រាជធានីភ្នំពេញ ៖ ជនសង្ស័យ២នាក់ សុទ្ធតែជាអ្នកប្រើប្រាស់ និងជួញដូរគ្រឿងញៀន ហើយសុទ្ធតែធ្លាប់ជាប់គុកថែមទៀតផង ពេលចេញមកវិញ មិនបានកែខ្លួនធ្វើជាមនុស្សត្រឹមត្រូវនៅក្នុងសង្គមនោះទេ បែរជារួមដៃគ្នា បន្តអាជីពធ្វើជាចោរ។…
រាជធានីភ្នំពេញ ៖ ជនសង្ស័យ២នាក់ សុទ្ធតែជាអ្នកប្រើប្រាស់ និងជួញដូរគ្រឿងញៀន ហើយសុទ្ធតែធ្លាប់ជាប់គុកថែមទៀតផង ពេលចេញមកវិញ មិនបានកែខ្លួនធ្វើជាមនុស្សត្រឹមត្រូវនៅក្នុងសង្គមនោះទេ បែរជារួមដៃគ្នា បន្តអាជីពធ្វើជាចោរ។ បន្ទាប់មក ផ្លោះរបងរោងចក្រចូលទៅគាស់បន្ទប់ជនជាតិចិនស្នាក់នៅ លួចបានទូរសព្ទ iPhone ២គ្រឿង ប៉ុន្តែគេចខ្លួនបាន ១ថ្ងៃ ប៉ុណ្ណោះ ក៏ត្រូវនគរបាលប៉ុស្តិ៍ចោមចៅទី៣ ធ្វើការស្រាវជ្រាវរហូតឈានដល់ការឃាត់ខ្លួនបានទាំង២នាក់ ។
ហេតុការណ៍ខាងលើនោះ បានកើតឡើងកាលពីវេលាម៉ោង០៣និង៤០នាទីទៀបភ្លឺថ្ងៃទី០២ ខែមករា ឆ្នាំ២០២៦ នៅក្នុងរោងចក្រកាត់ដេរសម្លៀកបំពាក់ QMI ស្ថិតនៅក្នុងភូមិត្រពាំងពោធិ៍ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
នគរបាលប្រាប់ឲ្យដឹងថា ជនសង្ស័យទាំង០២នាក់ខាងលើ ម្នាក់ឈ្មោះ ទ្រី ចន្នី អាយុ២៩ឆ្នាំ ជនជាតិខ្មែរ មានទីលំនៅ មិនពិតប្រាកដ ជននេះបានប្រើប្រាស់គ្រឿងញៀនតាំងពីឆ្នាំ២០១៧ រហូតមកដល់បច្ចុប្បន្ន ហើយធ្លាប់ជាប់ពន្ធធនាគារព្រៃស (ម១) រយៈពេល០២ឆ្នាំ ពីបទជួញដូរគ្រឿងញៀន នៅក្នុងឆ្នាំ២០១៧ ។ ម្នាក់ទៀតឈ្មោះ ជ្រុន ភាស់ អាយុ ៣៤ឆ្នាំ ជនជាតិខ្មែរ មានទីលំនៅភូមិត្រពាំងពោធិ៍ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។ ជននេះបានប្រើប្រាស់គ្រឿងញៀន តាំងពីឆ្នាំ២០១៩ រហូតមកដល់បច្ចុប្បន្ន ហើយធ្លាប់ជាប់ពន្ធធនាគារព្រៃស (ម១) រយៈពេល១០ខែ ពីបទប្រើប្រាស់គ្រឿងញៀន នៅក្នុងឆ្នាំ២០២២ ។
នគរបាលប្រាប់ឲ្យដឹងបន្តថា ក្រោយពេលឃាត់ខ្លួនជនសង្ស័យខាងលើ នគរបាលដកហូតបានទូរសព្ទម៉ាក iPhone 15pro max ពណ៌ស ស៊ីមកាតលេខមួយ ។ ទូរសព្ទម៉ាក iPhone 14pro max ពណ៌ខ្មៅ ស៊ីមកាតលេខមួយ ប្រគល់ជូនជនរងគ្រោះវិញ ។ ក្រៅពីនេះ ក៏ដកហូតទូរសព្ទម៉ាក iPhone 8plus ពណ៌ទឹកមាស ស៊ីមកាតលេខមួយ និងម្សៅក្រាមសថ្លាសង្ស័យជាគ្រឿងញៀន ចំនួន០៨កញ្ចប់ថង់ផងដែរ ។
នគរបាលបានប្រាប់បន្តថា ចំណែកជនរងគ្រោះឈ្មោះឈ្មោះ WANG CHUN CHIEH ភេទប្រុស អាយុ៤១ឆ្នាំ ជនជាតិចិន ស្នាក់នៅក្នុង រោងចក្រ QMI ស្ថិតនៅភូមិត្រពាំងពោធិ៍ សង្កាត់ចោមចៅទី៣ ខណ្ឌពោធិ៍សែនជ័យ ។ នៅវេលាម៉ោង០៣និង៤០នាទីជិតភ្លឺ ថ្ងៃទី០២ ខែ មករា ឆ្នាំ២០២៦ ជនរងគ្រោះបានសម្រាកនៅក្នុងបន្ទប់ នៅក្នុងរោងចក្រ QMI ហើយបានទុកទូរសព្ទម៉ាក iPhone 15pro max និងម៉ាក iPhone 14pro max នៅលើតុក្បាលគ្រែ។ ខណៈកំពុងលង់លក់ក្នុងដំណេកជនសង្ស័យទាំង០២នាក់ខាងលើ បានធ្វើសកម្មភាពផ្លោះរបងរោងចក្រចូលទៅគាស់បង្អួចបន្ទប់លួចយកទូរសព្ទខាងលើបានសម្រេចរួចហើយគេចខ្លួនបាត់ដោយសុវត្ថិភាពតែម្តង។
នគរបាលបានបញ្ជាក់ប្រាប់បន្ថែមទៀតថា ក្រោយភ្ញាក់ពីដំណេកដឹងថា បាត់ទូរសព្ទជនរងគ្រោះ ក៏បានទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលចោមចៅទី៣ ហើយនគរបាល ក៏បានធ្វើការស្រាវជ្រាវរហូតកំណត់បានមុខសញ្ញាជនសង្ស័យ ។
បន្ទាប់មកនៅវេលាម៉ោង០៩និង៥០នាទីព្រឹកថ្ងៃទី០៣ ខែមករា ឆ្នាំ២០២៦ ក៏ចុះទៅធ្វើការឃាត់ខ្លួនឈ្មោះ ជ្រុន ភាស់ នៅតាមផ្លូវបេតុង ភូមិជម្ពូវ័ន២ សង្កាត់ចោមចៅទី៣ ខណ្ឌពោធិ៍សែនជ័យ ។ បន្ទាប់មកទៀតនៅវេលាម៉ោង១១និង៣០នាទីព្រឹកថ្ងៃខែឆ្នាំដដែល បានឈានទៅឃាត់ខ្លួនឈ្មោះ ទ្រី ចន្នី ម្នាក់ទៀត នៅចំណុចភូមិព្រៃព្រីងខាងជើង២ សង្កាត់ចោមចៅទី៣ ខណ្ឌពោធិ៍សែនជ័យ និងដកហូតបានវត្ថុតាងខាងលើរួចហើយនាំយកទៅប៉ុស្តិ៍ ដើម្បីធ្វើការសាកសួរ និងកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ចាត់ការតាមច្បាប់ ៕
ចែករំលែកព័តមាននេះ