រាជធានីភ្នំពេញ ៖ លោកយី សុខវួច ចៅក្រមស៊ើបសួរសាលាដំបូងរាជធានីភ្នំពេញ នៅថ្ងៃទី០៦ ខែធ្នូ ឆ្នាំ២០២៥ បានដីកាពីរផ្សេងគ្នាបង្គាប់ឃុំខ្លួនបុរសជនជាតិវៀតណាម ចំនួន២នាក់…
រាជធានីភ្នំពេញ ៖ លោកយី សុខវួច ចៅក្រមស៊ើបសួរសាលាដំបូងរាជធានីភ្នំពេញ នៅថ្ងៃទី០៦ ខែធ្នូ ឆ្នាំ២០២៥ បានដីកាពីរផ្សេងគ្នាបង្គាប់ឃុំខ្លួនបុរសជនជាតិវៀតណាម ចំនួន២នាក់ នៅពន្ធនាគាររាជធានីភ្នំពេញ(PJ) ជាបណ្តោះអាសន្នពីបទគំរាមកំហែងហែកកេរ្តិ៍ និងបទឆបោក មានស្ថានទម្ងន់ទោសជាក្រុមដែលធ្វើសកម្មភាពដោយមានអង្គការចាត់តាំង ។ នេះបើតាមដីការបង្គាប់ឲ្យឃុំខ្លួនរបស់សាលាដំបូងរាជធានីភ្នំពេញ ។
ក្នុងដីកា បានបញ្ជាក់ថា ជនត្រូវចោទទាំងពីរនាក់នេះទី១ ឈ្មោះ VU HUY HOANG ទី២ ឈ្នោះ NGO VAN TAI ត្រូវបានសមត្ថកិច្ចឃាត់ខ្លួន កាលពីថ្ងៃទី០២ ខែធ្នូ ឆ្នាំ២០២៥ ដោយប្រព្រឹត្តបទល្មើសនៅណុចផ្ទះលេខ២ ផ្លូវបេតុង (បុរីផាកវិទ្យា) ភូមិព្រែកជាងព្រុំ សង្កាត់វាលស្បូវ ខណ្ឌច្បារអំពៅ រាជធានីភ្នំពេញ ។
គួររម្លឹកថា ចាប់ពីថ្ងៃទី២៧ ខែមិថុនា ឆ្នាំ២០២៥ ដល់ដើមខែធ្នូនេះ ក្រោមការសម្របសម្រួលចង្អុលបង្ហាញពីលេខាធិការដ្ឋាននៃគណៈកម្មការ គ.ប.ឆ.ប. (online scam) កម្លាំងសមត្ថកិច្ចចម្រុះបានឃាត់ខ្លួនជនសង្ស័យសរុប៤ ៨៥១នាក់ (ក្នុងមានស្រីចំនួន៩២៥នាក់) មាន២៣សញ្ជាតិ ក្នុងនោះជនជាតិចិន, វៀតណាម, ឥណ្ឌូណេស៊ី, ឥណ្ឌា, បង់ក្លាដេស, ថៃ, កូរ៉េខាងត្បូង, ប៉ាគីស្ថាន, នេប៉ាល់ , ម៉ាឡេស៊ី, ជប៉ុន, មីយ៉ាន់ម៉ា, និងជនជាតិផ្សេងៗទៀតមាន ហ្វីលីពីន ឡាវ កាមេរ៉ូន នីហ្សេរីយ៉ា យូហ្គាន់ដា សេរ៉ាលីអូន ម៉ុងហ្គោលី រុស្ស៊ី ស្រីលង្កា អាល់ហ្សេរ៉ី សិង្ហបុរី ។
ជាមួយគ្នានេះ សមត្ថកិច្ចជំនាញបានបន្តនីតិវិធីចំពោះ ១១សំណុំរឿងធំៗក្នុងចំណោមសំណុំរឿងពាក់ព័ន្ធនឹងការប្រព្រឹត្តបទល្មើសក្នុងរាជធានីភ្នំពេញ កណ្តាល ព្រះសីហនុ និងខេត្តកំពត ដោយបានបញ្ជូនមុខសញ្ញាមេខ្លោង និងបក្ខពួកសរុបចំនួន៧៧នាក់ (ស្រី៥នាក់) ទៅតុលាការ ដើម្បីអនុវត្តនីតិវិធីតាមច្បាប់ជាធរមាន ។
សូមជម្រាបថា រាជរដ្ឋាភិបាលកម្ពុជា កាលពីថ្ងៃទី១៤ ខែកក្កដា ឆ្នាំ២០២៥ បានដាក់ចេញ យុទ្ធនាការបោសសម្អាតការឆបោកតាមប្រព័ន្ធបច្ចេកវិទ្យានៅទូទាំងប្រទេសដោយមានការចូលរួមអនុវត្តសកម្មភាពពីក្រសួង ស្ថាប័ន អាជ្ញាធរ និងសមត្ថកិច្ចពាក់ព័ន្ធ ដើម្បីបង្ការ ទប់ស្កាត់ និងប្រយុទ្ធប្រឆាំង ការឆបោកតាមប្រព័ន្ធបច្ចេកវិទ្យាឱ្យមានប្រសិទ្ធភាពខ្ពស់ ។
យុទ្ធនាការនេះ សមត្ថកិច្ចចម្រុះទូទាំងប្រទេសនឹងចាត់វិធានការតាមផ្លូវច្បាប់យ៉ាងតឹងរឹងបំផុតចំពោះមេខ្លោងទាំងឡាយ ដែលជាប់ពាក់ព័ន្ធនឹងអំពើឆបោកតាមប្រព័ន្ធបច្ចេកវិទ្យានេះ ដោយគ្មានការលើកលែងឡើយ៕
ចែករំលែកព័តមាននេះ