ទីក្រុងម៉ានីឡា៖ មានហេតុការណ៍លិចនាវាចម្លង (ស្រឡាង) មួយគ្រឿងដែលដឹកមនុស្សសរុបជាង៣៥០នាក់នៅប្រទេសហ្វ៊ីលីពីនភាគខាងត្បូង។ ស្លាប់ប៉ុន្មាន រស់ប៉ុន្មានមិនទាន់ដឹងនៅឡើយទេ។ ហេតុការណ៍នេះកើតឡើងនៅពេលរំលងអធ្រាត្រឆ្លងចូលព្រឹកថ្ងៃចន្ទ។ ក្រុមអ្នកជួយសង្គ្រោះថ្លែងថាពួកគេអាចជួយស្រង់យកអ្នកដំណើរយ៉ាងតិច២១៥នាក់ឱ្យរួចផុតពីសេចក្ដីស្លាប់។
រហូតមកដល់ពេលនេះ គេស្រង់បានសាកសពជនរងគ្រោះយ៉ាងតិច៧នាក់។ ស្រឡាងឈ្មោះអឹមវី ទ្រីសា ខឺស្ទីន៣ (M/V Trisha Kerstin 3) ជាប្រភេទនាវាចម្លងសម្រាប់ដឹកមនុស្ស និងទំនិញ។ មុនពេលកើតហេតុ នាវានេះបើកចេញពីទីក្រុងកំពង់ផែហ្សាំបូអាំងហ្កា (Zamboanga) ឆ្ពោះទៅកោះចូឡូ (Jolo) នៃខេត្តស៊ូលូ (Sulu)។ កំពុងបើកសុខៗ ស្រឡាងក៏ជួបនឹងហេតុការណ៍នេះតែម្ដង។
ប្រភពខ្លះប្រាប់ថានៅលើស្រឡាងនោះមានអ្នកដំណើរ៣៣២នាក់ និងបុគ្គលិកបម្រើការ២៧នាក់។ ស្រឡាងនេះទំនងជាមានបញ្ហាបច្ចេកទេស ហើយក៏លិចតែម្ដង។ នេះបើយោងតាមការសន្និដ្ឋានរបស់មន្ត្រីរដ្ឋាភិបាលហ្វ៊ីលីពីន។ លោកមូជីវ ហាតាម៉ាន់ (Mujiv Hataman) ជាអភិបាលនៃគណៈអភិបាលខេត្តបាស៊ីឡាន (Basilan) ជាខេត្តដែលនៅកៀកនឹងកន្លែងលិចស្រឡាង។
លោកថ្លែងប្រាប់អ្នកសារព័ត៌មានថាអ្នកដំណើរដែលត្រូវគេជួយសង្គ្រោះមួយចំនួន រួមទាំងសាកសពជនរងគ្រោះដែលស្លាប់២នាក់ត្រូវគេដឹកទៅកាន់ទីក្រុងអ៊ីសាបេឡា (Isabela) នៃខេត្តបាស៊ីឡាន។លោកថ្លែងបន្តទៀតថាលោកទទួលបានអ្នកដែលគេជួយសង្គ្រោះ៣៧នាក់នៅកំពង់ផែ។ ប៉ុន្តែគួរឱ្យស្ដាយ ២នាក់បានស្លាប់ហើយ៕ ប្រភព៖ អេភី (AP) និងប្រភពដទៃទៀត
ចែករំលែកព័តមាននេះ