រាជធានីភ្នំពេញ ៖ ក្នុងនាមជាមិត្តភក្តិ តារាចម្រៀងនាង ទេព បូព្រឹក្ស បានចំណាយថវិកាផ្ទាល់ខ្លួនរបស់នាងចំនួន១ពាន់ដុល្លារសម្រាប់ការចូលរួមបោះឆ្នោត (Vote) គាំទ្រទៅកាន់ ហ្វីយ៉ាតា ដែលតំណាងកម្ពុជាចូលរួមប្រកួតប្រជែកនៃកម្មវិធីប្រឡងបវរកញ្ញា Miss Universe 2025 ។

គិតមកទល់​ពេលនេះ អស់រយៈពេលច្រើនថ្ងៃហើយដែលហ្វីយ៉ាតា​ បានចូលរួមកម្មវិធីប្រកួត​ប្រជែងសម្រស់ដ៏ធំមួយនេះ ដែលបានធ្វើឡើងក្នុងប្រទេសថៃ ខណៈពេលដែលបេក្ខភាពរូបនេះ​បានលះបង់ និងពុះពារយ៉ាងខ្លាំងដើម្បីចូលរួមកម្មវិធីមួយនេះ ស្របពេលដែលប្រទេសកម្ពុជា និងថៃកំពុងមានជម្លោះជាមួយគ្នា ។

មកដល់វគ្គដែលតម្រូវឲ្យមានការបោះឆ្នោតគាំទ្រសម្រាប់បេក្ខភាពបវរកញ្ញាមកពីបណ្តាប្រទេសនានានោះ ហ្វីយ៉ាតា ក៏ត្រូវបានគេមើលឃើញថា នាងបានទទួលការគាំទ្រ និងជួយជ្រោមជ្រែងយ៉ាងខ្លាំងពីមហាជននៅក្នុងស្រុក ក្នុងនោះ ក៏អ្នកជំនាញល្បីៗ ជាពិសេសទៀតនោះ តារាចម្រៀងនាង ទេព បូព្រឹក្ស ក៏បានចេញមុខចំណាយថវិការបស់ខ្លួនយ៉ាងច្រើន ដើម្បីចូលរួមបោះឆ្នោតគាំទ្រដល់ ហ្វីយ៉ាតា ផងដែរ ។

ជាមួយថវិកាសម្រាប់ចូលរួមការ Vote នោះ ទេព បូព្រឹក្ស ក៏បានភ្ជាប់ជាមួយនឹងសំណេរបង្ហោះលើបណ្តាញសង្គមថា ពួកម៉ាក់ពិតជាក្លាហាន រឹងមាំណាស់ សំរាប់ខ្ញុំអ្នកពិតជាអស្ចារ្យ ស្អាត ឆ្លាត ពូកែ ក្លាហាន ទោះជាជួបព្យុះភ្លៀងយ៉ាងណា ក៏អ្នករឹងមាំ អ្នកស័ក្តិសមខ្លាំងបំផុត​សំរាប់ម្កុដនេះ love you queen Fiyata – ហ្វីយ៉ាតា ។

ជាការឆ្លើយតប ហ្វីយ៉ាតា​បានបង្ហោះក៏បានបង្ហោះសំណេរថា អរគុណមិត្តភក្តិខ្លាំងណាស់ Tep Boprek សម្រាប់ទឹកចិត្ត និងផ្តល់តម្លៃនូវមិត្តភាពមួយនេះមិនដឹងថាត្រូវនិយាយបែប​ណាទើបសាកសមទៅចំពោះក្តីស្រឡាញ់នឹង ទឹកចិត្តដ៏ស្មោះត្រង់មួយនេះ ទោះបីជាមិត្តភក្តិរវល់​ការងារ រកស៊ីយ៉ាងណាក៏ឃើញនូវការខិតខំរបស់គ្នាក្នុងការយកឈ្មោះកម្ពុជាទៅកាន់ឆាកអន្តរជាតិ ។

នាងបញ្ជាក់ថា ក្តីស្រលាញ់និងមិត្តភាពមួយនេះមិនអាចមានអ្វីមកប្រៀបបាន មិត្តគឺជាគំរូដ៏ល្អសំរាប់គ្នា គ្នាជូនពរឯងអោយរកស៊ីកាន់តែទទួលទានមានបាននឹង គ្រួសារមានសុភមង្គល សំណាងល្អ និងកេរ្តិ៍ឈ្មោះកាន់តែល្បីរន្ទឺ ។ នេះហើយជាកម្លាំងរូបរួមគ្នាដ៍សំខាន់ដើម្បីផ្សព្វផ្សាយកម្ពុជាទៅកាន់ពិភពលោក ។

ជាការកត់សម្គាល់ បន្ទាប់ពីបានឃើញនូវជួយគាំទ្រ និងជ្រោមជ្រែងពីសំណាក់ប្រជាពលរដ្ឋខ្មែរយ៉ាងច្រើននាពេលនេះ ហ្វីយ៉ាតា បានសម្តែងការអរគុណ និងមោទនភាពយ៉ាងខ្លាំង ខណៈពេលដែលនាងចាត់ទុកសកម្ម​ភាពនេះ គឺជាកម្លាំងចិត្តមួយដ៏ធំបន្ថែមទៀតសម្រាប់រូបនាងនៅក្នុងការខិតខំប្រកួតប្រជែងនៅក្នុង កម្មវិធីមួយនេះ ។

គួរបញ្ជាក់ថា មុនចេញទៅប្រកួតកម្មវិធី Miss Universe នាពេលនេះ ហ្វីយ៉ាតា ក៏បានជួបប្រទះនូវភាពចម្រូងចម្រាស់ជាមួយនឹងស្ថាប័នដែលទិញសិទ្ធិកម្មវិធីមួយនេះ នៅក្នុងស្រុកផងដែរ ដោយម្ចាស់ស្ថាប័នបានចេញលិខិតមួយដោយបញ្ជាក់ពីការមិនទទួលខុស​ត្រូវចំពោះនាងសម្រាប់ការចេញទៅប្រកួតកម្មវិធីនេះក្នុងប្រទេសថៃនោះឡើយ ។

តែយ៉ាងណា ហ្វីយ៉ាតា នៅតែជម្នះដោយនាងបានសម្រេចចេញទៅប្រកួតកម្មវិធីមួយនេះដដែល ដោយនាងសម្អាងថា កម្មវិធីដ៏ធំមួយនេះមិនអាចអត់មានទង់ជាតិកម្ពុជានោះឡើយ បើទោះបីជាប្រទេសកម្ពុជាកំពុងមានជម្លោះជាមួយថៃក៏ដោយ ៕