ខេត្តបាត់ដំបង៖ ដោយចំណាយពេលស្ទើរពេញចំនួន០៧ឆ្នាំ ទីបំផុត«ទំនប់ដូនទ្រី» ដែលជាអាងស្ដុកទឹកដ៏ធំទី០៣ នៅខេត្តបាត់ដំបង ត្រូវបានសាងសង់រួចរាល់ជាស្ថាបពរ១០០%។ ហើយអាងស្ដុកទឹកដ៏ធំសម្បើមនេះ អាចធានាការស្រោចស្របកសិកម្មរដូវវស្សាបានប្រមាណ ៣៣,០០០ហិចតា និង…
ខេត្តបាត់ដំបង៖ ដោយចំណាយពេលស្ទើរពេញចំនួន០៧ឆ្នាំ ទីបំផុត«ទំនប់ដូនទ្រី» ដែលជាអាងស្ដុកទឹកដ៏ធំទី០៣ នៅខេត្តបាត់ដំបង ត្រូវបានសាងសង់រួចរាល់ជាស្ថាបពរ១០០%។ ហើយអាងស្ដុកទឹកដ៏ធំសម្បើមនេះ អាចធានាការស្រោចស្របកសិកម្មរដូវវស្សាបានប្រមាណ ៣៣,០០០ហិចតា និង ដំណាំរដូវប្រាំងប្រមាណ៤,៥០០ហិចតាទៀតផង។ «ទំនប់ដូនទ្រី» មានទីតាំងនៅក្នុងឃុំបាសាក់ ស្រុករុក្ខគិរី ខេត្តបាត់ដំបង។
លោក ខៃ សុដា អនុប្រធានមន្ទីរធនធានទឹក និង ឧតុនិយមខេត្ត ទទូលបន្ទុកក្ដាប់រួម បានបញ្ជាក់ប្រាប់កោះសន្តិភាព នៅរសៀលថ្ងៃទី ០១ ធ្នូ ថា «ទំនប់ដូនទ្រី» បានសាងសង់រួចរាល់ក្នុងអំឡុងខែតុលា ឆ្នាំ២០២៥ នេះ ដោយចំណាយពេលស្ទើរជិត០៧ឆ្នាំ ដែលចាប់ផ្ដើមស្ថាបនា តាំងពីអំឡុងឆ្នាំ២០១៨ រហូតមក។ ពេលនេះការសាងសង់ យើងសម្រេចបាន១០០% ហើយនៅតែរង់ចាំថ្នាក់ដឹកនាំបើកសម្ភោធដាក់ឲ្យប្រើប្រាសជាផ្កូវការតែប៉ុណ្ណោះ។ តាមរយៈរបាយការណ៏របស់ក្រសួងធនធានទឹក និង ឧតុនិយម ដែលបានផ្សព្វផ្សាយជាសាធារណៈលើបណ្ដាញព័ត៏មានសង្គម៖ «ទំនប់ដូនទ្រី» ជាអាងស្ដុកទឹកដ៏ធំថ្មីមួយទៀត ក្នុងចំណោមអាងស្ដុកទឹកជាច្រើននៅក្នុងខេត្តបាត់ដំបង ដែលពោរពេញដោយសក្តានុពល ផ្នែកកសិកម្ម។
អាងទឹកដ៏ធំមួយនេះ ស្ដុកទឹកបានចំនួន ១៦៣ លានម៉ែត្រគូប ហើយអាចផ្គត់ផ្គង់ទឹកស្រោចស្របផ្ទៃដីកសិកម្មរដូវវស្សាបានចំនួន៣៣,០០០ហិចតា និង ដំណាំរដួវប្រាំងបានចំនួន៤,៥០០ហិចតា ដែលគ្របដណ្ដប់លើឃុំចំនួន១១ នៅក្នុងស្រុកមោងឬស្សី និង ស្រុករុក្ខគិរី ខេត្តបាត់ដំបង អាចបង្ហូសដល់ផ្ទៃកសិកម្មមួយផ្នែក ក្នុងទឹកដីស្រុកបាកាន ខេត្តពោធិសាត់ ទៀតផង។ បន្ងែមលើនេះ «ទំនប់ដូនទ្រី» បានរួមចំណែកដល់ការផ្គត់ផ្គង់ទឹកស្អាត និង ជួយកាត់បន្ថយគ្រោះទឹកជំនន់តាមតំបន់មួយចំនួននៅប៉ែកខាងក្រោមៗផង។
