រាជធានីភ្នំពេញ ៖ កាលពីថ្ងៃទី៨ ខែមករា ឆ្នាំ២០២៦កន្លងទៅ សាលាដំបូងរាជធានីភ្នំពេញ គ្រោងលើកយកសំណុំរឿងសកម្មជន៤នាក់ ដែលនិយមនិយាយពីកិច្ចព្រមព្រៀងទីក្រុងប៉ារីស ដើម្បីបើកសវនាការជំនុំជម្រះទោស ដែលអ្នកទាំង៤នាក់ជាប់ចោទពីបទញុះញង់…
រាជធានីភ្នំពេញ ៖ កាលពីថ្ងៃទី៨ ខែមករា ឆ្នាំ២០២៦កន្លងទៅ សាលាដំបូងរាជធានីភ្នំពេញ គ្រោងលើកយកសំណុំរឿងសកម្មជន៤នាក់ ដែលនិយមនិយាយពីកិច្ចព្រមព្រៀងទីក្រុងប៉ារីស ដើម្បីបើកសវនាការជំនុំជម្រះទោស ដែលអ្នកទាំង៤នាក់ជាប់ចោទពីបទញុះញង់ បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម និងបទប្រមាថ ។
ប៉ុន្តែគម្រោងសវនាការនេះមិនបានដំណើរការទេ និងត្រូវបានលើកពេលទៅថ្ងៃក្រោយវិញ ដោយមូលហេតុអវត្តមានជនជាប់ចោទ ដែលជាប់ឃុំនៅមណ្ឌលកែប្រែទី៣ត្រពាំងផ្លុង ។
ជនត្រូវចោទទាំង៤នាក់មាន ៖
១-ឈ្មោះ ស្រ៊ុន ស្រ៊ន ភេទប្រុស
២-ឈ្មោះ ភឹង សោភា ភេទស្រី
៣-ឈ្មោះ ចក់ បានមុនី ភេទប្រុស
៤-ឈ្មោះ សាន សិទ្ធី ភេទប្រុស ។
សូមរំឭកថា សាលាដំបូងរាជធានីភ្នំពេញ កាលពីថ្ងៃទី២៤ ខែកក្កដា ឆ្នាំ២០២៤ បានសម្រេចចេញដីកាបង្គាប់ឲ្យឃុំខ្លួនសកម្មជន៤នាក់ខាងលើ ដាក់មណ្ឌលកែប្រែទី៣ ត្រពាំងផ្លុង ក្នុងខេត្តត្បូងឃ្មុំ ជាបណ្តោះអាសន្ន ដោយដាក់ឱ្យស្ថិតក្រោមការពិនិត្យពីបទញុះញង់ បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម និងប្រមាថ តាមមាត្រា៤៩៤ និងមាត្រា៤៩៥ ។
ការចោទប្រកាន់នេះ ធ្វើឡើងបន្ទាប់ពីសកម្មជនទាំង៤នាក់ បានធ្វើការអត្ថាធិប្បាយអំពីកិច្ច
សហប្រតិបត្តិការតំបន់ត្រីកោណអភិវឌ្ឍន៍ (CLV) ដោយលោក ស្រ៊ុន ស្រ៊ន និយាយថា ការដាក់បញ្ចូលខេត្តទាំង៤របស់ខ្មែរទៅក្នុងតំបន់ត្រីកោណអភិវឌ្ឍន៍ជាមួយឡាវ និង
វៀតណាម កម្ពុជានឹងប្រឈមការបាត់បង់ទឹកដីជាជំហានៗទៅប្រទេសវៀតណាម ។ លោកនិយាយថា ចាប់ពីតំបន់ភូមិភាគឦសានរហូតដល់ខេត្តផ្សេងៗទៀត ដែលនៅជាប់ព្រំដែនវៀតណាម ដូចជាខេត្តត្បូងឃ្មុំ និងខេត្តកំពង់ចាមជាដើម នឹងត្រូវវៀតណាមកាត់យក ហើយទីបំផុត កម្ពុជានឹងបាត់ទឹកដីទាំងមូលតែម្តង ។
