អភិបាលខេត្តកំពង់ចាម ប្រគល់ម៉ូតូ ២គ្រឿង ជាអំណោយរបស់លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ជូនគ្រួសារវីរកងទ័ព ២គ្រួសារ
ខេត្តកំពង់ចាម ៖ លោក អ៊ុន ចាន់ដា អភិបាល នៃគណៈអភិបាលខេត្តកំពង់ចាម និងលោក ខ្លូត ផន…
ខេត្តកំពង់ចាម ៖ លោក អ៊ុន ចាន់ដា អភិបាល នៃគណៈអភិបាលខេត្តកំពង់ចាម និងលោក ខ្លូត ផន ប្រធានក្រុមប្រឹក្សាខេត្តកំពង់ចាម បានប្រគល់ម៉ូតូ ២គ្រឿង ដែលជាអំណោយដ៏ថ្លៃថ្លារបស់លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ជូនគ្រួសារវីរកងទ័ព ២គ្រួសារ ដែលបានរងគ្រោះខូចខាតម៉ូតូទាំងស្រុង អំឡុងពេលបំពេញតួនាទីជាយោធា កាលពីព្រំដែនកម្ពុជា-ថៃ មានបញ្ហា ។
ពិធីប្រគល់ធ្វើនៅសាលាខេត្តកំពង់ចាម នៅថ្ងៃទី០៨ ខែមករា ឆ្នាំ២០២៦ ដោយមានការប្រគល់ ទទួលម៉ូតូផ្ទាល់ដល់ដៃ ភរិយារបស់យោធាទាំង ២គ្រួសារ ។
គ្រួសារយោធាទាំង២ ដែលបានទទួលម៉ូតូ រួមមាន ៖ ទី១.លោកស្រី ម៉ោង មួយហ៊ុន ទីកន្លែងកំណើតនៅ ឃុំស្វាយខ្សាច់ភ្នំ ស្រុកស្រីសន្ធរ ខេត្តកំពង់ចាម មានស្វាមី ឈ្មោះ តឹក វ៉ាន់ដេត ជាយោធា បម្រើការងារនៅកងពលតូចថ្មើរជើងលេខ៥១ កំពុងឈរជើងនៅជួរមុខ។ និងទី២៖ លោកស្រី ទូច ស៊ីថា ទីកន្លែងកំណើតនៅ ឃុំព្រែកក្របៅ ស្រុកកងមាស ខេត្តកំពង់ចាម មានស្វាមី ឈ្មោះ លុក ចាប ជាយោធា បម្រើការងារនៅកងពលតូចអន្តរាគមន៍លេខ៦ កំពុងឈរជើងនៅជួរមុខ ខេត្តឧត្តរមានជ័យ ។
ឆ្លៀតក្នុងឱកាស លោក អ៊ុន ចាន់ដា បាននាំនូវការផ្តាំផ្ញើសាកសួរសុខទុក្ខពីសម្តេចតេជោ ហ៊ុន សែន ប្រធានព្រឹទ្ធសភា សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ដែលជានិច្ចកាល ប្រមុខថ្នាក់ដឹកនាំ តែងតែគិតគូរ ខ្វល់ខ្វាយអំពីសុខទុក្ខរបស់គ្រួសារវីរកងទ័ព និងបងប្អូនប្រជាពលរដ្ឋភៀសសឹកទាំងអស់ ដោយមិនទុកឱ្យនរណាម្នាក់ រងទុក្ខលំបាកនោះឡើយ ៕
ចែករំលែកព័តមាននេះ