ទីក្រុងម៉ូស្គូ៖ លោកពូទីនថ្លែងថាអ៊ុយក្រែនហាក់ដូចជាមិនប្រញាប់ប្រញាល់ចង់បានសន្តិភាពឆាប់ៗពេកទេ។ បើសិនអ៊ុយក្រែនមិនចង់ដោះស្រាយជម្លោះនេះដោយសន្តិវិធីទេ លោកថារុស្ស៊ីនឹងសម្រេចគោលដៅរបស់ខ្លួនដោយកម្លាំងយោធាក៏បានដែរ។ ការថ្លែងរបស់លោកពូទីនដូចខាងលើនេះត្រូវបានផ្សព្វផ្សាយដោយទីភ្នាក់ងារព័ត៌មានតាស់ (TASS) ក្រោយការវាយប្រហារដោយដ្រូន និងមីស៊ីលរបស់រុស្ស៊ីយ៉ាងច្រើនសម្បើមទៅលើអ៊ុយក្រែន។
លោកហ្សេឡិនស្គីថ្លែងថារុស្ស៊ីទៅវិញទេដែលចង់ធ្វើសង្គ្រាមជាបន្តទៀត ចំណែកអ៊ុយក្រែនប្រាថ្នាចង់បានសន្តិភាពជានិច្ច។ តាមគម្រោងនៅយប់នេះ លោកហ្សេឡិនស្គី និងលោកត្រាំនឹងជួបគ្នានៅរមណីយដ្ឋាលំហែកាយរដ្ឋផ្លរីដាដើម្បីពិនិត្យមើលផែនការសន្តិភាពម្ភៃចំណុច។ ពាក់ព័ន្ធនឹងការលើកឡើងរបស់លោកពូទីនដូចខាងលើនេះ សេតវិមានមិនបានធ្វើអត្ថាធិប្បាយទេ។
មេបញ្ជាការកងទ័ពរុស្ស៊ីជម្រាបជូនលោកពូទីននៅពេលលោកចុះពិនិត្យមើលសភាពការណ៍ថាកងទ័ពរុស្ស៊ីទើបតែដណ្ដើមយកបានទីក្រុងចំនួនបីទៀតគឺមៀណូរ៉ាត (Myrnohrad), រ៉ូឌីនស្គី (Rodynske) និងអាតេមីវកា (Artemivka) នៅតំបន់ដុនបាស់។ នៅតំបន់ហ្សាប៉ូរីហ្សៀ កងទ័ពរុស្ស៊ីវាយយកបានហាល់លីយេប៉ូល (Huliaipole) និងស្តិបណូហៀស (Stepnohirsk)។ នេះបើយោងការបង្ហោះសាររបស់វិមានក្រឹមឡាំងនៅលើតេឡេក្រាម។
ទោះជាមានការអះអាងបែបនេះក្ដី យោធាអ៊ុយក្រែនចេញមុខបដិសេធត្រង់ចំណុចដែលថារុស្ស៊ីវាយយកបានហ៊ូលីយេប៉ូល និងមៀណូរ៉ាត។ អ៊ុយក្រែនថានោះជាសេចក្ដីថ្លែងការណ៍ខុសពីការពិត។ យោធាអ៊ុយក្រែនទទួលស្គាល់ថាស្ថានការណ៍សឹកនៅទីតាំងទាំង២នេះពោរពេញដោយភាពតានតឹង និងប្រយុទ្ធគ្នាស៊ីសាច់ហុតឈាមពិតមែន។ ប៉ុន្តែខ្លួននៅតែមិនទាន់ដកកម្លាំងថយនៅឡើយទេ។ ការប្រយុទ្ធគ្នានៅតែបន្ត។ នេះបើតាមសេចក្ដីថ្លែងការណ៍របស់អគ្គសេនាធិការដ្ឋានកងទ័ពអ៊ុយក្រែននៅលើបណ្ដាញសង្គម។
ដោយឡែក បញ្ជាការដ្ឋានកងទ័ពអ៊ុយក្រែននៅតំបន់ភាគខាងត្បូងបង្ហោះសារនៅលើតេឡេក្រាមថាការប្រយុទ្ធគ្នាដ៏ខ្លាំងក្លាបន្តកើតមាននៅហ៊ូលីយ៉ាប៉ូល។ កងទ័ពអ៊ុយក្រែននៅបន្តកាន់កាប់ទឹកដីច្រើនគួរសមដែរនៅទីនោះ។ ទោះបីភាគីទាំង២អះអាងបែបណាក្ដី ប្រភពខាងក្រៅមិនអាចផ្ទៀងផ្ទាត់ការពិតបានឡើយព្រោះភាគីទាំង២មិនអនុញ្ញាតឱ្យអ្នកសារព័ត៌មានចូលទីតាំងរបស់ពួកគេទេ។ នេះបើយោងតាមការផ្សាយរ៉យទ័រ និងប្រភពដទៃទៀត៕
ចែករំលែកព័តមាននេះ