ទីក្រុងប៉ារីស៖ ប្រធានាធិបតីបារាំង លោកម៉ាក្រុង ទើបតែប្រកាសឱ្យដឹងនូវផែនការបង្កើតកងទ័ពយុវជនស្ម័គ្រចិត្តដើម្បីបម្រើជាតិមាតុភូមិនៅក្នុងពេលដែលប្រទេសបារាំងមើលឃើញថាពិភពលោកជួបប្រទះនឹងបញ្ហាប្រឈម និងការគំរាមកំហែងផ្នែកសន្តិសុខកាន់តែខ្លាំង។ តាមគម្រោង ការចាប់ផ្ដើមទទួលយកទាហានយុវជនស្ម័គ្រចិត្តនេះនឹងធ្វើឡើងនៅពាក់កណ្ដាលឆ្នាំ២០២៦។
ចំណាត់ការនេះជាផ្នែកមួយនៃចលនាផ្លាស់ប្ដូរដ៏ធំមួយនៅទ្វីបអឺរ៉ុបដែលធ្លាប់ជ្រកក្រោមម្លប់សុខដ៏ត្រជាក់ត្រជុំនៃការការពារពីប្រទេសអាមេរិកដែលជាមេធំជាងគេនៅក្នុងអង្គការណាតូ។ ប៉ុន្តែចាប់តាំងពីលោកត្រាំឡើងកាន់អំណាចនៅអាណត្តិទីមួយឈានចូលដល់អាណត្តិទីពីរ លោកតែងតែចង់ដកខ្លួនចេញពីអង្គការណាតូក្រោមហេតុផលថាអាមេរិករ៉ាប់រងថ្លៃចំណាយតែម្នាក់ឯងច្រើនពេក។ មែនទែនទៅ អាមេរិកមិនត្រូវការកិច្ចគំាពារពីអឺរ៉ុបទេ ប៉ុន្តែអឺរ៉ុបទៅវិញទេដែលត្រូវការកិច្ចគាំពារពីអាមេរិក។
ឥឡូវនេះ អឺរ៉ុបយល់ថាខ្លួនត្រូវតែប្រកាន់ជំហរឯករាជ្យ-ម្ចាស់ការ ឬខ្លួនទីពឹងខ្លួននៅពេលមានសញ្ញាថាអាមេរិកអាចនឹងរយាលដៃពីអឺរ៉ុបដើម្បីងាកមកពង្រឹងការការពារនៅប៉ាស៊ីហ្វិចវិញម្ដង និងម៉្យាងទៀតនៅពេលអឺរ៉ុបទទួលអារម្មណ៍ថាខ្លួនហាក់ត្រូវរុស្ស៊ីធ្វើតេស្តសមត្ថភាពជាញឹកញាប់ដោយបង្ហោះបាឡុងហោះចូលព្រលានយន្តហោះប្រទេសមួយចំនួន។ ជួនកាល រុស្ស៊ីបង្ហោះដ្រូនចូលដែនអាកាសរដ្ឋជាសមាជិកអង្គការណាតូថែមទៀត។
លោកម៉ាក្រុងថ្លែងនៅឯមូលដ្ឋានទ័ពថ្មើរជើងទី២៧នៃតំបន់ប្រតិបត្តិការសឹកភ្នំអាល់របស់បារាំង (Alps)។ លោកថានេះជាគម្រោងជ្រើសរើសកងទ័ពស្ម័គ្រចិត្តអាយុ១៨ឆ្នាំ និង១៩ឆ្នាំដែលទទួលបានប្រាក់ឧបត្ថម្ភ និងហ្វឹកហាត់រយៈពេល១០ខែ។ លោកថាគម្រោងនេះត្រូវចំណាយថវិកា២ពាន់លានអឺរ៉ូ (ឬ២,៣២ពាន់លានដុល្លារអាមេរិក)។ លោកចាត់ទុកថានេះជាកិច្ចខិតខំប្រឹងប្រែងដ៏សំខាន់ និងដ៏ចាំបាច់។
សម្រាប់ដំណាក់កាលទីមួយនៅក្នុងឆ្នាំ២០២៦ បារាំងត្រៀមជ្រើសរើសទាហានស្ម័គ្រចិត្ត៣ពាន់នាក់។ ពួកគេនឹងចេញប្រតិបត្តិការនៅលើទឹកដីបារាំងសុទ្ធសាធ។ ក្រោយមក នឹងបង្កើនរហូតដល់១ម៉ឺននាក់ត្រឹមឆ្នាំ២០៣០។ លោកម៉ាក្រុងថាលោកមានមហិច្ឆតាបង្កើនចំនួនកងទ័ពស្ម័គ្រចិត្តយុវជនរហូតដល់៥ម៉ឺននាក់ត្រឹមឆ្នាំ២០៣៥។ ចំនួននេះអាចកែសម្រួលទៅតាមសភាពការណ៍ជាក់ស្ដែងនៃការគំរាមកំហែងពីខាងក្រៅ។
ក្រោយពេលបញ្ចប់វគ្គបណ្ដុះបណ្ដាលនេះ សិក្ខាកាមអាចវិលទៅរួមរស់នៅក្នុងសង្គមជាជនស៊ីវិលធម្មតា, អាចក្លាយជាកងទ័ពបម្រុង ឬអាចបន្តចាប់អាជីពជាយោធិនក្របខណ្ឌពេញសិទ្ធិតែម្ដង។ តាមពិត ផែនការរបស់លោកម៉ាក្រុងមិនមែនជារឿងថ្មីទេ។ ប្រទេសមួយចំនួននៅទ្វីបអឺរ៉ុបចាប់ផ្ដើមបើកយុទ្ធនាការស្រដៀងគ្នានេះជាបណ្ដើរៗហើយ។ ឧទាហរណ៍ ដូចជាអាល្លឺម៉ង់ និងដាណឺម៉ាកជាដើម។ នេះបើយោងតាមការផ្សាយរបស់រ៉យទ័រ និងប្រភពដទៃទៀត៕
ចែករំលែកព័តមាននេះ