ខេត្តកំពង់ស្ពឺ៖ ជនសង្ស័យលួចម៉ូតូម្នាក់ត្រូវបានកម្លាំងនគរបាលស្រុកគងពិសីធ្វើការឃាត់ខ្លួនបានភ្លាមៗតាម(GPS) ខណៈដែលធ្វើការក្នុងការដ្ឋានជាមួយគ្នា ហើយម្ចាស់ម៉ូតូឌុបជនសង្ស័យទៅទិញទុយោ ពេលជនរងគ្រោះចុះទៅទិញមិនបានដកសោរម៉ូតូ ជនសង្ស័យបែកគំនិតនិងឃើញឱកាសល្អជិះព្យាយាមគេចខ្លួនជ្រុលទៅបុកជាមួយរថយន្ត ក៏ឃាត់ខ្លួនបាន។
ការឃាត់ខ្លួនជនសង្ស័យលួចម៉ូតូអ្នកធ្វើការជាមួយគ្នាបានកាលពីរសៀលថ្ងៃទី២៤ ខែមករា ឆ្នាំ២០២៦ នៅចំណុចក្នុងភូមិល្វា ឃុំអង្គពពេល ស្រុកគងពិសី ខេត្តកំពង់ស្ពឺ។
នគរបាលស្រុកគងពិសីបាននិយាយឱ្យដឹងថា ជនសង្ស័យដែលលួចម៉ូតូហើយនគរបាលឃាត់ខ្លួនបានមានឈ្មោះ កូយ យ៉ា ភេទប្រុស អាយុ២៦ឆ្នាំមុខរបរកម្មករសំណង់ មានស្រុកកំណើតនៅភូមិចារ្យថ្មី ឃុំកន្ទួត ស្រុកជាក្សាន្ត ខេត្តព្រះវិហារ បច្ចុប្បន្នស្នាក់នៅការដ្ឋានសំណង់ក្នុងភូមិព្រៃស្ដេច ឃុំវាល ស្រុកគងពិសី ខេត្តកំពង់ស្ពឺ ម៉ូតូដែលជនសង្ស័យធ្វើសកម្មភាពលួចម៉ាកហុងដាសេ១២៥ ពណ៌ខ្មៅស៊េរីឆ្នាំ២០២៥ គ្មានផ្លាកលេខនោះទេ ដែលមានលេខតួ-លេខម៉ាស៊ីND125NE0343241ដែលជា កម្មសិទ្ធិរបស់ឈ្មោះ សេង ពិសី ភេទប្រុស អាយុ៣១ឆ្នាំមុខរបរកម្មករសំណង់ មានស្រុកកំណើតនៅភូមិរំចេក ឃុំគោកមន ស្រុកបន្ទាយអំពិល ខេត្តបន្ទាយមានជ័យ បច្ចុប្បន្នស្នាក់នៅក្នុងការដ្ឋានសំណង់ ក្នុងភូមិ-ឃុំជាមួយគ្នា។
នគរបាលស្រុកគងពិសីបានបន្តឱ្យដឹងថានៅមុនពេលឃាត់ខ្លួនជនសង្ស័យខាងលើ គឺមានករណីចោរកម្ម ( លួចម៉ូតូកើតឡើង) នៅវេលាម៉ោង១២និង៥០នាទីថ្ងៃត្រង់ថ្ងៃទី២៤ ខែមករា ឆ្នាំ២០២៦ ដោយជនសង្ស័យ ឈ្មោះ កូយ យ៉ា ភេទប្រុសអាយុ២៦ឆ្នាំ មានស្រុកកំណើតនៅភូមិចារ្យថ្មី ឃុំកន្ទួត ស្រុកជាក្សាន្ត ខេត្តព្រះវិហារ បច្ចុប្បន្នស្នាក់នៅការដ្ឋានសំណង់ភូមិព្រៃស្ដេច ឃុំវាល ស្រុកគងពិសី ខេត្តកំពង់ស្ពឺ បានធ្វើសកម្មភាពលួចម៉ូតូម៉ាកហុងដាសេ១២៥ ពណ៌ខ្មៅសេរីឆ្នាំ២០២៥ គ្មានស្លាកលេខ ដែលមានលេខតួ-លេខម៉ាស៊ីND125NE0343241 របស់ម្ចាស់ឈ្មោះ សេង ពិសី ភេទប្រុសអាយុ៣១ឆ្នាំមានស្រុកកំណើតនៅភូមិរំចេក ឃុំគោកមន ស្រុកបន្ទាយអំពិល ខេត្តបន្ទាយមានជ័យ បច្ចុប្បន្នស្នាក់នៅភូមិឃុំជាមួយគ្នា។
នគរបាលស្រុកគងពិសីបានបញ្ជាក់ថា នៅមុនពេលកើតហេតុ ជនរងគ្រោះឈ្មោះ សេង ពិសី បានឌុបជនសង្ស័យឈ្មោះ កូយ យ៉ា ចេញពីការដ្ឋានសំណង់ ឆ្ពោះទៅកន្លែងលក់គ្រឿងសំណង់នៅភូមិក្រសាំងជីមែ ឃុំវាល ស្រុកគងពិសី ខេត្តកំពង់ស្ពឺ ដើម្បីទិញទុយោ នៅពេលជនរងគ្រោះ(ម្ចាស់ម៉ូតូ)ឌុបទៅដល់ ក៏បានចុះពីលើម៉ូតូរួចចូលទៅទិញទុយោតែម្នាក់ឯង មិនបានដកសោរចេញពីម៉ូតូនោះទេ ចំណែកជនសង្ស័យនៅអង្គុយលើម៉ូតូ ឃើញឱកាសល្អក៏បានកាច់សោរបញ្ឆេះម៉ូតូ ជិះតាមផ្លូវជាតិលេខ៣ទៅទិសខាងជើងបាត់ ។ ក្រោយមកម្ចាស់ម៉ូតូបានទូរស័ព្ទ រាយការណ៍មកសមត្ថកិច្ចនគរបាល នៅពេលទទួលបានព័ត៌មានភ្លាមកម្លាំងនគរបាលជំនាញបាន សហការស្រាវជ្រាវតាមជីភីអេស(GPS) ឃើញម៉ូតូនៅចំណុចកន្លែងជាងជូសជុលម៉ូតូមួយកន្លែង ស្ថិតនៅក្នុងភូមិល្វា ឃុំអង្គពពេល ស្រុកគងពិសី ខេត្តកំពង់ស្ពឺ កំពុងជួសជុលម៉ូតូ(ពេលឃើញសមត្ថកិច្ចទៅដល់ជនសង្ស័យបានជិះម៉ូតូរត់គេចជ្រុលបុកជាមួយរថយន្តមួយគ្រឿង) ពេលនោះកម្លាំងនគរបាលបានឃាត់ខ្លួនតែម្តង ។
បច្ចុប្បន្នជនសង្ស័យត្រូវបានឃាត់ខ្លួននៅអធិការដ្ឋាននគរបាលស្រុកគងពិសីសួរនាំ និងបានកសាងសុំណុំរឿងបន្តទៅការិយាល័យជំនាញនៃស្នងការដ្ឋាននគរបាលខេត្តកំពង់ស្ពឺ ដើម្បីចាត់ការបន្តតាមផ្លូវច្បាប់។ ចំណែកវត្ថុតាងម៉ូតូនគរបាលបានប្រគល់ជូនម្ចាស់ដើមយកទៅប្រើប្រាស់ជាមធ្យោបាយវិញហើយ៕
ចែករំលែកព័តមាននេះ