ខេត្តត្បូងឃ្មុំ ៖ ក្រោមការយកចិត្តទុកដាក់ពីសំណាក់កម្លាំងសមត្ថកិច្ចគ្រប់លំដាប់ថ្នាក់ បានធ្វើការស្រាវជ្រាវលើករណីឃាតកម្មសម្លាប់ជនជាតិចិនម្នាក់ ដោយដឹកតាមរថយន្តយកទៅទម្លាក់ចោលក្នុងចំការកៅស៊ូក្រុមហ៊ុនស្រុកមេមត់ នៅឃុំត្រមូង ស្រុកមេមត់ ដោយមានកិច្ចសហការល្អរវាងកម្លាំងស្នងការដ្ឋាននគរបាលខេត្ត ជាមួយកម្លាំងនាយកដ្ឋានព្រហ្មទណ្ឌក្រសួងមហាផ្ទៃ ទីបំផុត បានស្រាវជ្រាវស្គាល់ជនសង្ស័យចំនួន៥នាក់ ដែលពាក់ព័ន្ធក្នុងអំពើឃាតកម្មនេះ ។
សមត្ថកិច្ច បានឲ្យដឹងនាងល្ងាចថ្ងៃទី ៣ខែមករា ឆ្នាំ២០២៦នេះថា ករណីប្រទះឃើញសាកសពមនុស្សស្លាប់ នៅក្នុងចម្ការកៅស៊ូក្រុមហ៊ុនមេមត់ កាលពីថ្ងៃទី១ ខែមករា ឆ្នាំ២០២៦ វេលាម៉ោង២និង១០នាទី កម្លាំងជំនាញ នៃស្នងការដ្ឋាននគរបាលខេត្តត្បូងឃ្មុំ បានទទួលព័ត៌មានពីលោកនាយប៉ុស្តិ៍នគរបាលរដ្ឋបាលត្រមូង រាយការណ៏មកថា ប្រជាពលរដ្ឋបានប្រទះឃើញសាកសព ភេទប្រុស ស្លាប់នៅក្នុងចម្ការកៅស៊ូក្រុមហ៊ុនមេមត់ ស្ថិតនៅចំណុច ក្រុមហ៊ុនចម្ការកៅស៊ូមេមត់ ស្ថិតនៅភូមិដូងទី២ ឃុំត្រមូង ស្រុកមេមត់ ខេត្តត្បូងឃ្មុំ ។
បន្ទាប់ពីទទួលបានព័ត៌មានភ្លាម កម្លាំងជំនាញ នៃស្នងការដ្ឋាននគរបាលខេត្តត្បូងឃ្មុំ សហការជាមួយកម្លាំងជំនាញ នៃនាយកដ្ឋាននគរបាលព្រហ្មទណ្ឌ កម្លាំងជំនាញ នៃអធិការដ្ឋាននគរបាលស្រុកមេមត់ និងលោកគ្រូពេទ្យកោសល្យវិច័យ នៃមន្ទីរពេទ្យបង្អែកស្រុកមេមត់ និងមានការដឹកនាំសម្របសម្រួលនីតិវិធីដោយលោក រ៉ា បូរ៉ាន់ឌី ព្រះរាជអាជ្ញារង នៃអយ្យកាអមសាលាដំបូងខេត្តត្បូងឃ្មុំ បានចុះទៅដល់កន្លែងកើតហេតុ ធ្វើការស្រាវជ្រាវ និងពិនិត្យសាកសព តាមនីតិវិធី ។
សាកសពមនុស្សប្រុសម្នាក់ (ស្លាប់) ស្លៀកខោសាច់ក្រណាត់ជើងវែង ពណ៌ខ្មៅ ពាក់អាវសាច់ក្រណាត់យឺតដៃខ្លី ពណ៌ស ដោយយកស្លឹកកៅស៊ូក្របពីលើសាកសព និងស្នាមរបួសរួមមាន ៖
-ផ្នែកក្បាល (មានស្នាមបែក) ផ្ទៃមុខមានស្នាមរលាកស្បែក
-ផ្នែក ក មានស្នាមជាំ
