លោក ត្រាំ គំរា.មដាក់ពន្ធ ១០០% លើកាណាដា បើហ៊ានបង្កើតកិច្ចព្រមព្រៀងពាណិជ្ជកម្មជាមួយចិន
រដ្ឋធានីវ៉ាស៊ីនតោន ៖ ប្រធានាធិបតីអាមេរិក លោក ដូណាល់ ត្រាំ (Donald Trump) នៅថ្ងៃទី២៤ ខែមករា…
រដ្ឋធានីវ៉ាស៊ីនតោន ៖ ប្រធានាធិបតីអាមេរិក លោក ដូណាល់ ត្រាំ (Donald Trump) នៅថ្ងៃទី២៤ ខែមករា ឆ្នាំ២០២៦ (ម៉ោងនៅសហរដ្ឋអាមេរិក) បានប្រកាសថានឹងដាក់ពន្ធ ១០០% លើប្រទេសកាណាដា ប្រសិមបើប្រទេសអាមេរិកខាងជើងនេះ ហ៊ានបង្កើតកិច្ចព្រមព្រៀងពាណិជ្ជកម្មជាមួយប្រទេសចិន។ លោកព្រមាននាយករដ្ឋមន្ត្រីកាណាដាថា កិច្ចព្រមព្រៀងជាមួយចិន នឹងធ្វើឱ្យមានគ្រោះថា្នក់ដល់ប្រទេសកាណាដា។ នេះបើតាមប្រភពពីទីភ្នាក់ងារសារព័ត៌មាន Reuters ចេញផ្សាយនៅថ្ងៃទី២៥ ខែមករា។
លោក ត្រាំ បានសរសេរលើបណ្តាញសង្គម Truth Social ដូច្នេះថា «ប្រទេសចិននឹងឆីប្រទេសកាណាដាទាំងរស់ លេបត្របាក់ទាំងមូល រួមទាំងបំផ្លាញអាជីវកម្ម រចនាសម្ព័ន្ធសង្គម និងរបៀបរស់នៅទូទៅរបស់ពួកគេ (កាណាដា)។ ប្រសិនបើកាណាដាបង្កើតកិច្ចព្រមព្រៀងជាមួយប្រទេសចិន ប្រទេសនេះនឹងត្រូវវាយបកភ្លាមៗជាមួយពន្ធ ១០០% ប្រឆាំងនឹងទំនិញ និងផលិតផលកាណាដាទាំងអស់ដែលចូលមកសហរដ្ឋអាមេរិក»។
នៅក្នុងវីដេអូមួយ កាលពីថ្ងៃទី២៤ ខែមករា នាយករដ្ឋមន្ត្រីកាណាដា លោក ម៉ាក ខានី (Mark Carney) បានជំរុញប្រជាជនកាណាដាទិញផលិតផលក្នុងស្រុក ប៉ុន្តែមិនបាននិយាយដោយផ្ទាល់អំពីការគំរាមកំហែងពន្ធរបស់លោក ត្រាំ នោះទេ។ លោកបានថ្លែងថា «ដោយសារសេដ្ឋកិច្ចយើងស្ថិតក្រោមការគំរាមកំហែងពីបរទេស ប្រជាជនកាណាដាបានធ្វើការជ្រើសរើសផ្តោតលើអ្វីដែលយើងអាចគ្រប់គ្រងដោយខ្លួនឯងបាន។ យើងមិនអាចគ្រប់គ្រងអ្វីដែលប្រទេសដទៃទៀតធ្វើបាននោះទេ យើងអាចក្លាយជាអតិថិជនដ៏ល្អបំផុតរបស់យើងខ្លួនឯង»។
គួររំលឹកថា នាយករដ្ឋមន្ត្រីកាណាដានៅខែមករានេះ បានធ្វើដំណើរទស្សនកិច្ចទៅកាន់ប្រទេសចិន ដើម្បីផ្សារភ្ជាប់ទំនាក់ទំនងប្រទេសទាំងពីរឡើងវិញ និងបានឈានដល់កិច្ចព្រមព្រៀងពាណិជ្ជកម្មជាមួយទីក្រុងប៉េកាំង ដែលជាដៃគូពាណិជ្ជកម្មធំទី២របស់ខ្លួន បន្ទាប់ពីសហរដ្ឋអាមេរិក។ ភ្លាមៗបន្ទាប់ពីដំណើរទស្សនកិច្ចរបស់លោក ខានី ទៅកាន់ ចិន លោក ត្រាំ ហាក់ដូចជាគាំទ្រ ដោយលោកបានប្រាប់អ្នកយកព័ត៌មាននៅសេតវិមាន កាលពីថ្ងៃទី១៦ ខែមករា ថា «វាជារឿងល្អសម្រាប់គាត់ (លោក ខានី) ក្នុងការចុះហត្ថលេខាលើកិច្ចព្រមព្រៀងពាណិជ្ជកម្ម។ ប្រសិនបើអ្នកអាចទទួលបានកិច្ចព្រមព្រៀងជាមួយប្រទេសចិន អ្នកគួរតែធ្វើដូច្នេះ»។
យ៉ាងណាមិញ លោក ដូមីនីក ឡេប្លង់ (Dominic LeBlanc) រដ្ឋមន្ត្រីកាណាដាទទួលបន្ទុកពាណិជ្ជកម្ម «កាណាដា-សហរដ្ឋអាមេរិក» បានលើកឡើងតាមរយៈសារមួយនៅលើបណ្តាញសង្គម X កាលពីថ្ងៃទី២៤ ខែមករា ថា «មិនមានការស្វែងរកកិច្ចព្រមព្រៀងពាណិជ្ជកម្មសេរីជាមួយប្រទេសចិននោះទេ។ អ្វីដែលសម្រេចបានគឺដំណោះស្រាយលើបញ្ហាពន្ធគយសំខាន់ៗជាច្រើន»។
ស្ថានទូតចិនប្រចាំប្រទេសកាណាដា បានបញ្ជាក់នៅក្នុងសេចក្តីថ្លែងការណ៍មួយទៅកាន់ Reuters ថា ប្រទេសចិនបានត្រៀមខ្លួនជាស្រេច ដើម្បីធ្វើការជាមួយប្រទេសកាណាដា ដើម្បីអនុវត្តការឯកភាពគ្នាដ៏សំខាន់ដែលសម្រេចបានដោយមេដឹកនាំប្រទេសទាំងពីរ។
សូមជម្រាបថា ភាពតានតឹងរវាងសហរដ្ឋអាមេរិក និហកាណាដា បានកើនឡើងក្នុងរយៈពេលប៉ុន្មានថ្ងៃថ្មីៗនេះ បន្ទាប់ពីការរិះគន់របស់លោកនាយករដ្ឋមន្ត្រី ម៉ាក ខានី ចំពោះការខិតខំប្រឹងប្រែងរបស់លោក ត្រាំ ដើម្បីត្រួតត្រាលើកោះហ្គ្រីនឡែន (Greenland) របស់ប្រទេសដាណឺម៉ាក៕
ចែករំលែកព័តមាននេះ