រាជធានីភ្នំពេញ ៖ សាកលវិទ្យាល័យ ពុទ្ធិសាស្ត្រ បានរៀបចំកម្មវិធីប្រគល់សញ្ញាបត្រជូននិស្សិតសរុប ៣១៩នាក់ ដែលបានបញ្ចប់ការសិក្សា ដែលប្រព្រឹត្តទៅនៅ រាជបណ្ឌិតសភាកម្ពុជា អគារខេមរវិទូ…
រាជធានីភ្នំពេញ ៖ សាកលវិទ្យាល័យ ពុទ្ធិសាស្ត្រ បានរៀបចំកម្មវិធីប្រគល់សញ្ញាបត្រជូននិស្សិតសរុប ៣១៩នាក់ ដែលបានបញ្ចប់ការសិក្សា ដែលប្រព្រឹត្តទៅនៅ រាជបណ្ឌិតសភាកម្ពុជា អគារខេមរវិទូ រាជធានីភ្នំពេញ នៅព្រឹកថ្ងៃទី ២៨ ខែវិច្ឆិកា ឆ្នាំ ២០២៥ ក្រោមអធិបតីភាព ឯកឧត្តម សុខ ពុទ្ធិវុធ ប្រធានក្រុមប្រឹក្សាភិបាលនៃសាកលវិទ្យាល័យ ពុទ្ឋិសាស្ត្រ ។
ថ្លែងក្នុងពិធីនេះ ឯកឧត្តម ប្រធានក្រុមប្រឹក្សាភិបាលសាកលវិទ្យាល័យ ពុទ្ឋិសាស្ត្រ បានមានប្រសាសន៍ថា «និស្សិតជ័យលាភីថ្ងៃនេះ គឺជាមូលធនមនុស្សដ៏សំខាន់ដែលរាជរដ្ឋាភិបាលក្រោមការដឹកនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បាននិងកំពុងត្រូវការជាចាំបាច់ ដូចដែលមានចែងនៅក្នុងយុទ្ឋសាស្ត្របញ្ចកោណ ដំណាក់កាលទី ១ ដើម្បីកំណើនការងារ សមធម៌ ប្រសិទ្ឋភាព និងចីរភាព កសាងមូលដ្ឋានគ្រឹះឆ្ពោះទៅសម្រេចចក្ខុវិស័យកម្ពុជាឆ្នាំ ២០៥០» ។
ការខិតខំប្រឹងប្រែងសិក្សាបូករួមទាំងការតាំងចិត្តដ៏មោះមុតដែលនិស្សិតរបស់យើងបានចំណាយទាំងពេលវេលា និងកម្លាំងកាយចិត្ត ដើម្បីសម្រេចក្ដីស្រមៃរបស់ពួកគេ គឺសុទ្ធតែជាសមិទ្ឋផលដែលគួរឱ្យកោតសរសើរសម្រាប់ពួកគេក្នុងនាមជានិស្សិតជ័យលាភី ។
លើសពីនេះទៀត ការបង្កើតកម្មវិធីនេះឡើង គឺជាការបោះជំហានទៅមុខមួយជំហានទៀត ឆ្ពោះទៅកាន់ការចាប់ផ្ដើមនៅក្នុងអាជីពការងារដែលសង្គមកំពុងត្រូវការនូវធនធានមនុស្ស ដើម្បីការអភិវឌ្ឍន៍នៅក្នុងប្រទេសរបស់យើង ។
និស្សិតដែលបានបញ្ចប់ការសិក្សា និងមានវត្តមានក្នុងពីធីប្រគល់សញ្ញាបត្រនេះ គឺជាសរសៃឈាមដ៏រឹងមាំក្នុងការពង្រឹងគុណភាព ទាំងផ្នែកវិទ្យាសាស្ត្រសុខាភិបាល និងផ្នែកវិទ្យាសាស្ត្រ បច្ចេកវិទ្យា ជូនដល់ប្រជាជនកម្ពុជាទាំងមូល និងអាចនាំយកសមិទ្ឋផលជោគជ័យនៅពេលនេះជាប្រយោជន៍សម្រាប់ការអភិវឌ្ឍន៍ប្រទេសជាតិទៅថ្ងៃមុខ ។
ឯកឧត្តម បានមានប្រសាសន៍កោតសរសើរដល់ថ្នាក់ដឹកនាំគ្រប់រូប សាស្ត្រាចារ្យ និងបុគ្គលិកទាំងអស់ នៃសាកលវិទ្យាល័យពុទ្ឋិសាស្ត្រដែលបានប្រឹងប្រែងបណ្តុះបណ្តាលប្រកបដោយគុណភាព និងចីរភាព ដល់សិស្សនិស្សិតគ្រប់ៗរូបក្លាយជាធនធានដ៏មានសក្តានុពលក្នុងការអភិវឌ្ឍប្រទេសជាតិ ស្របតាមគុណតម្លៃសាកលវិទ្យាល័យ ពុទ្ឋិសាស្ត្រ គោរពខ្លួនឯង គោរពអ្នកដទៃ អភិវឌ្ឍសង្គម ៕ អត្ថបទសហការ
ចែករំលែកព័តមាននេះ