-ផ្នែកលើដងខ្លួនមានស្នាមជាំពេញរាងកាយដោយការធ្វើទារុណកម្ម។
-ផ្នែកអវៈយវៈ មានស្នាមជាំពេញ(ដៃជើង) ។
ផ្អែកតាមការបំភ្លឺរបស់ឈ្មោះ ផាន សុភា ភេទប្រុស អាយុ៤៥ឆ្នាំ ជាតិខ្មែរ (ជាកម្មករជៀរជ័រ) និងផ្អែកតាមការបំភ្លឺរបស់ឈ្មោះ រស់ រុង ភេទប្រុស អាយុ២៥ឆ្នាំ (ជាកម្មករជៀរជ័រ) បានបំភ្លឺប្រាប់សមត្ថកិច្ចអោយដឹងថា នៅថ្ងៃទី០១ មករា ២០២៦ វេលាម៉ោងប្រហែល០០ និង២០នាទី ឈ្មោះផាន សុភា បានជិះម៉ូតូម្នាក់ទៅជៀរជ័រកៅស៊ូ នៅក្រុមហ៊ុនចម្ការកៅស៊ូមេមត់ ស្ថិតនៅភូមិដូងទី២ ឃុំត្រមូង ស្រុកមេមត់ បន្ទាប់មកស្រាប់តែឃើញមានរថយន្តទំនើប មិនស្គាល់ម៉ាក ពណ៌ស បានបើកចូលក្នុងព្រៃចម្ការកៅស៊ូក្រុមហ៊ុនមេមត់ ក្បែរខ្លួនជៀរជ័រ រួចក៏ជិះចេញទៅវិញ។ បន្ទាប់មក ឈ្មោះ រស់ រុង បានឃើញ ក៏ជិះម៉ូតូទៅមើល ឃើញជើងមនុស្សដេកស្លាប់ មានគ្រប់ស្លឹកកៅស៊ូ ភ័យក៏ជិះម៉ូតូហើយស្រែកហៅកម្មករផ្សេងទៀត និងឈ្មោះ ផាន សុភា នាំគ្នាមកមើលរួចរាយការណ៍ប្រាប់ប្រធានក្រុមឆ្មាំ និងលោកមេភូមិដួងទី២ តែម្តង ។
ផ្អែកតាមការកោសល្យវិច័យលើសាកសពជនរងគ្រោះ តាមការបំភ្លឺរបស់សាក្សី និងការសន្និដ្ឋានរបស់លោកគ្រូពេទ្យជំនាញ ជនរងគ្រោះស្លាប់ដោយសាររងរបួសធ្ងន់ធ្ងរពីការធ្វើទារុណកម្ម បណ្តាលឲ្យស្លាប់ (ករណីឃាតកម្ម) ។
លុះវេលាម៉ោង០៨ និង២០នាទី ថ្ងៃដដែល កម្លាំងជំនាញបានទទួលព័ត៌មានពីប៉ុស្តិ៍នគរបាលរដ្ឋបាលដារ រាយការណ៏មកថា ប្រទះឃើញមានរថយន្ត ០១គ្រឿង ម៉ាកឡង់គ្រីស័រ ពណ៌ស (គ្មានស្លាកលេខ) យកទៅប្លុងចោល នៅចំណុចក្នុងព្រៃ ស្ថិតនៅភូមិសាឡង់១ ឃុំដារ ស្រុកមេមត់ ខេត្តត្បូងឃ្មុំ ។
កម្លាំងជំនាញបាចុះត្រួតពិនិត្យ លើរថយន្ត ពិតជាមានការពាក់ព័ន្ធករណីសឹកសាកសពយកទៅទម្លាក់ចោលនៅទីតាំងខាងលើ។ បន្ទាប់ពីពិនិត្យលើរថយន្តរួច កម្លាំងជំនាញបានស្ទួចយកទៅរក្សាទុកនៅអធិការដ្ឋាននគរបាលស្រុកមេមត់ ដើម្បីធ្វើការស្រាវជ្រាវ ។
អត្តសញ្ញាណជនរងគ្រោះចំនួន៧នាក់ មានឈ្មោះដូចខាងក្រោម ៖