សកម្មជនសង្គមរូបនេះអះអាងថា ការបង្កើតតំបន់ត្រីកោណអភិវឌ្ឍន៍រួមគ្នារវាងកម្ពុជា ឡាវ និងវៀតណាម(CLV) គឺស្របតាមបំណងរបស់វៀតណាម ដែលមានផែនការបង្កើតតំបន់កន្ទុយនាគនេះឱ្យក្លាយទៅជាប្រទេសឥណ្ឌូចិន នៅថ្ងៃខាងមុខទាំងស្រុង ។
នៅពេលដែលកម្ពុជា វៀតណាម និងឡាវ ត្រូវដាក់បញ្ចូលគ្នាទៅជាឥណ្ឌូចិនរួចរាល់ គឺមានតែរដ្ឋាភិបាលវៀតណាមតែមួយគត់ ដែលជាអ្នកគ្រប់គ្រងលើប្រទេសឥណ្ឌូចិននេះ ។ នៅពេលនោះ ប្រជាជនវៀតណាម ដែលមានប្រមាណ៧លាននាក់ក្នុងខេត្តទាំង៥របស់គេ ក្នុងតំបន់ត្រីកោណនេះ នឹងនាំគ្នាទៅរស់នៅពេញខេត្តទាំង៤របស់ខ្មែរដោយស្របច្បាប់ ។
លោក ស្រ៊ុន ស្រ៊ន និយាយទៀតថា ដំណោះស្រាយលើបញ្ហានេះ មានតែជំរុញឱ្យមានការអនុវត្តកិច្ចព្រមព្រៀងសន្តិភាពទីក្រុងប៉ារីសប៉ុណ្ណោះ ទើបអាចការពារឯករាជ្យជាតិ បូរណភាពទឹកដី និងអធិបតេយ្យជាតិខ្មែរទាំងមូលបានទៅថ្ងៃមុខ ។ បើមិនដូច្នោះទេ នោះកម្ពុជានឹងត្រូវដាក់លក់ឱ្យបរទេសក្រោមការសហការលើតំបន់ត្រីកោណអភិវឌ្ឍន៍នេះ ។
យ៉ាងណាក៏ដោយ បន្ទាប់ពីការធ្វើអត្ថាធិប្បាយជុំវិញតំបន់ត្រីកោណអភិវឌ្ឍន៍នេះ ជនឈ្មោះ ស្រ៊ុន ស្រ៊ន និងកញ្ញា ភឹង សោភា ត្រូវបានសមត្ថកិច្ចចាប់ខ្លួនភ្លាមៗ នៅឃុំស្រែណូយ ស្រុកវ៉ារិន ខេត្តសៀមរាប និងបញ្ជូនទៅឃុំខ្លួននៅពន្ធនាគារព្រៃស ហើយក្រោយមកក៏បានផ្ទេរទៅមណ្ឌលកែប្រែទី៣ត្រពាំងផ្លុង ។
ជុំវិញការលើកឡើងរបស់បុគ្គល ស្រុ៊ន ស្រ៊ននេះ រាជរដ្ឋាភិបាលកម្ពុជាបានចាត់ទុកថា ជាសកម្មភាពញុះញង់ឲ្យមានភាពវឹកវរ បះបោរប្រឆាំងនឹងរាជរដ្ឋាភិបាល ជាទង្វើខុសច្បាប់ ដូច្នោះត្រូវតែប្រឈមមុខនឹងច្បាប់ ។ ថ្វីបើបែបនេះក្ដីបញ្ហា CLV នោះ រាជរដ្ឋាភិបាលក៏បានប្រកាសដកខ្លួនចេញពីគម្រោងការនានានៅពេលនោះដែរ ៕
ចែករំលែកព័តមាននេះ