ស្រាវជ្រាវ ៖ តាមប្រភពពីភ្នាក់ងារព័ត៌មានបរទេសដែលបានចុះផ្សាយដោយយោងតាមលទ្ធផលអង្កេតចុងក្រោយរបស់សមាគមដឹកជញ្ជូនផ្លូវអាកាសអន្តរជាតិ (IATA) បង្ហាញឱ្យដឹងថា ការធ្វើដំណើរតាមយន្តហោះក្នុងឆ្នាំ២០១០ មានស្ថិតិកើតឧប្បត្តិហេតុទាបបំផុតជាប្រវត្តិសាស្ត្រក្នុងមជ្ឈដ្ឋានការហោះហើរ ។
នៅក្នុងរបាយការណ៍បង្ហាញថា IATA ដែលមានស្នាក់ការធំនៅទីក្រុងម៉ុងត្រេអាល ប្រទេសកាណាដា បានបង្ហើបឱ្យដឹងពីលទ្ធផលអង្កេតចុងក្រោយថា អត្រានៃការកើតឧប្បត្តិហេតុរបស់យន្តហោះដឹកអ្នកដំណើរនៅទូទាំងពិភពលោកកាលពីឆ្នាំមុន មានចំនួនទាបបំផុតជាប្រវត្តិសាស្ត្រ ។ ក្នុងនោះមានឧប្បត្តិេហតុធ្ងន់ធ្ងរត្រឹមតែ១៧ករណីពីចំនួនជើងហោះហើរសរុបជាង៣៦,៨លានជើងហោះហើរនៅទូទាំងពិភពលោកក្នុងឆ្នាំ២០១០ ឬបើគិតពីឱកាសនៃការកើតឧប្បត្តិហេតុ គឺ១លើកក្នុងចំនួនជើងហោះហើរ១,៦លានជើងហោះហើរ ។ ចាត់ទុកថា ជាស្ថិតិកើតឧប្បត្តិហេតុធ្លាក់ចុះកាលពី១០ឆ្នាំមុនដល់ទៅ៤២% ទោះបីជាតួលេខខាងលើជាការគណនាចំពោះយន្តហោះដែលផលិតនៅសហរដ្ឋអាមេរិក និងប្រទេសនៅអឺរ៉ុបខាងលិចក៏ដោយ ខណៈពេលតួលេខអ្នកធ្វើដំណើរតាមយន្តហោះនៅទូទាំងពិភពលោកក្នុងឆ្នាំ២០១០ មានចំនួនច្រើនដល់ទៅ២.៤០០លាននាក់ ។
ទោះបីជាចំនួនឧប្បត្តិហេតុគ្រោះថ្នាក់ដែលកើតឡើងពីការធ្វើដំណើរតាមផ្លូវអាកាសក្នុងឆ្នាំ២០១០ មានការធ្លាក់ចុះក៏ដោយ ប៉ុន្តែលទ្ធផលអង្កេតបែរជាប្រទះឃើញថា ចំនួនអ្នកស្លាប់ពីការធ្វើដំណើរតាមយន្តហោះកាលពីឆ្នាំមុន (២០១០) មានដល់ទៅ៧៨៦នាក់ គឺជាតួលេខកើនលើសពីឆ្នាំ២០០៩ ដល់ទៅ១០១នាក់ ។ IATA បង្ហើបឱ្យដឹងទៀតថា ឧប្បត្តិហេតុតាមផ្លូវអាកាសភាគច្រើនកើតឡើងនៅទ្វីបអាហ្វ្រិក ដោយមានផលចំណែកច្រើនដល់ទៅ២៣% នៃឧប្បត្តិហេតុតាមផ្លូវអាកាសនៅលើសាកលលោក ខណៈពេលនៅអាហ្វ្រិកមានអត្រាចំណែកហោះហើរនៅក្នុងទីផ្សារពិភពលោកត្រឹមតែ២%ប៉ុណ្ណោះ ៕
ចែករំលែកព័តមាននេះ