រាជធានីភ្នំពេញ ៖ សាលាមធ្យមវិចិត្រសិល្បៈបានប្រកាសបើកបង្រៀងការរាំចង្វាក់ប្រជាប្រិយខ្មែរជូនសាធារណៈជន ដោយមិនយកថវិកា ដើម្បីចូលរួមអបអរពិធីបុណ្យចូលឆ្នាំថ្មីប្រពៃណីខ្មែរដែលនឹងឈានមកដល់ក្នុងពេលឆាប់ៗខាងមុខនេះ ។ យោងតាមការប្រកាសលើបណ្តាញសង្គមពីសំណាក់លោក ម៉ូ ខុន ច័ន្ទសិទ្ធិការ្យ…
រាជធានីភ្នំពេញ ៖ សាលាមធ្យមវិចិត្រសិល្បៈបានប្រកាសបើកបង្រៀងការរាំចង្វាក់ប្រជាប្រិយខ្មែរជូនសាធារណៈជន ដោយមិនយកថវិកា ដើម្បីចូលរួមអបអរពិធីបុណ្យចូលឆ្នាំថ្មីប្រពៃណីខ្មែរដែលនឹងឈានមកដល់ក្នុងពេលឆាប់ៗខាងមុខនេះ ។
យោងតាមការប្រកាសលើបណ្តាញសង្គមពីសំណាក់លោក ម៉ូ ខុន ច័ន្ទសិទ្ធិការ្យ មន្ត្រីទទួលកិច្ចការងារផ្សព្វផ្សាយសាលាមធ្យមវិចិត្រសិល្បៈ បានឲ្យដឹងថា ជម្រាបជូនសាធារណជនជិតឆ្ងាយ យុវជនយុវនារី ជ្រាបថា ដើម្បីចូលរួមអបអរពិធីបុណ្យចូលឆ្នាំថ្មីប្រពៃណីជាតិខ្មែរនាពេលឆាប់ៗខាងមុខនេះ សាលាមធ្យមវិចិត្រសិល្បៈ នឹងរៀបចំការហាត់រាំចង្វាក់ប្រជាប្រិយខ្មែរ រៀងរាល់ព្រឹកថ្ងៃសៅរ៍ ចាប់ពីម៉ោង៨:០០នាទីព្រឹក ដល់ម៉ោង១០:០០នាទីព្រឹក ចាប់ពីថ្ងៃសៅរ៍ ទី៧ ខែមីនា ឆ្នាំ២០២៦ ។
អាស្រ័យដូចបានគោរពជម្រាបជូនខាងលើ សូមគោរពអញ្ជើញ សាធារណជនជិតឆ្ងាយ យុវជន យុវនារី ចូលរួមដោយមេត្រីរៀងរាល់ព្រឹកថ្ងៃសៅរ៍ នៅទីតាំងសាលាមធ្យមវិចិត្រសិល្បៈ ។
បន្ថែមពីលើអ្វីដែលបានបង្ហោះខាងលើនេះ លោក ម៉ូខុន ច័ន្ទសិទ្ធិការ្យ មន្ត្រីទទួលកិច្ចការងារផ្សព្វផ្សាយសាលាមធ្យមវិចិត្រសិល្បៈ បានអះអាងប្រាប់កោះសន្តិភាពតាមសារអេឡិចត្រូនិចថា ការហាត់រៀននេះ គឺនឹងត្រូវបានបង្ហាត់បង្រៀនដោយលោកគ្រូ អ្នកគ្រូនៅសាលាមធ្យមវិចិត្រសិល្បៈផ្ទាល់ ក្នុងនោះ មានការហាត់ផង និងរាំផង ដើម្បីអបអរសាទរពិធីបុណ្យចូលឆ្នាំខ្មែរ ។
លោកបញ្ជាក់ថា ការបង្ហាត់បង្រៀនរាំនេះ គឺធ្វើឡើងនៅរៀងរាល់ចុងសប្តាហ៍នាពេលព្រឹក ដោយបើកឲ្យមហាជនចូលហាត់រៀនដោយមិនគិតអាយុ និងមិនយកថវិកានោះឡើយ ។
លោកបន្ថែមថា ការបង្ហាត់រាំងនេះមិនគិតអាយុឡើយ ដោយសារពួកគាត់អាចមករៀនដោយការហាត់រាំតាមការបង្ហាត់បង្រៀនពីលោកគ្រូ អ្នកគ្រូ នៅទីនេះផ្ទាល់ ខណៈពេលការរាំនេះគឺនឹងធ្វើឡើងដោយរាំជុំគ្នាតែម្តង ។
ការរៀបចំការបង្ហាត់រាំនេះឡើង គឺដោយសារលោកនាយកសាលាស្តីទី គឺចង់បំផុសឲ្យមានការរាំ និងលេងល្បែងប្រជាប្រិយខ្មែរឲ្យកាន់តែទូលំទូលាយ ហើយក៏ជាការត្រៀមសម្រាប់អបអរពិធីបុណ្យចូលឆ្នាំខ្មែរនាពេលខាងមុខនេះ ដូច្នេះ មហាជនអាចចូលរួមបានចាប់តាំងពីពេលផ្សាយដំណឹងនេះតទៅ ។
លោក ម៉ូខុន ច័ន្ទសិទ្ធិការ្យ មន្ត្រីទទួលកិច្ចការងារផ្សព្វផ្សាយសាលាមធ្យមវិចិត្រសិល្បៈ បានអះអាងបន្ថែមថា ការចូលរួមពីសំណាក់បងប្អូនទាំងអស់ គឺជាការចូលរួមចំណែកថែរក្សានូវល្បែងរបាំប្រជាប្រិយខ្មែរក្នុងឱកាសបុណ្យចូលឆ្នាំខ្មែរ ខណៈពេលដែលសាលាមធ្យមវិចិត្រសិល្បៈ គឺជាសាលាដែលមានចក្ខុវិស័យបណ្តុះបណ្តាលលើផ្នែកសិល្បៈនេះផងដែរ ៕
ចែករំលែកព័តមាននេះ