ហ្គ្រោអេនឡែន ៖ អ្នកនាំពាក្យសេតវិមានថ្លែង កាលពីថ្ងៃទី ៦ មករាថា ប្រធានាធិបតីអាមេរិក លោកដូណាល់ ត្រាំ បានសិក្សាលើជម្រើសជាច្រើន…
ហ្គ្រោអេនឡែន ៖ អ្នកនាំពាក្យសេតវិមានថ្លែង កាលពីថ្ងៃទី ៦ មករាថា ប្រធានាធិបតីអាមេរិក លោកដូណាល់ ត្រាំ បានសិក្សាលើជម្រើសជាច្រើន ដើម្បីដណ្ដើមយកកោះហ្គ្រោអេនឡែនរបស់ដាណឺម៉ាក ក្នុងនោះ រួមទាំងការប្រើកម្លាំងយោធាផង ។ ការលើកបែបនេះបង្កើនថែមទៀត ការព្រួយបារម្ភនៅអឺរ៉ុបលើវាសនានៃកោះនៅតំបន់អាក់ទិនជាដែនដីស្វយ័តរបស់ដាណឹម៉ាក់នោះ។
ក្នុងសេចក្ដីថ្លែងការណ៍មួយអ្នកនាំពាក្យរូបនោះ លោកស្រីការ៉ូលីន លីវីត ឲ្យដឹងទៀតថា លោកប្រធានាធិបតីឲ្យដឹងយ៉ាងច្បាស់ថា ការដណ្ដើមយកកោះហ្គ្រោអេនឡែន ជាអាទិភាពមួយសម្រាប់់សន្តិសុខជាតិអាមេរិក ហើយវាសំខាន់សម្រាប់ទប់បណ្ដាសត្រូវយើងនៅតំបន់អាក់ទិក ។
ប្រធានាធិបតីនិងក្រុមរបស់លោក កំពុងពិភាក្សាពីការជ្រើសរើសជាច្រើន ដើម្បីឲ្យសម្រេចទិសដៅដ៏សំខាន់នោះនៃនយោបាយការបរទេស ហើយពិតណាស់ការប្រើកម្លាំងយោធាអាមេរិកនៅតែជាការជ្រើសរើសមួយរបស់ប្រធានាធិបតី។
នាយករដ្ឋមន្ត្រីដាណឹម៉ាក លោកស្រី METTE FREDERIKSEN បានព្រមាន កាលពីថ្ងៃទី៥មករាថា រាល់ការប៉ុនប៉ងរបស់អាមេរិក ដើម្បីដណ្ដើមយកកោះហ្គ្រោអេនឡែនដោយកម្លាំង វានឹងបំផ្លាញទំនាក់ទំនងខាងសន្តិសុខអស់ពេល៨០ឆ្នាំំមកហើយរវាងប្រទេសទាំង២។
អន្តរាគមន៍យោធារបស់អាមេរិកនៅវេណេស៊ុយអេឡា នាំឲ្យមានការភ័យខ្លាចជាថ្មី ទាក់ទិននឹងបំណងលោកត្រាំដណ្ដើមយកដែនដីស្វយ័តនោះ ដែលសម្បូរដោយដីកម្រមិនទាន់ធ្វើអាជីវកម្ម។ ជាមួយការរលាយនៃទឹកកកតំបន់ប៉ូល ហ្គ្រោអេនឡែនអាចដើរតួនាទីយុទ្ធសាស្ត្រមួយ ដោយបើកផ្លូវសមុទ្រថ្មីៗ។
នាយករដ្ឋមន្ត្រីហ្ក្រោអេនឡែនលោកJENS FREDERIK NIELSENបានស្នើដល់លោកត្រាំឲ្យផ្លាស់ប្ដូរជំហរលោក ចំណែកប្រទេសអឹរ៉ុបជាច្រើននិងសហភាពអឹរ៉ុប បានប្រមូលគ្នាដោយរហ័ស ដើម្បីគាំទ្រដាណឹម៉ាក់ ដោយស្នើដល់អាមេរិកឲ្យឈប់គំរាមកំហែង សម្ព័ន្ធមិត្តមួយរបស់អូតង់។
នៅក្រុងកូប៉េនហាកលោកស្រីនាយករដ្ឋមន្ត្រីដាណឺម៉ាក់ថ្លែងទៅទៅកាន់ទូរទស្សន៍TV2ថា ប្រសិនបើអាមេរិក ជ្រើសរើសយកការវាយប្រហារខាងយោធា លើប្រទេសមួយជាសមាជិកអូតង់នោះអ្វីៗនឹងចប់ហើយ ក្នុងនោះរួមទាំងអូតង់និងសន្តិសុខដែលបង្កើតឡើងចាប់តាំងពីក្រោយសង្គ្រាមលោកលើកទី២មក ។
នាយករដ្ឋមន្ត្រីហ្គ្រោអេនឡែន ប្រឈមមុខនឹងការគំរាមកំហែងនេះ អះអាងតាមបណ្ដាញសង្គមថា យើងបើកចំហចំពោះការចរចាតែការចរចានោះត្រូវធ្វើតាមផ្លូវសមស្របនិងដោយគោរពបណ្ដាច្បាប់អន្តរជាតិ ។ ហ្គ្រោអេនឡែននិងរដ្ឋាភិបាលដាណឺម៉ាក់ អំពាវនាវឲ្យមានការចរចាដោយឆាប់រហ័ស ជាមួយរដ្ឋមន្ត្រីការបរទេសអាមេរិកលោកម៉ាកូរ៉ូប៊ីយ៉ូ ដោយសង្ឃឹមថា អាចលុបបំបាក់ការបកស្រាយខុសនានា។
ប្រធានាធិបតីបារាំងលោកអេមម៉ានុយអែលម៉ាក្រុងកាលពីថ្ងៃទី៦ មករា និយាយថា មិននឹកស្មានដល់សោះដែលសហរដ្ឋអាមេរិករំលោភបំពានអធិបតេយ្យភាពដាណឺម៉ាក ៕
ចែករំលែកព័តមាននេះ