫស្សីកែវ ដោយមានកាំភ្លើងអាកាចំនួន៣ដើម មកប៉ុនប៉ងប្លន់ស្ថានីយប្រេងឥន្ធនៈតេលា នៅក្រុងតាខ្មៅ ហួសបន្ទាយទួលក្រសាំង ជាងមួយគីឡូម៉ែត្រ ប៉ុន្តែសកម្មភាពទាំង៣លើកនេះមិនបានសម្រេចទេ ព្រោះចូលជិតដល់ស្ថានីយប្រេងសុទ្ធតែត្រូវបានម្ចាស់ភ្ញាក់ទាន់។ ដោយឡែកនៅថ្ងៃទី២៥ ខែកក្កដា ឆ្នាំ២០១១ ក្រុមរបស់គេបានធ្វើសកម្មភាពប្លន់លំនៅឋានប្រជាពលរដ្ឋនៅម្តុំផ្លូវជាតិលេខ៣បានសម្រេចនិងចែកលុយគ្នាបានម្នាក់ចំនួន២០០ដុល្លារ ។
ជនឈ្មោះលី សារី បានសារភាពទៀតថា នៅយប់ថ្ងៃទី២៩ ខែកក្កដា ឆ្នាំ២០១១ រូបគេនិងបក្សពួក៧នាក់ប្រដាប់ដោយកាំភ្លើងអាកាចំនួន៣ដើមនិងជិះម៉ូតូចំនួន៤គ្រឿងបានចាកចេញពីផ្ទះជួលនៅម្តុំទួលសង្កែក្នុងគោលបំណងទៅប្លន់ផ្ទះប្រជាពលរដ្ឋនៅម្តុំវិហារសួគ៌ ស្រុកខ្សាច់កណ្តាល និងនៅម្តុំអ្នកលឿង ខេត្តព្រៃវែង។ ប៉ុន្តែខណៈពួកគេកំពុងតែជួបជុំចាំគ្នីគ្នានៅមុខសាលាឆទាន ផ្លូវជាតិលេខ៨A ក្នុងភូមិតាំងឫស្សី ឃុំរកាជន្លឹង ស្រុកខ្សាច់កណ្តាលដើម្បីដាក់ទិសដៅធ្វើសកម្មភាព ក៏ត្រូវកម្លាំងសមត្ថកិច្ចបង្ក្រាបតែម្តង។
លោកអនុសេនីយ៍ឯកស្វាយ សុខា បានបញ្ជាក់ថា បើតាមចម្លើយសារភាពរបស់ជនសង្ស័យខាងលើគឺថា កាលពីថ្ងៃទី១៩ ខែមិថុនា ឆ្នាំ២០១១ កន្លងទៅនេះ ពួកគេ (ក្រុមជនសង្ស័យ)បានធ្វើសកម្មភាពប្លន់ផ្ទះប្រជាពលរដ្ឋនៅភូមិបឹងទូក ឃុំបឹងទូក ស្រុកទឹកឈូ ខេត្តកំពត ដោយយកបានម៉ូតូ២គ្រឿង និងលុយកាក់មួយចំនួនធំ ហើយម៉ូតូដែលប្លន់បាននេះ គឺពួកគេជិះមកធ្វើសកម្មភាពនៅស្រុកខ្សាច់កណ្តាលក៏ត្រូវកងរាជអាវុធហត្ថបង្ក្រាបបាន។ ម៉ូតូ២គ្រឿងនេះគឺធុនC125 ស៊េរីឆ្នាំ២០១១ ចំនួនមួយគ្រឿង និងវីវ៉ា ស៊េរីឆ្នាំ២០០៨មួយគ្រឿងបានត្រូវប្រគល់ទៅឱ្យម្ចាស់ដើមវិញ ៕
ចែករំលែកព័តមាននេះ