ទីក្រុងកៀវ៖ ប្រទេសរុស្ស៊ីពន្លះអ៊ុយក្រែនមួយអស់ដៃទុកជាការស្វាគមន៍បុណ្យគ្រីសស្មាស់ដែលនៅសល់តែប៉ុន្មានថ្ងៃទៀតប៉ុណ្ណោះនឹងមកដល់ហើយ។ រុស្ស៊ីបញ្ជូនដ្រូនទៅវាយប្រហារអ៊ុយក្រែនបណ្ដាលឱ្យខូចខាតអគារស្នាក់នៅរបស់ប្រជាជននៅទីក្រុងកៀវ។ នេះបើយោងតាមការបង្ហើបឱ្យដឹងពីទីភ្នាក់ងារជួយសង្គ្រោះរបស់អ៊ុយក្រែន។ ប្រជាជនអ៊ុយក្រែនប្រមូលផ្ដុំគ្នានៅក្បែរអគារកម្ពស់៥ជាន់ដែលរងការវាយប្រហារពីដ្រូន។
នៅក្នុងចំណោមអ្នករស់នៅក្នុងអគារនោះមានបុរសម្នាក់ឈ្មោះអានឌ្រី ស្ទេត (Andrii Stets) ជាភ្នាក់ងារសន្តិសុខវ័យ៣៥ឆ្នាំ មានកូន៣នាក់។ គាត់ឈរក្បែរប្រពន្ធរបស់គាត់ ដៃកាន់រទេះកូនង៉ែត។ លោកស្ទេតប្រាប់ថាគាត់ធ្វើដំណើរទៅកន្លែងធ្វើការសុខៗស្រាប់តែឃើញដ្រូនម៉ាកសាហ៊ីតមួយគ្រឿង (ជាដ្រូនអត្តឃាតផលិតនៅអ៊ីរ៉ង់) ហោះរំលងពីលើក្បាលរបស់គាត់។ ឃើញដូច្នេះ គាត់ក៏ធ្វើដំណើរបកក្រោយទៅរកកន្លែងស្នាក់នៅ។ ពេលទៅដល់ឃើញអគារត្រូវដ្រូនវាយប្រហារឡើងខ្ទេចខ្ទីអស់។
នៅក្នុងឱកាសមុនបុណ្យគ្រីសស្មាស់ឆ្នាំនេះ រុស្ស៊ីបញ្ជូនមីស៊ីល និងដ្រូនទៅវាយប្រហារទីតាំងយ៉ាងតិច១៣កន្លែងបណ្ដាលឱ្យស្លាប់ជនជាតិអ៊ុយក្រែន៣នាក់។ ក្នុងនោះក៏មានកុមារម្នាក់ផងដែរ។ មិនតែប៉ុណ្ណោះ ភ្លើងអគ្គិសនីត្រូវកាត់ផ្ដាច់ពេញផ្ទៃប្រទេស។ ការវាយប្រហារនេះកើតឡើងតែប៉ុន្មានថ្ងៃប៉ុណ្ណោះបន្ទាប់ពីមានកិច្ចពិភាក្សាគ្នានៅក្នុងចំណោមគណៈប្រតិភូអាមេរិក អឺរ៉ុប អ៊ុយក្រែន និងរុស្ស៊ីដើម្បីស្វែងរកដំណោះស្រាយផ្នែកការទូត។
ទីតាំងផលិតថាមពលនៅតំបន់ភាគខាងលិចរងការវាយប្រហារខ្លាំងជាងគេ។ នេះបើយោងតាមនាយករដ្ឋមន្ត្រីអ៊ុយក្រែន លោកស្រីយូលីយ៉ា ស្វ៊ីរីដឹនកូ (Yulia Svyrydenko)។ លោកហ្សេឡិនស្គីក៏បាននិយាយពាក់ព័ន្ធនឹងការវាយប្រហារនេះដែរ។ លោកថារុស្ស៊ីជ្រើសរើសយកការវាយប្រហារបែបរំខាននៅពេលប្រជាជនអ៊ុយក្រែនត្រៀមអបអរសាទរបុណ្យគ្រីសស្មាស់។ ហ្សេឡិនស្គីជឿជាក់ថាលោកពូទីនគ្មានចិត្តចង់ចរចាសន្តិភាពដោយប្រាកដប្រជាទេ (ចង់មានន័យថាលោកពូទីនចរចាលេងៗឱ្យគេមើលឃើញថាគាត់ក៏មានចិត្តចង់ចរចាដែរ)។ នេះបើយោងតាមការផ្សាយរបស់រ៉យទ័រ និងប្រភពដទៃទៀត៕
ចែករំលែកព័តមាននេះ