ខេត្តព្រះសីហនុសង្គ្រោះគម្រោងជាប់គាំងបានជាង១៨០គម្រោង
- ព្រះសីហនុ
រដ្ឋបាលខេត្តព្រះសីហនុ បានអះអាងថា គម្រោងដែលជាប់គាំងចំនួន១៨៦គម្រោង បានស្តារ និងវិនិយោគឡើងវិញ ។ ប្រភពដដែលបានឲ្យដឹង កាលពីថ្ងៃទី២៥ ខែវិច្ឆិកា ឆ្នាំ២០២៥ថា…
រដ្ឋបាលខេត្តព្រះសីហនុ បានអះអាងថា គម្រោងដែលជាប់គាំងចំនួន១៨៦គម្រោង បានស្តារ និងវិនិយោគឡើងវិញ ។
ប្រភពដដែលបានឲ្យដឹង កាលពីថ្ងៃទី២៥ ខែវិច្ឆិកា ឆ្នាំ២០២៥ថា នៅក្នុងកិច្ចប្រជុំក្រុមការងារ ដើម្បីពិនិត្យលើការស្នើការលើកទឹកចិត្ត ការអនុគ្រោះការសម្រួលនីតិវិធី និងការសម្របសម្រួលដោះស្រាយវិវាទរបស់គម្រោងវិនិយោគ និងធុរកិច្ចក្នុងខេត្តព្រះសីហនុ អង្គប្រជុំបានសម្រេចជាគោលការណ៍ ផ្តល់ការលើកទឹកចិត្ត ពិសេសជូនគម្រោងចំនួន១៩ ដែលមានទុនវិនិយោគប៉ាន់ស្មានសរុប២៧៦លានដុល្លារអាមេរិក និងអាចបង្កើតការងារប្រមាណ១.៨៤៥កន្លែង ក្នុងនោះគម្រោងពាក់ព័ន្ធនឹងអគារកំពុងជាប់គាំងចំនួន៧ និងគម្រោងថ្មីចំនួន១២ ។
គម្រោងទាំងនេះ រួមមានគម្រោងសណ្ឋាគារ អគារពហុមុខងារ រោងចក្រផលិតឧបករណ៍ជួសជុលរថយន្ត សិប្បកម្មផលិតក្តារបន្ទះ រោងច្រកផលិតគ្រឿងសង្ហារឹម រោងចក្រផលិតដំណាប់ផ្លែឈើ និងកែច្នៃគ្រាប់ធញ្ញជាតិ និងគម្រោងរោងចក្រផលិតទឹកស្អាត និងផ្គត់ផ្គង់អគ្គិសនី ។
គិតតាំងពីឆ្នាំ២០២៤ មកដល់ខែតុលា ឆ្នាំ២០២៥ ក្រុមការងារបានសម្រេចជាគោលការណ៍ផ្តល់ការលើកទឹកចិត្តពិសេស ជូនគម្រោងចំនួន៣៩២ ដែលមានទុនវិនិយោគប៉ាន់ស្មានសរុប ៧.៨៧១ លានដុល្លារ ក្នុងនោះគម្រោងពាក់ព័ន្ធនឹងអគារកំពុងជាប់គាំងមានចំនួន១៨៦ គម្រោងថ្មីមានចំនួន១៦៦ គម្រោងពង្រីកមានចំនួន២៥ និងគម្រោងមានស្រាប់ចំនួន១៥ ៕
ចែករំលែកព័តមាននេះ