ប្រទេស​ជប៉ុន ៖ ក្រុមហ៊ុន IKEA បាន​លក់​តុក្កត្តា​រូប​ស្វា​អូ​រ៉​ង់​អ៊ូ​តង់ Djungelskog ដាច់​អស់ពី​ស្តុក ដោយ លក់រាយ​ឥឡូវនេះ​នៅ​លើ​គេហទំព័រ eBay កើន​លើស​តម្លៃ​ដើម ២០ ដុល្លារ​ដល់​ទៅ​ជាង ១០ ដង ពោល​ដល់​តម្លៃ ៣៥០ ដុល្លារ​ឯណោះ​។ ស្រប​ពេល​ដែល​តុក្កតា​នេះ បាន​ក្លាយជា​វត្ថុ​ដ៏​គួរ​ឱ្យ​ចង់បាន​ពី​អ្នក​គ្រប់​គ្នា​ក្នុង​រយៈពេល​ប៉ុន្មាន​ស​ប្តា​ហ៍​ថ្មី​ៗ​នេះ បន្ទាប់​ពី​វា​បាន​ដើរតួ​យ៉ាង​សំខាន់​នៅ​ក្នុង​រឿងរ៉ាវ​ដ៏​សោកសង្រេង និង​អាណិតអាសូរ​បំផុត​អំពី​កូន​ស្វា​ដែល​ត្រូវ​ស្វា​ផ្សេង​ទៀត​ធ្វើបាប​នៅ​សួនសត្វ​មួយ​ក្នុង​ទីក្រុង​អ៊ី​ឈី​កា​វ៉ា (Ichikawa) ខេត្ត​ឈី​បា (Chiba) ប្រទេស​ជប៉ុន​។

Punch គឺជា​ឈ្មោះ​កូន​ស្វា​ពូជ​ម៉ា​កាក (Macaque) កំព្រា​អាយុ ៧ ខែ ហើយ​ក៏​ជា​ចំណុច ផ្តើម​ធ្វើ​ឱ្យ​តុក្កត្តា​ស្វា​អូ​រ៉​ង់​អ៊ូ​តង់ Djungelskog របស់​ក្រុមហ៊ុន​ស៊ុ​យ​អែ​ត IKEA លក់​ផ្តាច់​ភ្លូកទឹកភ្លូកដី​។ រឿងរ៉ាវ​កើតឡើង បន្ទាប់​ពី Punch ត្រូវ​បាន​មេ​វា​បោះបង់​ចោល ហើយ​នៅ​ពេល Punch ព្យាយាម​ទៅ​ជិត​ស្វា​ដទៃ​ទៀត​ក្នុង​ទ្រុង​ជាមួយ​គ្នា​ដើម្បី​ទទួល​បាន​ភាព​កក់ក្តៅ​នោះ Punch តែងតែ​ត្រូវ​បាន​ស្វា​ទាំងនោះ​ដេញ​ធ្វើបាប បន្ទាប់​មក​វា​ក៏​រត់​ទៅ​ឱបក្រសោប​តុក្កតា Djungelskog ជំនួស​មេ​។

រូបថត និង​វី​ដេ​អូ​ដ៏​កក់ក្តៅ​របស់ Punch នៅ​ពេល​លេង​ជាមួយ​តុក្កតា Djungelskog បាន​ផ្ទុះ​ឡើង​លើ​បណ្តាញ​ទំនាក់ទំនង​សង្គម និង​សារព័ត៌មាន​ទូ​ទាំង​ពិភពលោក​ភ្លាម​ៗ ដែល​ជំរុញ​ឱ្យ​តុក្កត្តា​ស្វា​អូ​រ៉​ង់​អ៊ូ​តង់​សម្រាប់​ក្មេង​លេង​នេះ​លក់ដាច់​អស់​នៅ​បណ្តា​ហាង​របស់ IKEA ទាំងអស់​នៅ​សហរដ្ឋអាមេរិក ជប៉ុន និង​កូរ៉េ​ខាងត្បូង​។

