បុណ្យចូលឆ្នាំ! ភ្ញៀវទេសចរសម្រុកមកលេងខេត្តប៉ៃលិនយ៉ាងកកកុញ ខណៈផ្ទះសំណាក់ និងសណ្ឋាគារ គ្មានបន្ទប់ទំនេរ
- ប៉ៃលិន
ខេត្តប៉ៃលិន ៖ រហូតមកដល់«ថ្ងៃវារៈឡើងស័ក» ថ្ងៃព្រហស្បតិ៍ ១៤រោច ខែចេត្រ ឆ្នាំមមី អដ្ឋស័ក ព.ស ២៥៦៩…
ខេត្តប៉ៃលិន ៖ រហូតមកដល់«ថ្ងៃវារៈឡើងស័ក» ថ្ងៃព្រហស្បតិ៍ ១៤រោច ខែចេត្រ ឆ្នាំមមី អដ្ឋស័ក ព.ស ២៥៦៩ ត្រូវនឹងថ្ងៃទី១៦ ខែមេសា ឆ្នាំ២០២៦ តាំងពីព្រឹកព្រលឹមរហូតដល់ពេលរសៀល គេសង្កេតឃើញភ្ញៀវទេសចរជាតិ និងអន្តរជាតិ ជាពិសេសមានអ្នកធ្វើដំណើរមកពីខេត្តបន្ទាយមានជ័យ ខេត្តបាត់ដំបង ខេត្តពោធិ៍សាត់ និងបងប្អូនមកពីរាជធានីភ្នំពេញ ចូលមកលេងកម្សាន្តក្នុងខេត្តប៉ៃលិន ស្របពេលដែលលោកជំទាវ អភិបាលខេត្តប៉ៃលិន ដឹកនាំការលេងល្បែងកម្សាន្តនេះផ្ទាល់តែម្តង។
ប្រភពព័ត៌មានពីមន្ត្រីសាលាខេត្តបានឱ្យដឹងថា ៖ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរក្នុងឆ្នាំ២០២៦នេះ ពិតជាមានភ្ញៀវចូលមកលេងកម្សាន្តក្នុងខេត្តប៉ៃលិនច្រើនគួរឱ្យកត់សម្គាល់ ពោលគឺចាប់តាំងពីថ្ងៃដំបូង រហូតមកដល់ថ្ងៃចុងក្រោយនេះ គ្មានថ្ងៃណាមួយថមថយនោះឡើយ គឺកាន់តែច្រើនឡើងៗ ខណៈដែលបន្ទប់ផ្ទះសំណាក់ និងសណ្ឋាគារ រកកន្លែងទំនេរគ្មាននោះឡើយ ហើយថែមទាំងអ្នកខ្លះរកកន្លែងស្នាក់នៅមិនបាន ក៏នាំគ្នាទៅស្នាក់នៅផ្ទះបងប្អូនផងដែរ។
ប្រភពបន្តទៀតថា ភ្ញៀវទេសចរទាំងអស់ដែលចូលមកលេងកម្សាន្តក្នុងខេត្តប៉ៃលិន គឺភាគច្រើនទៅលេងនៅរមណីយដ្ឋានទឹកធ្លាក់អូរតាវ៉ៅ ហៅទឹកធ្លាក់ភ្នំខៀវ ដែលមានចំងាយពីទីរួមខេត្តប្រមាណ៦ទៅ៧គីឡូម៉ែត្រ ដែលមានទឹកធ្លាក់ជាច្រើនជាន់ ពេលភ្ញៀវទេសចរចូលទៅលេងកម្សាន្ត និងចុះហែលងូតទឹកលេងធ្វើឱ្យត្រជាក់កាយសប្បាយចិត្ត បំបាត់នូវទុក្ខកង្វល់ ហើយថែមទាំងជួយបន្ថែមនូវភាពស្រស់បំព្រងដល់អារម្មណ៍ ជាពិសេសផ្តល់នូវក្តីសុខផ្លូវចិត្ត ធ្វើស្មារតីភ្លឺស្វាងថែមទៀត។ មិនត្រឹមតែប៉ុណ្ណោះ ក៏មានរមណីយដ្ឋានតូចៗជាច្រើនទៀត ដូចជា រមណីយដ្ឋានចំការខ្នុរ រមណីយដ្ឋានស្ទឹងត្រជាក់ចិត្ត រមណីយដ្ឋានស្ពានតារាប រមណីយដ្ឋានប្រវត្តិសាស្ត្រភ្នំយ៉ាង ដោយមានរូបសំណាកលោកយាយយ៉ាត សម្រាប់ឱ្យភ្ញៀវចូលទៅបួងសួងសុំនូវសេចក្តីសុខក្នុងក្រុមគ្រួសារ។
