ទីក្រុងបូហ្គោតា៖ កាលពីយប់មិញ លោកដូណាល់ត្រាំ និងប្រធានាធិបតីកូឡុំប៊ី លោកហ្គូស្តាវ៉ូ ប៉េត្រូ (Gustavo Petro) បានសន្ទនាគ្នាតាមទូរស័ព្ទដោយផ្ដោតសំខាន់ទៅលើបញ្ហាទំនាក់ទំនងរវាងប្រទេសទាំង២។ ការសន្ទនាគ្នានេះធ្វើឡើងនៅពេលប្រទេសទាំងពីរកំពុងមានទំនាក់ទំនងតានតឹងនឹងគ្នាក្រោយពេលយោធាអាមេរិកវាយប្រហារប្រទេសវេណេហ្ស៊ូអេឡា…
ទីក្រុងបូហ្គោតា៖ កាលពីយប់មិញ លោកដូណាល់ត្រាំ និងប្រធានាធិបតីកូឡុំប៊ី លោកហ្គូស្តាវ៉ូ ប៉េត្រូ (Gustavo Petro) បានសន្ទនាគ្នាតាមទូរស័ព្ទដោយផ្ដោតសំខាន់ទៅលើបញ្ហាទំនាក់ទំនងរវាងប្រទេសទាំង២។ ការសន្ទនាគ្នានេះធ្វើឡើងនៅពេលប្រទេសទាំងពីរកំពុងមានទំនាក់ទំនងតានតឹងនឹងគ្នាក្រោយពេលយោធាអាមេរិកវាយប្រហារប្រទេសវេណេហ្ស៊ូអេឡា និងផ្ដួលរំលំលោកម៉ាឌូរ៉ូពីអំណាច។ កាលពីប៉ុន្មានថ្ងៃមុន អ្នកសារព័ត៌មានសួរលោកត្រាំថាតើលោកមានផែនការវាយប្រហារប្រទេសកូឡុំប៊ីទៀត ឬយ៉ាងណា លោកត្រាំឆ្លើយតបថាលោកអាចនឹងធ្វើរឿងនេះ។
ក្រោយការសន្ទនាគ្នានោះ លោកត្រាំបានបង្ហោះសារនៅលើបណ្ដាញសង្គមថាលោកមានមហាកិត្តិយសណាស់ដែលបានសន្ទនាគ្នាជាមួយប្រធានាធិបតីកូឡុំប៊ី លោកហ្គូស្តាវ៉ូ ប៉េត្រូ ដែលបានពន្យល់អំពីស្ថានការណ៍គ្រឿងញៀន និងការខ្វែងគំនិតគ្នារវាងលោក និងលោកប៉េត្រូកាលពីពេលថ្មីៗនេះ។ លោកកោតសរសើរចំពោះការហៅទូរស័ព្ទ និងការប្រើប្រាស់ភាសានៅក្នុងការសន្ទនាគ្នា។ លោកសង្ឃឹមថានឹងជួបគ្នានៅក្នុងពេលដ៏ខ្លីខាងមុខនេះ។
លោកត្រាំសរសេររៀបរាប់បន្តទៀតថាក្រុមការងារកំពុងរៀបចំគម្រោងជួបគ្នារវាងលោក និងលោកប៉េត្រូវនៅទីក្រុងវ៉ាស៊ីនតោន។ ប៉ុន្តែលោកមិនបានបញ្ជាក់ឱ្យបានច្បាស់ថាតើការជួបគ្នាអាចនឹងកើតឡើងនៅពេលណាទេ។ នៅរដ្ឋធានីបូហ្គោតា លោកប៉េត្រូថ្លែងប្រាប់ក្រុមអ្នកគាំទ្រថាលោក និងលោកត្រាំសន្ទនាគ្នាតាមទូរស័ព្ទលើកនេះជាករណីដំបូងបំផុតចាប់តាំងពីលោកឡើងកាន់អំណាចជាប្រធានាធិបតី។ លោកប៉េត្រូបញ្ជាក់ថារូបលោកជាអ្នកបោះដៃទៅរកលោកត្រាំមុនដើម្បីចាប់ផ្ដើមសន្ទនាគ្នា។
ប្រភពពីខុទ្ទកាល័យរបស់លោកប៉េត្រូប្រាប់ថាការសន្ទនាគ្នានោះធ្វើឡើងដោយភាពស្និទ្ធស្នាលដូចបងដូចប្អូន និងប្រកបដោយការគោរពគ្នាទៅវិញទៅមក។ ទំនាក់ទំនងរវាងលោកទាំង២មិនសូវល្អនឹងគ្នាទេចាប់តាំងពីលោកត្រាំឡើងកាន់អំណាចនៅអាណត្តិទី២។ លោកត្រាំតែងតែចោទប្រកាន់ថារដ្ឋាភិបាលរបស់លោកប៉េត្រូនាំគ្រឿងញៀនកូកាអ៊ីនចូលប្រទេសអាមេរិក។ កាលពីថ្ងៃអាទិត្យ លោកចាត់ទុកថាកូឡុំប៊ីដឹកនាំដោយ «បុរសអ្នកជំងឺ»។ លោកចង់សំដៅលើលោកប៉េត្រូ។ នេះបើយោងតាមការផ្សាយរបស់រ៉យទ័រ និងប្រភពដទៃទៀត៕
ចែករំលែកព័តមាននេះ