មិនមានការដោះលែងអ្នកលក់ឡេល្បីឈ្មោះ ឆេង ស្រីរ័ត្ន ហៅ Love Riya ឲ្យនៅក្រៅឃុំទេ
ខេត្តកណ្តាល ៖ ប៉ុន្មានថ្ងៃនេះ មានការបង្ហោះ និងចែកចាយបន្តបន្ទាប់ ជុំវិញរូបភាពអ្នកនាង ឆេង ស្រីរ័ត្ន ហៅ Love…
ខេត្តកណ្តាល ៖ ប៉ុន្មានថ្ងៃនេះ មានការបង្ហោះ និងចែកចាយបន្តបន្ទាប់ ជុំវិញរូបភាពអ្នកនាង ឆេង ស្រីរ័ត្ន ហៅ Love Riya ដោយអះអាងថា ត្រូវបានតុលាការដោះលែងឲ្យនៅក្រៅឃុំ។ ទោះបីជាយ៉ាងណា ពុំមានព័ត៌មានជាផ្លូវការណាមួយបញ្ជាក់ច្បាស់ថា អ្នកនាង ឆេង ស្រីរ័ត្ន ហៅ Love Riya ត្រូវបានដោះលែង ឱ្យមានសេរីភាព នោះទេ ។
បើតាមការបញ្ជាក់របស់សមត្ថកិច្ចខេត្តកណ្តាល បានឲ្យដឹងថា គិតត្រឹមថ្ងៃទី២៣ ខែកុម្ភៈ ឆ្នាំ២០២៦ អ្នកនាង ឆេង ស្រីរ័ត្ន ហៅ Love Riya មិនទាន់ដោះលែងពីពន្ធនាគារនោះឡើយ។ ប៉ុន្មានថ្ងៃនេះ ឃើញបងប្អូនបង្ហោះរូបថត Love Riya ហើយខ្លះថា នាងត្រូវបានដោះលែងនោះ មិនមែនជាការពិតឡើយ ។
សម្រាប់រូបភាពរបស់នាង ដែលស្លៀកពាក់ខោអាវអ្នកទោសនោះ គឺមន្ត្រីអនុរក្សពន្ធនាគារ នាំនាងមកពិនិត្យសុខភាពនៅមន្ទីរពេទ្យ ដោយមានការអនុញ្ញាតពីតុលាការ ។
សមត្ថកិច្ច បានឲ្យដឹងទៀតថា ក្រោយចាប់ខ្លួនគាត់មួយសប្តាហ៍ ទើបដឹងថា Love Riyaគាត់មានផ្ទៃពោះ។ ទោះបីជាយ៉ាងណា មានព័ត៌មានខ្លះបានទម្លាយឲ្យដឹងថា នាង Love Riya ត្រូវបានតុលាការលួចដោះលែងស្ងាត់ៗហើយ ។
គួរបញ្ជាក់ថា អ្នកនាង ឆេង ស្រីរ័ត្ន ហៅ Love Riya ត្រូវបានចៅក្រមស៉ើបសួរ នៃសាលាដំបូងខេត្តកណ្ដាល សម្រេចឃុំខ្លួនដាក់ពន្ធនាគារជាបណ្ដោះអាសន្ន នៅថ្ងៃទី១៥ ខែសីហា ឆ្នាំ២០២៥ ក្រោយតំណាងអយ្យការសម្រេចចោទប្រកាន់ចំនួន២ បទល្មើស រួមមាន «ញុះញង់ឲ្យប្រព្រឹត្តឧក្រិដ្ឋជាអាទិ៍ និងធ្វើឲ្យខូចទឹកចិត្តកងទ័ព» ប្រព្រឹត្តនៅចំណុចបុរី ML ស្ថិតនៅ ភូមិកំពង់សំណាញ់១ សង្កាត់កំពង់សំណាញ់ ក្រុងតាខ្មៅ ខេត្តកណ្តាល កាលពីថ្ងៃទី៦ និងថ្ងៃទី១៣ ខែសីហា ឆ្នាំ២០២៥ បទល្មើសព្រហ្មទណ្ឌ ដែលចែងឱ្យផ្តន្ទាទោសតាមមាត្រា ៤៧២ និងមាត្រា ៤៩៦ នៃក្រមព្រហ្មទណ្ឌ។
ការចាប់ខ្លួនអ្នកនាង ធ្វើឡើងបន្ទាប់ពីអ្នកលក់ឡេល្បីឈ្មោះរូបនេះ ប្រើប្រាស់ពាក្យសម្ដីនៅលើបណ្ដាញសង្គម ដែលមានលក្ខណៈញុះញង់បំបាក់ទឹកចិត្តកងទ័ព និងប៉ះពាល់ដល់ប្រជាពលរដ្ឋខ្មែរ ពាក់ព័ន្ធបញ្ហាព្រំដែនកម្ពុជា-ថៃ និងការប្រើប្រាស់ផលិតផលថៃ ។
ក្រោយពិនិត្យទៅលើឯកសារ និងភស្តុតាងនានា ក្នុងសំណុំរឿង ចៅក្រមស៊ើបសួរ នៃសាលាដំបូងខេត្តកណ្តាល បានសម្រេចឃុំខ្លួនបណ្តោះអាសន្នលើជនត្រូវចោទឈ្មោះ ឆេង ស្រីរ័ត្ន ហៅ Love Riya ដាក់ឃុំបណ្តោះអាសន្ន នៅពន្ធនាគារខេត្តកណ្តាល ដើម្បីបន្តកិច្ចស៊ើបសួរតាមនីតិវិធីច្បាប់ ។
បន្ទាប់ពីមានការឃុំខ្លួន ស្រាប់តែបែកធ្លាយនៅព័ត៌មានថា អ្នកនាង ត្រូវបានតុលាការដោះលែង។ ទោះបីជាយ៉ាងណា កោះសន្តិភាពពុំទទួលបានការបំភ្លឺណាមួយពីសាលាដំបូងខេត្តកណ្តាលនោះឡើយ ៕
ចែករំលែកព័តមាននេះ