១.ឈ្មោះ PAN ZHIWEI (ហៅ XIAO YANG) ភេទប្រុស អាយុ៣០ឆ្នាំ ជនជាតិចិន (ស្លាប់) ដឹកយកទៅកប់ចោលនៅរងចំការកៅស៊ូក្រុមហ៊ុនមេមត់
២.ឈ្មោះ Gao Ruo ភេទប្រុស អាយុ២៧ឆ្នាំ ជនជាតិចិន (រងរបួស)
៣.ឈ្មោះ Han Run Jun ភេទប្រុស អាយុ១៨ឆ្នាំ ជនជាតិចិន (រងរបួស)
៤.ឈ្មោះ Xie Wang ភេទប្រុស អាយុ២១ឆ្នាំ ជនជាតិចិន (រងរបួស)
៥.ឈ្មោះ Zhou Kaiying ភេទប្រុស អាយុ២៨ឆ្នាំ ជនជាតិចិន (រងរបួស)
៦.ឈ្មោះ Chang Yuhao ភេទប្រុស អាយុ២២ឆ្នាំ ជនជាតិចិន (រងរបួស)
៧.ឈ្មោះ Liu Liang ភេទប្រុស អាយុ៣៥ឆ្នាំ ជនជាតិចិន (រងរបួស) នៅទីតាំងសួនឧស្សាហកម្មផ្លូវលេខ៧២ ស្ថិតនៅភូមិព្រះផ្តៅ ឃុំត្រពាំងផ្លុង ស្រុកពញាក្រែក ខេត្តត្បូងឃ្មុំ ។
ជាមួយនោះ តាមរយៈការសួរនាំពីជនរងគ្រោះ ធ្វើឲ្យសមត្ថកិច្ចកំណត់អត្តសញ្ញាណជនសង្ស័យទាំង៥នាក់ និងបក្ខពួកមានឈ្មោះដូចខាងក្រោម ៖
១.ឈ្មោះ UPENDRA BUDHATHONI ភេទប្រុស អាយុ៤០ឆ្នាំ ជនជាតិនេប៉ាល់ ឃាត់ខ្លួននៅស្នងការដ្ឋាននគរបាលខេត្តត្បូងឃ្មុំ។
២.ឈ្មោះ GJANKAJA SRETHA អាយុ៤០ឆ្នាំ ជនជាតិនេប៉ាល់ (ឃាត់ខ្លួននៅកងរាជអាវុធហត្ថខេត្តត្បូងឃ្មុំ)
៣.ឈ្មោះ BASNET OMKAR ភេទប្រុស អាយុ៣៥ឆ្នាំ (ឃាត់ខ្លួននៅកងរាជអាវុធហត្ថខេត្តត្បូងឃ្មុំ)
៤.ឈ្មោះ HEMRAJ SHREDTHA ភេទប្រុស អាយុ៣៣ឆ្នាំ ជនជាតិនេប៉ាល់ (ឃាត់ខ្លួននៅកងរាជអាវុធហត្ថខេត្តត្បូឃ្មុំ)
៥.ឈ្មោះ ZHENG BAOJIA ភេទប្រុស អាយុ២៥ឆ្នាំ ជនជាតិចិន (ឃាត់ខ្លួននៅកងរាជអាវុធហត្ថខេត្តត្បូងឃ្មុំ) ។
សាកសពជនរងគ្រោះការិយាល័យបច្ចេកខេត្ត បានដឹកយកទៅនាយកដ្ឋាននគរបាលបច្ចេកទេស អគ្គស្នងការដ្ឋាននគរបាលជាតិបន្តនីតិវិធី។ ចំពោះជនជាតិចិន៦នាក់ ជាជនងគ្រោះ ប្រគល់ទៅការិយាល័យអនុវត្តបន្តតាមនិតិវិធី ៕
«សម្លាប់មនុស្សដឹកតាមរថយន្តយកប្លុងចោលក្នុងចំការកៅស៊ូ សមត្ថកិច្ចកំណត់អត្តសញ្ញាណបានហើយ កំពុងតាមចាប់ខ្លួនក្រុមជនសង្ស័យ»
ចែករំលែកព័តមាននេះ