ខេត្តបន្ទាយមានជ័យ ៖ ក្នុងឱកាសបុណ្យចូលឆ្នាំថ្មីប្រពៃណីជាតិនាពេលខាងមុខ មន្ទីរពាក់ព័ន្ធត្រូវរៀបចំការសម្តែងសិល្បៈ និងល្បែងប្រជាប្រិយជូនប្រជាពលរដ្ឋកម្សាន្ត តែហាមលេងបាញ់ទឹក និងជះទឹកដាក់គ្នា ។ នេះជាការហាមឃាត់របស់ឯកឧត្តមអភិបាលខេត្ត នៅក្នុងកិច្ចប្រជុំ…
ខេត្តបន្ទាយមានជ័យ ៖ ក្នុងឱកាសបុណ្យចូលឆ្នាំថ្មីប្រពៃណីជាតិនាពេលខាងមុខ មន្ទីរពាក់ព័ន្ធត្រូវរៀបចំការសម្តែងសិល្បៈ និងល្បែងប្រជាប្រិយជូនប្រជាពលរដ្ឋកម្សាន្ត តែហាមលេងបាញ់ទឹក និងជះទឹកដាក់គ្នា ។ នេះជាការហាមឃាត់របស់ឯកឧត្តមអភិបាលខេត្ត នៅក្នុងកិច្ចប្រជុំ កាលពីថ្ងៃទី១៦ ខែមីនា ឆ្នាំ២០២៦កន្លងទៅ នៅសាលប្រជុំសាលាខេត្ត ។
ក្នុងកិច្ចប្រជុំគណៈបញ្ជាការឯកភាពខេត្ត ឯកឧត្តម អ៊ុំ រាត្រី អភិបាលខេត្តបានណែនាំដល់មន្ទីរ អង្គភាពពាក់ព័ន្ធ ក្នុងឱកាសបុណ្យចូលឆ្នាំថ្មីប្រពៃណីជាតិ ក្នុងឆ្នាំ២០២៦ខាងមុខនេះ ត្រូវរៀបចំសម្តែងសិល្បៈ និងល្បែងប្រជាប្រិយជូនប្រជាពលរដ្ឋកម្សាន្តដូចជា ចោលឈូង បោះអង្គញ់ ទាញព្រ័ត្រ ទាត់សី លាក់កន្សែង ដណ្តើមស្លឹកឈើ និងរាំកម្សាន្តតាមប្រពៃណី ។
ឯកឧត្តមបានហាមមិនឱ្យលេងបាញ់ទឹក ឬគប់ទឹកជះទឹកដាក់គ្នា និងយកទឹកពណ៌និងទឹកកខ្វក់ជះដាក់គ្នា ប៉ាតម្សៅ ប៉ាតធ្យូង អ្នកដំណើរ ដែលប្រឈមនឹងគ្រោះថ្នាក់ចរាចរណ៍កើតឡើង ។ ពេលចាកចេញពីលំនៅឋានត្រូវពន្លត់ភ្លើងចង្ក្រាន និងពន្លត់ទៀន ធូប និងបិទបារ៉ែតភ្លើងការពារពីអគ្គិភ័យដែលកើតឡើងជាយថាហេតុ ។
ឯកឧត្តម អ៊ុំ រាត្រី ដាក់វិធានការដល់កម្លាំងសមត្ថកិច្ច ត្រូវចេញល្បាតតាមដងផ្លូវទប់ស្កាត់ការលេងល្បែងគប់ទឹកឬជះទឹក ឬបាញ់ទឹកដាក់គ្នា និងក្រុមបងតូចបងធំធ្វើសកម្មភាពតាមកន្លែងកម្សាន្ត មិនឱ្យកើតមានល្បែងស៊ីសង និងល្បែងភ្នាល់ផ្សេងៗ ៕
ចែករំលែកព័តមាននេះ