យោង​តាម​ប្រភព​ពី​បណ្តា​ប្រព័ន្ធ​ផ្សព្វផ្សាយ​ជប៉ុន​បាន​រាយការណ៍​ថា Punch បាន​ចាត់​ទុក​តុក្កតា Djungelskog ជា​មេ​ដែល​វា​មិន​ធ្លាប់​មាន​ពី​មុន ដូច​ជា​ដេក ស៊ី​ចំណី និង​លេង​ជាមួយ​។ ការ​ដែល​យក​តុក្កតា​ធ្វើ​ជា​មេនេះ មិន​ត្រឹមតែ​ធ្វើ​ឱ្យ​បុគ្គលិក​នៅ​សួនសត្វ​សង្វេគ​អាណិតអាសូរ​ប៉ុណ្ណោះ​ទេ ប៉ុន្តែ​ថែម​ទាំង​បាន​ទាក់ទាញ​ប្រជាជន​ទូ​ទាំង​ប្រទេស​ជប៉ុន និង​ពិភពលោក​ផង​ដែរ​។ កាលពី​ស​ប្តា​ហ៍​មុន លោកស្រី Petra Fare ថ្នាក់ដឹកនាំ​ជាន់ខ្ពស់​របស់ IKEA នៅ​ជប៉ុន បាន​ទៅ​ដល់​សួនសត្វ Ichikawa City ដើម្បី​បរិច្ចាគ​ប្រដាប់​ក្មេង​លេង​ស្វា Djungelskog ជា​ច្រើន​ទៅ​ឱ្យ Punch ដើម្បី​កុំឱ្យ​វា​ឱបក្រសោប​តុក្កតា​តែ​មួយ​។ ទន្ទឹម​នឹង​នេះ​ដែរ អ្នកទេសចរ​រាប់​ពាន់​នាក់​បាន​សម្រុក​ទៅ​កាន់​សួនសត្វ Ichikawa ជា​រៀងរាល់ថ្ងៃ ដោយ​បាន​តម្រង់​ជួរ​រង់ចាំ​ចូល​ទៅ​មើល Punch ដោយ​ផ្ទាល់​តែ​ម្តង​។

បើ​តាម​អ្នកជំនាញ​ផ្នែក​សត្តវិទ្យា​នៅ​សាកលវិទ្យាល័យ​ជាតិ​អូស្ត្រាលី បាន​ពន្យល់​ថា ការ​បោះបង់​ចោល​បែប​នេះ គឺជា​រឿង​កម្រ ប៉ុន្តែ​អាច​កើតឡើង​ក្រោម​លក្ខខណ្ឌ​មួយ​ចំនួន ពាក់ព័ន្ធ​នឹង​អាយុ សុខភាព និង​កង្វះ​បទ​ពិសោធន៍​ជា​កត្តា​ដែល​អាច​កើត​មាន​។ ដូច​ករណី Punch មេ​របស់​វា​មានកូន​លើក​ដំបូង ដែល​បង្ហាញ​ពី​កង្វះ​បទ​ពិសោធន៍​។

ដោយឡែក អ្នក​ថែរក្សា​សួនសត្វ​ក៏​បាន​ពន្យល់​ថា Punch បាន​កើត​អំឡុង​ពេល​អាកាសធាតុ​ក្តៅ ដែល​ជា​បរិយាកាស​ស្ត្រេ​ស​ខ្ពស់ ហើយ​ក្នុង​បរិយាកាស​ដែល​ការ​រស់រាន​មានជីវិត​ត្រូវ​បាន​គំរាមកំហែង​ពី​ភាព​តានតឹង​ខាងក្រៅ មេ​របស់​វា​អាច​ផ្តល់​អាទិភាព​លើ​សុខភាព​ផ្ទាល់ខ្លួន និង​ការ​បន្ត​ពូជ​នា​ពេល​អនាគត ជា​ជាង​បន្ត​ថែទាំ​កូន​។ ដូច្នេះ​ហើយ បន្ទាប់​ពី​មេ​របស់ Punch បោះបង់​វា​ចោល អ្នក​ថែរក្សា​សួនសត្វ​បាន​យក​តុក្កត្តា​ស្វា​អូ​រ៉​ង់​អ៊ូ​តង់​ឱ្យ Punch បន្ទាប់​ពី​បាន​សាកល្បង​ជម្រើស​ផ្សេង​ទៀត ប៉ុន្តែ​គ្មាន​ប្រសិទ្ធិ​ភាព​៕ ប្រភព ៖ New York Post និង The Guardian