ប្រភពពីភ្ញៀវទេសចរម្នាក់ ឈ្មោះ ប៊ុន លី ភេទប្រុស មកពីខេត្តកំពង់ឆ្នាំង បានរៀបរាប់ឱ្យដឹងថា ៖ លោកពិតជាមានការភ្ញាក់ផ្អើលណាស់ ខណៈធ្វើដំណើរជាមួយក្រុមគ្រួសារមកលេងក្នុងខេត្តប៉ៃលិន ដោយឃើញថ្នាក់ដឹកនាំខេត្តត្បូងពេជ្រមួយនេះ មិនចេះប្រកាន់ខ្លួន ចូលរួមលេងកម្សាន្តជាមួយនឹងបងប្អូនប្រជាពលរដ្ឋបង្កភាពសប្បាយរីករាយ ជាពិសេសអាចឱ្យលោកសង្កេតឃើញនូវល្បែងប្រជាប្រិយរបស់ខ្មែរ ការរាំវង្ស រាំក្បាច់ ដែលសុទ្ធតែជារបស់ដូនតាខ្មែរបន្សល់ទុកឱ្យកាលពីសម័យមុន ។
លោកបញ្ជាក់ទៀតថា ឆ្នាំនេះជីវិតរបស់ខ្លួនពិតជាទទួលបាននូវក្តីអំណរ ក្នុងរយៈពេល៣ថ្ងៃ ដែលធ្វើឱ្យលោកជាប់ចិត្តដិតអារម្មណ៍នឹងខេត្តដ៏តូចច្រលឹងមួយនេះ ហើយបើសិនជាមានឱកាសនាឆ្នាំក្រោយៗទៀត លោកនឹងបបួលនាំមិត្តភក្តិបងប្អូន ឱ្យចូលមកលេងកាន់តែច្រើនថែមទៀត ព្រោះខេត្តមួយនេះ ថ្នាក់ដឹកនាំ ពិតជាចូលរួមជាមួយប្រជាពលរដ្ឋយ៉ាងពេញទំហឹង។
សូមបញ្ជាក់ផងដែរថា នៅវេលាម៉ោង ១៤ និង០០នាទីរសៀល ពិធីស្រង់ព្រះពុធបដិមាករ «នៅវត្តរតនសោភ័ណ ហៅវត្តកោងកាង» (ថ្វាយគ្រឿងសក្ការៈបូជា, នមសក្កា សមាទានសិល, ដង្ហែព្រះពុទ្ធបដិមាករ, ព្រះសង្ឃស្រង់ព្រះ ថ្នាក់ដឹកនាំ មន្ត្រីរាជការ ចាស់ព្រឹទ្ធាចារ្យ និងប្រជាពលរដ្ឋស្រង់ព្រះ, ពិធីផ្សឹកភ្នំខ្សាច់ ទាញព្រាត់ )ហើយលោកជំទាវបណ្ឌិត បាន ស្រីមុំ អភិបាលខេត្តប៉ៃលិន ក៏សូមគោរពអញ្ចើញបងប្អូនប្រជាពលរដ្ឋទាំងអស់ និងភ្ញៀវទេសចរ ចូលរួមជួបជុំលេងល្បែងប្រជាប្រិយ៍ និង ប្រារព្ធពិធី តាមសាសនាចូលឆ្នាំប្រពៃណីខ្មែរ ពេលយប់ថ្ងៃចុងបង្ហើយ ដោយនាំគ្នាលេងរាំកំសាន្ត ជាមួយចង្វាក់ប្រពៃណីខ្មែរទាំងអស់គ្នា ដើម្បីរួមគ្នា លើកស្ទួយ បង្ហាញអំពីវប្បធម៍ប្រពៃណីខ្មែរ នាយប់ថ្ងៃចុងក្រោយផងដែរ ៕
ចែករំលែកព័តមាននេះ