អន្តរជាតិ ៖ តម្លៃមាសអន្តរជាតិបន្តបំបែកកំណត់ត្រាមិនធ្លាប់មានពីមុនរបស់ខ្លួន ដោយទម្លុះតម្លៃ ៥ ០០០ ដុល្លារក្នុង១អោនជាលើកដំបូងក្នុងប្រវត្តិសាស្ត្រ នៅព្រឹកថ្ងៃទី២៦ ខែមករា ឆ្នាំ២០២៦…
អន្តរជាតិ ៖ តម្លៃមាសអន្តរជាតិបន្តបំបែកកំណត់ត្រាមិនធ្លាប់មានពីមុនរបស់ខ្លួន ដោយទម្លុះតម្លៃ ៥ ០០០ ដុល្លារក្នុង១អោនជាលើកដំបូងក្នុងប្រវត្តិសាស្ត្រ នៅព្រឹកថ្ងៃទី២៦ ខែមករា ឆ្នាំ២០២៦ ខណៈដែលតម្រូវការកាន់តែខ្លាំងឡើង សម្រាប់លោហៈធាតុដ៏មានតម្លៃដែលត្រូវបានចាត់ទុកជាទ្រព្យសកម្មដ៏មានសុវត្ថិភាពបំផុត ចំពេលមានភាពមិនប្រាកដប្រជាភូមិសាស្ត្រនយោបាយសកល។ នេះបើយោងតាមការចេញផ្សាយពីទីភ្នាក់ងារសារព័ត៌មាន Reuters ។
តម្លៃមាសអន្តរជាតិហក់ឡើងដល់កម្រិតខ្ពស់បំផុត ៥ ០៩០ ដុល្លារ/អោន ឬ ៦ ១៣២ ដុល្លារ/តម្លឹង មុនពេលរក្សាតម្លៃមត្រឹម ៥ ០៨៥ ដុល្លារ/អោន ឬ ៦ ១២៦ ដុល្លារ/តម្លឹង គិតត្រឹមម៉ោង ៩ និង ៤០ នាទីព្រឹកថ្ងៃទី២៦ ខែមករា ឆ្នាំ២០២៦ (ម៉ោងនៅកម្ពុជា)។
មាសអន្តរជាតិបានកើនឡើងប្រមាណ ៦៤% នៅក្នុងឆ្នាំ ២០២៥ ដែលគាំទ្រដោយតម្រូវការជាប់លាប់ ការបន្ធូរបន្ថយគោលនយោបាយរូបិយវត្ថុរបស់សហរដ្ឋអាមេរិក ការសម្រុកទិញស្តុកទុកជាទុនបម្រុងរបស់បណ្តាធនាគារកណ្តាលសកល ដោយចំណោមប្រទេសចិនបានបង្កើនការទិញមាសរបស់ខ្លួន សម្រាប់ខែទី ១៤ គិតត្រឹមខែធ្នូ ឆ្នាំមុន។ ដ្បិតតម្លៃបានកើនឡើងជាង ១៧% ហើយ នៅឆ្នាំនេះ។
កត្តាជំរុញតម្លៃមាសអន្តរជាតិចុងក្រោយបំផុត កើតចេញវិបត្តិទំនុកចិត្តលើរដ្ឋបាលសហរដ្ឋអាមេរិក បង្កឡើងដោយការសម្រេចចិត្តមិននឹកស្មានដល់មួយចំនួនពីរដ្ឋបាលលោក ត្រាំ កាលពីសប្តាហ៍មុន។ ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) កាលពីថ្ងៃទី២១ ខែមករា កន្លងទៅ បានដកចេញភ្លាមៗនូវការគំរាមកំហែងពន្ធលើសម្ព័ន្ធមិត្តអឺរ៉ុបរបស់ខ្លួន ជាថ្នូរដើម្បីអាចត្រួតត្រាកោះហ្គ្រីនឡែន (Greenland) របស់ប្រទេសដាណឺម៉ាក។ ទោះយ៉ាងណាក៏ដោយ កាលពីចុងសប្តាហ៍មុន ស្រាប់តែលោកបានប្រកាសថានឹងដាក់ពន្ធ ១០០% លើប្រទេសកាណាដា ប្រសិនបើប្រទេសនេះបន្តកិច្ចព្រមព្រៀងពាណិជ្ជកម្មជាមួយចិន។ នេះគឺជាការវិវឌ្ឍន៍ចុងក្រោយ ពាក់ព័ន្ធនឹងការប្រែប្រួលភូមិសាស្ត្រនយោបាយសកល។
លោក Kyle Rodda អ្នកវិភាគទីផ្សារជាន់ខ្ពស់នៅ Capital.com បានលើកឡើងថា រដ្ឋបាលលោក ត្រាំ បានបង្កឱ្យមានការបែកបាក់ តាមរយៈវិធីដែលអ្វីៗត្រូវបានកើតដូចគ្រប់គ្នាឃើញ ដូច្នេះឥឡូវនេះ គ្រប់គ្នាកំពុងសម្រុកវិនិយោគលើមាស ដែលជាជម្រើសដ៏ល្អបំផុតតែមួយគត់។
ដោយឡែក លោក Philip Newman នាយកប្រតិបត្តិនៅ Metals Focus ដែលជាក្រុមហ៊ុនប្រឹក្សាយោបល់ស្រាវជ្រាវមាសឯករាជ្យឈានមុខគេមួយ បានលើកឡើងថា «យើងរំពឹងថា មាសនឹងមានការកើនឡើងបន្ថែមទៀត។ ការព្យាករបច្ចុប្បន្នរបស់យើងបង្ហាញថា តម្លៃមាសនឹងឡើងដល់ប្រហែល ៥ ៥០០ ដុល្លារ/អោន ឬ ៦ ៦២៦ ដុល្លារ/តម្លឹង នៅចុងឆ្នាំនេះ៕
ចែករំលែកព័តមាននេះ