រាជធានីភ្នំពេញ ៖ «នគរបាលខណ្ឌដង្កោ ចំណាយពេលតែ២ថ្ងៃប៉ុណ្ណោះ ក្នុងការស្រាវជ្រាវរហូតឈានដល់ការចាប់ខ្លួនជនសង្ស័យម្នាក់ (ក្នុងចំណោម២នាក់) ដែលបានធ្វើសកម្មភាពឆក់ទូរស័ព្ទក្មេងស្រីនៅមុខហាងបុកល្ហុង ក្នុងបុរីពិភពថ្មី១ កាលពីថ្ងៃទី២៨ វិច្ឆិកា…
រាជធានីភ្នំពេញ ៖ «នគរបាលខណ្ឌដង្កោ ចំណាយពេលតែ២ថ្ងៃប៉ុណ្ណោះ ក្នុងការស្រាវជ្រាវរហូតឈានដល់ការចាប់ខ្លួនជនសង្ស័យម្នាក់ (ក្នុងចំណោម២នាក់) ដែលបានធ្វើសកម្មភាពឆក់ទូរស័ព្ទក្មេងស្រីនៅមុខហាងបុកល្ហុង ក្នុងបុរីពិភពថ្មី១ កាលពីថ្ងៃទី២៨ វិច្ឆិកា ២០២៥ ដោយសមត្ថកិច្ចបានដកហូតទូរស័ព្ទប្រគល់ជូនជនរងគ្រោះវិញផងដែរ»។
ជនសង្ស័យ២នាក់ ដែលបានជិះម៉ូតូ១គ្រឿងទៅធ្វើសកម្មភាពឆក់ទូរស័ព្ទពីក្មេងស្រីម្នាក់ ដែលកំពុងអង្គុយលើម៉ូតូ នៅតាមផ្លូវមុខហាងបុកល្ហុង«យីហោបុកល្ហុងឆ្លងដែន» ស្ថិតនៅតាមផ្លូវលេខ១៩ បុរីពិភពថ្មី១ ភូមិសំបួរ សង្កាត់ដង្កោ ខណ្ឌដង្កោ រាជធានីភ្នំពេញ កាលពីវេលាម៉ោង១៨និង២៦នាទីយប់ ថ្ងៃទី២៨ ខែវិច្ឆិកា ឆ្នាំ២០២៥នោះ ត្រូវបានកម្លាំងនគរបាលខណ្ឌដង្កោស្រាវជ្រាវ ត្រឹមតែរយៈពេល២ថ្ងៃប៉ុណ្ណោះ ក៏ឈានដល់ការចាប់ខ្លួនជនសង្ស័យបានម្នាក់ហើយ ព្រមទាំងដកហូតយកបានទូរស័ព្ទប្រគល់ឲ្យក្មេងស្រីរងគ្រោះវិញផងដែរ ។
ការចាប់ខ្លួននោះបានធ្វើឡើង កាលពីវេលាម៉ោង១០និង៣០នាទី ព្រឹកថ្ងៃទី៣០ ខែវិច្ឆិកា ឆ្នាំ២០២៥ នៅត្រង់ចំណុចដីឡូតិ៍គ្មានលេខ ផ្លូវបេតុង ស្ថិតនៅភូមិតាឡី សង្កាត់ដង្កោ ខណ្ឌដង្កោ រាជធានីភ្នំពេញ ក្រោយពេលជនសង្ស័យខាងលើ និងបក្ខពួកម្នាក់ទៀតគេចខ្លួនបានរយៈពេលត្រឹមតែ២ថ្ងៃប៉ុណ្ណោះ ។
ជនសង្ស័យ ដែលត្រូវនគរបាលឃាត់ខ្លួននោះឈ្មោះ ស៊ុក អូនតូច ហៅម៉ម ភេទប្រុស អាយុ៣២ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅភូមិបូរីកម្មករ សង្កាត់ជើងឯក ខណ្ឌដង្កោ រាជធានីភ្នំពេញ ជននេះមានផ្ទុកសារធាតុញៀ.នក្នុងខ្លួន ។
ដោយឡែក ក្មេងស្រីរងគ្រោះឈ្មោះ សារុន រតនៈសុធីរ៉ា អាយុ១៣ឆ្នាំ ជនជាតិខ្មែរ ជាសិស្ស មានទីលំនៅផ្ទះលេខ១៣៨ ផ្លូវលេខ០១ ភូមិសំបួរ សង្កាត់ដង្កោ ខណ្ឌដង្កោ រាជធានីភ្នំពេញ ។
