ខេត្តកំពង់ឆ្នាំង ៖ ក្រោយ​ពី​តារា​កំប្លែង នាយ ពាក់​មី បាន​បង្ហោះ​នគរបាល​ចរាចរណ៍​ខេត្តកំពង់ឆ្នាំង ចាប់​ផាកពិន័យ​លោក ដោយសារ​បើក​លើស​ល្បឿន​កំណត់ ដោយ​ត្រូវ​បង់​ចំនួន ១៨​ម៉ឺន​រៀល​។ នៅ​ក្នុង​លិខិត​ផាកពិន័យ បាន​បង្ហាញ​ថា ជា​បទល្មើស​លើស​ល្បឿន​កំណត់ ៣០-៣៩​គីឡូម៉ែត្រ​ក្នុង​មួយ​ម៉ោង​។

ការិយាល័យ​នគរបាល​ចរាចរណ៍​ផ្លូវគោក​ខេត្តកំពង់ឆ្នាំង បាន​បំភ្លឺ​ឱ្យដឹង​ថា នៅ​ថ្ងៃ​ទី​២៣ ខែកុម្ភៈ ឆ្នាំ​២០២៦ បាន​ទទួល​ព័ត៌មាន​តាម​រយៈ​បណ្ដាញ​សង្គម​ហ្វេ​ស​ប៊ុ​ក Facebook និង​TikTok បាន​បង្ហោះ​វី​ដេ​អូ ករណី​បើកបរ​រថយន្ត​លើស​ល្បឿន​កំណត់ និង​ធ្វើការ​ពិន័យ កាលពី​ថ្ងៃ​ទី​២៣ ខែកុម្ភៈ ឆ្នាំ​២០២៦ កម្លាំង​ការិយាល័យ​នគរបាល​ចរាចរណ៍​ផ្លូវគោក​ខេត្តកំពង់ឆ្នាំង បាន​ចុះ​អនុវត្ត​ច្បាប់​ស្តី​ពី​ចរាចរណ៍​ផ្លូវគោក (​គោលដៅ​ត្រួតពិនិត្យ​ល្បឿន​) នៅ​លើ​ផ្លូវជាតិ​លេខ​៥ ចន្លោះ​គីឡូម៉ែត្រ​លេខ ១០៩-១១០ ស្ថិត​នៅ​ភូមិ​ថ្មី ឃុំ​ផ្សារ ស្រុក​បរិបូណ៌ ខេត្តកំពង់ឆ្នាំង ។

ក្នុង​ករណី​ត្រួតពិនិត្យ​ល្បឿន​នេះ ទៅ​តាម​ស្លាក​សញ្ញា​ចរាចរណ៍​(៩០Km/h)  មិនមែន​ក្រោម​ស្លាក​សញ្ញា​ចរាចរណ៍​(៩០Km/h)​ទេ ។

មាត្រា​៧ ក្នុង​អនុក្រឹត្យ​ស្តី​ពី​ការ​ពិន័យ​អន្តរកាណ៍​ចំពោះ​អំពើ​ល្មើស​នឹង​ច្បាប់​ស្តី​ពី​ចរាចរណ៍​ផ្លូវគោក តាម​អនុក្រឹត្យ​លេខ ៣៩ អន​ក្រ​បក ចុះ​ថ្ងៃ​ទី​១៧ ខែមីនា ឆ្នាំ​២០២០
១.​លើស​ល្បឿន​ចាប់ពី ១ ដល់ ១៩ Km/h ពិន័យ​ចំពោះ​យានយន្ត​ធុន​ស្រាល ១២០.០០០៛ ចំពោះ​យានយន្ត​ធុន​ធ្ងន់ ២២៥.០០០៛
២.​លើស​ល្បឿន​ចាប់ពី ២០ ដល់ ២៩ Km/h ពិន័យ​ចំពោះ​យានយន្ត​ធុន​ស្រាល ១៥០.០០០៛ ចំពោះ​យានយន្ត​ធុន​ធ្ងន់ ៣០០.០០០៛

៣.​លើស​ល្បឿន​ចាប់ពី ៣០ ដល់ ៣៩ Km/h ពិន័យ​ចំពោះ​យានយន្ត​ធុន​ស្រាល ១៨០.០០០៛ ចំពោះ​យានយន្ត​ធុន​ធ្ងន់ ៣៧៥.០០០៛
៤.​លើស​ល្បឿន​ចាប់ពី​  ៤០ Km/h ឡើង​ទៅ ពិន័យ​ចំពោះ​យានយន្ត​ធុន​ស្រាល ៣០០.០០០៛ ចំពោះ​យានយន្ត​ធុន​ធ្ងន់ ៦២៥.០០០៛

​ឧទាហរណ៍ ចំពោះ​យានយន្ត​បើកបរ​ក្នុង​ល្បឿន ១២៩ Km/h មាន​ន័យ​ថា យានយន្ត​ល្មើស​នោះ លើស​ល្បឿន ៣៩ Km/h ត្រូវ​ពិន័យ​ចំពោះ​យានយន្ត​ធុន​ស្រាល ១៨០.០០០៛ ចំពោះ​យានយន្ត​ធុន​ធ្ងន់ ៣៧៥.០០០៛៕