បើនិយាយពីលក្ខណៈបច្ចេកទេសទូទៅវិញ «ទនប់ដូនទ្រី» មានខ្នងលើទទឹង ០៨ម៉ែត្រ កម្ពស់៦០ម៉ែត្រពីគ្រឹះ មានប្រវែងសរុប៦៥៤ម៉ែត្រ ដែលមានសមត្ថភាពផ្ទុកទឹកប្រសិទ្ធភាពបាន១៣៣ លានម៉ែត្រគូប។ ទំនប់ទឹកនេះមានរៀបចំសំណង់បង្ហៀរទឹកដែលមានប្រវែង៤១៤ម៉ែត្រ មានសមត្ថភាពរំដោះទឹកបាន៨៥០ម៉ែត្រគូបក្នុង០១វិនាទី។ មានរូងក្រោមដីសម្រាប់បង្វែរទឹក មានសំណង់ប៉មគ្រប់គ្រងទឹក ដែលមានទ្វារទឹកច្រើនថ្នាក់ បំពាក់ដោយទ្វារសម្រាប់ប្រតិបត្តិការចំនួន០៤។ លោក ខៃ សុដា អនុប្រធានមន្ទីរធនធានទឹក និង ឧតុនិយមខេត្ត ទទូលបន្ទុកក្ដាប់រួម បានថ្លែងថា «ទំនប់ដូនទ្រី» ជាអាងស្ដុកទឹកដ៏ធំមួយទៀត ដែលយើងអាចនិយាយបានថា ជាទំនប់ទឹកធំទី០៣ ដែលទើបបានសាងសង់រួច។
លោកបានប្រាប់ដែរថា បច្ចុប្បន្ននេះនៅក្នុងខេត្តបាត់ដំបង យើងមានអាងស្ដុកទឹកធំៗចំនួន០៣ រាប់ទាំង«ទំនប់ដូនទ្រី»នេះ។ បើនិយាយពីទំហំ នៃទំនប់អាងស្ដុកទឹកនីមួយៗមាន ទី១ ទំនប់ទឹក«ពហុបំណង» មានទីតាំងនៅឃុំផ្លូវមាស ស្រុករតនមណ្ឌល ដែលសាងសង់ក្នុងឆ្នាំ២០១៤ និង រួចរាល់ក្នុងឆ្នាំ២០១៨។ ទនប់«ពហុបំណង» នេះអាចស្ដុកទឹកបានចំនួន ១៩៣,៤៣លានម៉ែត្រគូប។ ទី២ ទំនប់«ដូនទ្រី» មានទីតាំងនៅ ឃុំបាសាក់ ស្រុករុក្ខគិរី។ ទំនប់ទឹកនេះ ផ្ដើមសាងសង់ក្នុងឆ្នាំ២០១៨ និង រួចរាល់ក្នុងឆ្នាំ២០២៥។ ទំនប់ទឹក«ដូនទ្រី»នេះអាចស្ដុកទឹកបានចំនួន១៦៣ លានម៉ែត្រគូប និង ទី៣ ទំនប់ទឹក«អាងកំពីងពួយ» មានទីតាំងនៅក្នុង ឃុំតាគ្រាម ស្រុកបាណន់។
ទំនប់អាងកំពីងពួយនេះ ស្ថាបនាដោងកម្លាំងមនុស្សសុទ្ធសាត នៃកងចល័ត ក្នុងរបបអាវខ្មៅខ្មែរក្រហម ក្នុងទសវត្សឆ្នាំ១៩៧០។ ទំនប់ទឹកប្រវត្តិសាស្ត្រមួយនេះ អាចស្ដុកទឹកបានប្រមាណ ១៤៦ លានម៉ែត្រគូប។ ប៉ុន្តែលោក ខៃ សុដា បានបញ្ជាក់បន្ថែមថា បើទោះជាទំនប់ដូនទ្រី ទើបសាងសង់រួចក្ដី ប៉ុន្តែបច្ចុប្បន្ននេះ ទំនងដូនទ្រី នៅសល់ទឹកប្រហែល៤០% នៃចំនួនទឹកដែលអាចស្ដុកពេញ។ ពីព្រោះក្នុងរដូវវស្សានាឆ្នាំនេះ នៅតំបន់នោះមិនសូវមានភ្លៀងធ្លាក់ ដូច្នេះហើយទើបមិនមានទឹកហូរចូលក្នុងអាង។
លោកបានបញ្ជាក់ថា បើយោងលើចំនួនទឹកដែលមានស្ដុកនៅក្នុងអាងសព្វថ្ងៃនេះ បានត្រិមតែសម្រាប់ស្រោចស្របដំណាំវិលជុំកំប៉ិកកំប៉ុក និង សម្រាប់ផ្ដល់ដល់ការប្រើប្រាសទឹកស្អាតប៉ុណ្ណោះ មិនអាចផ្គត់ផ្គង់ដល់ដំណាំស្រូវប្រាំងបានទេ។ ប៉ុន្តែបើឆ្នាំក្រោយៗ បែបអាចប្រើប្រាសបានគ្រប់គ្រាន់៕
ចែករំលែកព័តមាននេះ