នគរបាលបានប្រាប់ឲ្យដឹងថា នៅវេលាយប់កើតហេតុនោះក្មេងស្រីរងគ្រោះខាងលើ បានអង្គុយលើម៉ូតូ១គ្រឿង ម៉ាកហុងដាស្កូបពីពណ៍ខ្មៅ នាងបានកាន់ទូរស័ព្ទម៉ាក IPhone១គ្រឿងស្ដាប់ផ្ទាល់ត្រចៀក បែរមុខទៅរកហាងបុកល្ហុងខាងលើ ។ ខណៈនោះក៏ស្រាប់តែជនសង្ស័យឈ្មោះ ស៊ុក អូនតូច ហៅម៉ម រួមជាមួយបក្ខពួកម្នាក់ទៀត ជិះម៉ូតូម៉ាកហុងដាឌ្រីម សេ១២៥ ពណ៌ខ្មៅ១គ្រឿង ឌុបគ្នាទៅដល់ពីក្រោយបន្ថយល្បឿន រួចកញ្ឆក់យកទូរស័ព្ទពីដៃនាងបានសម្រេច ។
នគរបាលបានប្រាប់ឲ្យដឹងបន្តទៀតថា បន្ទាប់មកជនសង្ស័យបានបន្ថែមល្បឿនម៉ូតូជិះគេចខ្លួនបាត់ដោយសុវត្ថិភាព ពេលនោះបានបង្កឲ្យមានការភ្ញាក់ផ្អើលទាំងយប់ ហើយធ្វើឲ្យនាងស្រឡាំងកាំងភ្លាមៗចុះពីលើម៉ូតូអត់រួចឡើយ ។
ចំណែកមិត្តភក្ដិស្រីរបស់នាងម្នាក់ បានជួយរត់ដេញតាមជនសង្ស័យដែរ ប៉ុន្តែរត់តាមអត់ទាន់ក៏ត្រលប់មកវិញ ហើយអ្វីដែលជាការកត់សម្គាល់នាពេលនោះ គឺជនសង្ស័យម្នាក់ពាក់មួកសុវត្ថិភាបើកចំហរកញ្ចក់ និងម្នាក់ទៀតពាក់មួកប៉េរេ ហើយអត់ពាក់ម៉ាស់ឡើយ និងត្រូវបានថតជាប់ដោយកាមេរ៉ាសុវត្ថិភាព នៅទីតាំងកើតហេតុនោះ ដែលគេអាចមើលឃើញមុខច្បាស់ក្រឡែត ។
នគរបាលខាងលើ បានបញ្ជាក់ប្រាប់ផងដែរថា ក្រោយពេលកើតហេតុលោកវរៈសេនីយ៍ឯកជឹម ស៊ីថា អធិការនគរបាលខណ្ឌដង្កោ បានបញ្ជាឲ្យកម្លាំងនគរបាលខណ្ឌដង្កោ និងប៉ុស្តិ៍ជើងឯក ចុះទៅកាន់ទីតាំងកើតហេតុធ្វើការស្រាវជ្រាវទាំងយប់ ។
ត្រឹមតែរយៈពេល២ថ្ងៃប៉ុណ្ណោះ ក៏កំណត់បានមុខសញ្ញាជនសង្ស័យ ហើយនៅវេលាម៉ោង១០និង៣០នាទី ព្រឹកថ្ងៃទី៣០ ខែវិច្ឆិកា ឆ្នាំ២០២៥ ក៏បានចុះទៅធ្វើការឃាត់ខ្លួនជនសង្ស័យម្នាក់ឈ្មោះស៊ុក អូនតូច ហៅម៉ម នៅត្រង់ចំណុចដីឡូតិ៍គ្មានលេខ ផ្លូវបេតុង ស្ថិតនៅភូមិតាឡី សង្កាត់ដង្កោ ខណ្ឌដង្កោ ។
នគរបាលបានប្រាប់ឲ្យដឹងបន្ថែមថា ក្រោយពេលឃាត់ខ្លួនជនសងស័យបាន កម្លាំងនគរបាលបានដកហូតបានទូរស័ព្ទមកវិញហើយនៅវេលាព្រឹកថ្ងៃទី០១ ខែធ្នូ ឆ្នាំ២០២៥ បានប្រគល់ជូនក្មេងស្រីរងគ្រោះវិញហើយ ក្រៅពីនេះ នគរបាលក៏ដកហូតបានម៉ូតូ១គ្រឿង ដែលជារបស់ជនសង្ស័យផងដែរ ។
បច្ចុប្បន្នជនសង្ស័យខាងលើ កំពុងត្រូវបានឃុំខ្លួនបណ្ដោះអាសន្ននៅអធិការដ្ឋាននគរបាលខណ្ឌដង្កោ ដើម្បីធ្វើការសាកសួរ និងកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញចាត់ការតាមច្បាប់ ៕
ចែករំលែកព័តមាននេះ