ទីក្រុងតៃប៉ិ៖ នៅល្ងាចនេះ កោះតៃវ៉ាន់រងការវាយប្រហារដោយគ្រោះរញ្ជួយដីកម្រិត៦,១រ៉ិចទ័រនៅភាគអាគ្នេយ៍។ ទំហំនៃការខូចខាតទ្រព្យសម្បត្តិ និងអាយុជីវិតរបស់មនុស្សមិនទាន់ដឹងនៅឡើយទេ។ នេះបើយោងតាមទីភ្នាក់ងារឧតុនិយម។ នៅទីក្រុងតៃប៉ិ អគារជាច្រើនចាប់ផ្ដើមយោលយោគចុះឡើងៗដោយសារកម្លាំងរញ្ជួយ។ ការរញ្ជួយដែលចាប់ផ្ដើមកាលពីវេលាម៉ោង៥:៤៧ល្ងាចមានចំណុចចាប់ផ្ដើមពីជម្រៅដី១១,៩គីឡូម៉ែត្រ។
ដោយឡែក ក្រុមអ្នកផែនដីវិទ្យារបស់អាមេរិកប៉ាន់ស្មានថាការរញ្ជួយដីនេះមានកម្រិត៦រ៉ិចទ័រ។ ដូច្នេះឃើញថាការប៉ាន់ស្មានមានកម្រិតល្អៀងគ្នាបន្តិចបន្តួច។ យោងតាមការបង្ហើបឱ្យដឹងពីទីភ្នាក់ងារអគ្គិភ័យជាតិ រហូតមកដល់ពេលនេះ គេមិនទាន់ទទួលដំណឹងថាបណ្ដាញដឹកជញ្ជូនរបស់តៃវ៉ាន់រងការខូចខាតនៅឡើយទេ។ ក្រុមហ៊ុន TSMC ខាងផលិតបន្ទះឈីបថ្លែងថាការរញ្ជួយដីលើកនេះមានកម្រិតតូចតាច។ ដូច្នេះមិនទាន់ឈានដល់ដំណាក់កាលត្រូវជម្លៀសបុគ្គលិកចេញពីរោងចក្រទេ។
ទីតាំងទាំងឡាយរួមទាំងទីក្រុងតៃប៉ិ, កាវសិង្ហ (Kaohsiung), ថៃឈុង (Thaichung) និងថៃណាន (Tainan) ត្រូវអាជ្ញាធរប្រកាសអាសន្នដើម្បីឱ្យប្រជាជនបង្កើនការប្រុងប្រយ័ត្ន។ ទូរទស្សន៍ក្នុងស្រុករបស់តៃវ៉ាន់បានចាក់ផ្សាយរូបវីឌីអូឃ្លីបបង្ហាញទំនិញដែលដាក់លក់នៅតាមផ្សារទំនើបធ្លាក់រាត់រាយមកក្រោម។
កោះតៃវ៉ាន់ស្ថិតនៅក្បែរចំណុចប្រសព្វនៃស្រទាប់ផែនដីដែលត្រូវធ្វើចលនារំកិលជានិច្ច។ ហេតុនេះប្រឈមនឹងការរញ្ជួយដី។ កាលពីឆ្នាំ២០១៦ តៃវ៉ាន់ស្លាប់មនុស្សជាង១រយនាក់ដោយសារការរញ្ជួយដីនៅភាគខាងត្បូង។ កាលពីឆ្នាំ១៩៩៩ តៃវ៉ាន់មានហេតុការណ៍រញ្ជួយដីដ៏ធំមួយកម្រិត៧,៣រ៉ិចទ័របណ្ដាលឱ្យស្លាប់មនុស្សជាង២ពាន់នាក់។ នេះបើយោងតាមឆេនណល ញូស៍ អេស៊ា (Channel News Asia) និងប្រភពដទៃទៀត៕
ចែករំលែកព័តមាននេះ