ទីក្រុងតេអេរ៉ង់៖ អ៊ីរ៉ង់រឹបអូសនាវាដឹកប្រេងរបស់បរទេសមួយគ្រឿងដែលបើកកាត់ច្រកសមុទ្រហ័រមូស (Hormuz)។ នេះបើយោងតាមការផ្សាយរបស់សារព័ត៌មានរដ្ឋអ៊ីរ៉ង់។ នៅពេលកងទ័ពជើងទឹកនៃឆ្មាំបដិវត្តអ៊ីរ៉ង់ចុះចាប់នោះ នាវានោះដឹកប្រេង៤លានលីត្រ ឬស្មើនឹង២,៥ម៉ឺនបារ៉ែល។ អាជ្ញាធរអ៊ីរ៉ង់ថ្លែងថានៅពេលចុះចាប់កប៉ាល់ដឹកប្រេងនោះ ជនជាតិបរទេស១៦នាក់ក៏ត្រូវបានចាប់ខ្លួនផងដែរ។
អ៊ីរ៉ង់អះអាងថាការចុះចាប់កប៉ាល់ដឹកប្រេងរត់ពន្ធលើកនេះជាការទះមួយកំផ្លៀងយ៉ាងដំណំទៅលើពួកឈ្មួញខិលខូច។ ប៉ុន្តែអ៊ីរ៉ង់មិនបានបញ្ជាក់ថាតើបុគ្គលិកនៅលើនាវានោះមានជនជាតិអ្វីខ្លះទេ ហើយក៏មិនបានបញ្ជាក់ថានាវានោះដោតទង់ជាតិអ្វីដែរ។ កាលពីពេលកន្លងមក អ៊ីរ៉ង់ក៏ធ្លាប់ចាប់នាវាដឹកប្រេងជាហូរហែនៅក្នុងតំបន់ដោយប្រើប្រាស់ការចោទប្រកាន់ស្រដៀងៗគ្នា។
កាលពីខែវិច្ឆិកា ឆ្នាំ២០២៥ អ៊ីរ៉ង់ចាប់នាវាមួយគ្រឿងដែលបើកកាត់ច្រកសមុទ្រហ័រមូសក្រោមការចោទប្រកាន់ថានាវានេះបានប្រព្រឹត្តល្មើសច្រើនករណីរួមទាំងការដឹកទំនិញខុសច្បាប់ផងដែរ។ ក្រុមបស្ចិមប្រទេសបានដាក់ការស្ដីបន្ទោសថាអ៊ីរ៉ង់ជាអ្នកបង្កភាពរងគ្រោះចំពោះនាវាដឹកប្រេងជាច្រើនគ្រឿងកាលពីឆ្នាំ២០១៩ និងវាយប្រហារដោយដ្រូនទៅលើនាវាដឹកប្រេងដែលមានទំនាក់ទំនងជាមួយអ៊ីស្រាអែលបណ្ដាលឱ្យស្លាប់បុគ្គលិកដែលជាពួកអឺរ៉ុប២នាក់កាលពីឆ្នាំ២០២១។
ការវាយប្រហារទាំងនេះកើតឡើងបន្ទាប់ពីលោកដូណាល់ត្រាំកាលពីអាណត្តិទីមួយបានដកខ្លួនជាឯកតោភាគីចេញពីកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ២០១៥។ ក្រោយមកនៅខែមេសា ឆ្នាំ២០២៤ អ៊ីរ៉ង់ចាប់កប៉ាល់ដឹកទំនិញមួយគ្រឿងដែលដោតទង់ជាតិព័រទុយហ្កាល់។ ចាប់តាំងពីមានភាពតានតឹងរវាងអ៊ីរ៉ង់ និងបស្ចិមប្រទេស និងក្រោយការផ្ទុះសង្គ្រាមនៅហ្កាហ្សា អ៊ីរ៉ង់ និងអ៊ីស្រាអែលបានប្រយុទ្ធគ្នារយៈពេល១២ថ្ងៃ។
សង្គ្រាមនេះកើតឡើងបន្ទាប់ពីអ៊ីស្រាអែលបាញ់មីស៊ីលសម្លាប់មេបញ្ជាការជាន់ខ្ពស់ និងអ្នកវិទ្យាសាស្ត្រអ៊ីរ៉ង់។ ជាការឆ្លើយតប អ៊ីរ៉ង់បាញ់មីស៊ីលចូលអ៊ីស្រាអែលសម្លាប់មនុស្ស២៨នាក់។ អ៊ីរ៉ង់តែងតែគំរាមកំហែងបិទច្រកសមុទ្រហ័រមូសដែលជាច្រកតូចចង្អៀតនៅឈូងសមុទ្រពែក្ស។ កងទ័ពជើងទឹករបស់អាមេរិកក៏ឧស្សាហ៍បើកល្បាតកាត់ទីនោះផងដែរដើម្បីធ្វើឱ្យប្រាកដថាច្រកសមុទ្រនេះនៅតែបើកដំណើរការជានិច្ច។ នេះបើយោងតាមការផ្សាយរបស់អេភី (AP) និងប្រភពដទៃទៀត៕
ចែករំលែកព័តមាននេះ