រាជធានីភ្នំពេញ ៖ អាជ្ញាធរខណ្ឌឫស្សីកែវ បានចុះរៀបចំសណ្តាប់ធ្នាប់ ដោយប្រើកណ្ដាប់ដៃដែក អនុវត្តវិធានការរដ្ឋបាល រុះរើដេប៉ូសំណង់«ឃាងដា» ទាំងយប់ បន្ទាប់ពីម្ចាស់ដេប៉ូលក់គ្រឿងសំណង់ខាងលើនេះ រឹងរូសបន្តរំលោភចំណីផ្លូវសាធារណៈ…
រាជធានីភ្នំពេញ ៖ អាជ្ញាធរខណ្ឌឫស្សីកែវ បានចុះរៀបចំសណ្តាប់ធ្នាប់ ដោយប្រើកណ្ដាប់ដៃដែក អនុវត្តវិធានការរដ្ឋបាល រុះរើដេប៉ូសំណង់«ឃាងដា» ទាំងយប់ បន្ទាប់ពីម្ចាស់ដេប៉ូលក់គ្រឿងសំណង់ខាងលើនេះ រឹងរូសបន្តរំលោភចំណីផ្លូវសាធារណៈ ទាំងបំពាន ។
ការអនុវត្តវិធានការរដ្ឋបាលនេះ ធ្វើឡើងនៅវេលាក្បាលព្រលប់ថ្ងៃព្រហស្បតិ៍ ទី២០ ខែវិច្ឆិកា ឆ្នាំ២០២៥ ដឹកនាំដោយលោក ជិន ប៊ុនធឿន ប្រធានគណៈបញ្ជាការឯកភាពរដ្ឋបាលខណ្ឌឫស្សីកែវ ។
ដេប៉ូលក់គ្រឿងសំណង់ ដែលមិនស្ដាប់តាមការណែនាំខាងលើនេះ ស្ថិតនៅតាមផ្លូវបេតុង អតីតផ្លូវរថភ្លើង ក្នុងភូមិស្ពានខ្ពស់ សង្កាត់គីឡូម៉ែត្រលេខ៦ ខណ្ឌឫស្សីកែវ រាជធានីភ្នំពេញ ។
លោក ជិន ប៊ុនធឿន អភិបាល នៃគណៈអភិបាលខណ្ឌឫស្សីកែវ បានឲ្យដឹងថា ទីតាំងលក់គ្រឿងសំណង់ខាងលើនេះ បានរំលោភដីចំណីផ្លូវសាធារណៈ ។ កន្លងមកអាជ្ញាធរ បានចុះណែនាំជាច្រើនលើក ច្រើនសារមកហើយ តែម្ចាស់ដេប៉ូ នៅតែគឃ្លើន បន្តបំពានរំលោភដីចំណីផ្លូវសាធារណៈ ម្តងហើយម្តងទៀត ។ ដោយសារតែម្ចាស់មិនស្ដាប់តាមការណែនាំ ទើបអាជ្ញាធរ ប្រើវិធានការរដ្ឋបាលចុះរុះរើតែម្ដង ។ បន្ទាប់ពីរុះរើគ្រឿងសំណង់ដាក់តាំងលក់រំលោភចំណីផ្លូវសាធារណៈ អាជ្ញាធរក៏បានប្រើរថយន្ត បាញ់ទឹកលាងសម្អាតផ្លូវ តាមបណ្តោយផ្លូវបេតុងថ្មី (អតីតផ្លូវរថភ្លើងចាស់) ផងដែរ ។
គួរបញ្ជាក់ថា ដេប៉ូលក់គ្រឿងសំណង់ខាងលើបានដាក់តាំងលក់សម្ភារៈ គ្រឿងសំណង់ រួមមាន ៖ លូ ឥដ្ឋខ្យល់ ឥដ្ឋ ថ្ម ជាដើមហៀរមកលើដងផ្លូវបង្កអោយ បាត់បង់សំណាប់ធ្នាប់នៅតាមដងផ្លូវ និងសោភ័ណភាពរាជធានីភ្នំពេញ ៕
ចែករំលែកព័តមាននេះ