រាជធានីភ្នំពេញ ៖ រដ្ឋបាលខណ្ឌកំបូលបានបន្តពង្រឹងការងាររៀបចំសណ្តាប់ធ្នាប់សាធារណៈ និងសោភ័ណភាពមូលដ្ឋាន ដោយបានចុះត្រួតពិនិត្យ និងណែនាំដោយផ្ទាល់ដល់ប្រជាពលរដ្ឋ និងអាជីវករដែលបានសាងសង់សំណង់រំលោភលើចំណីផ្លូវ ។ ជាក់ស្តែង រដ្ឋបាលខណ្ឌកំបូល…
រាជធានីភ្នំពេញ ៖ រដ្ឋបាលខណ្ឌកំបូលបានបន្តពង្រឹងការងាររៀបចំសណ្តាប់ធ្នាប់សាធារណៈ និងសោភ័ណភាពមូលដ្ឋាន ដោយបានចុះត្រួតពិនិត្យ និងណែនាំដោយផ្ទាល់ដល់ប្រជាពលរដ្ឋ និងអាជីវករដែលបានសាងសង់សំណង់រំលោភលើចំណីផ្លូវ ។
ជាក់ស្តែង រដ្ឋបាលខណ្ឌកំបូល បានប្រកាសនាថ្ងៃទី១០ ខែវិច្ឆិកា ឆ្នាំ២០២៥នេះថា ៖ លោក ទ្រី ណារ៉េត អភិបាលរងនៃគណ:អភិបាលខណ្ឌកំបូល បាននាំមន្ត្រីការិយាល័យសាធារណការ ដឹកជញ្ជូន អនាម័យ បរិស្ថាន និងសណ្ដាប់ធ្នាប់សាធារណ: កម្លាំងសន្តិសុខសណ្ដាប់ធ្នាប់ខណ្ឌ និងអាជ្ញាធរសង្កាត់ បន្តចុះធ្វើការណែនាំដល់បងប្អូនប្រជាជនពលរដ្ឋ និងអាជីវករលក់ដូរ តាមបណ្ដោយផ្លូវជាតិលេខ៣ ស្ថិតក្នុងភូមិសាស្ត្រខណ្ឌកំបូល ដែលសាងសង់រំលោភលើចំណីផ្លូវសាធារណ:ឱ្យធ្វើការរុះរើ ដោយដកគម្លាតពីចិញ្ចើមផ្លូវប្រវែង៨ម៉ែត្រ ចេញពីចំណីផ្លូវសាធារណៈ ។
បន្ថែមពីនេះទៀត គោលដៅចម្បងនៃការចុះអនុវត្តវិធានការនេះ គឺតម្រូវឱ្យម្ចាស់សំណង់ ឬទីតាំងលក់ដូរទាំងឡាយណា ដែលបានកាន់កាប់ ឬសាងសង់រំលោភលើដីចំណីផ្លូវសាធារណៈត្រូវធ្វើការរុះរើដោយស្ម័គ្រចិត្ត និងអនុវត្តតាមបទបញ្ជា ។
ជាពិសេស អាជ្ញាធរបានណែនាំយ៉ាងច្បាស់លាស់ដល់ប្រជាពលរដ្ឋ និងអាជីវករ ឱ្យរុះរើ និង ដកគម្លាតចេញពីចិញ្ចើមផ្លូវ សាធារណៈឱ្យបានត្រឹមត្រូវ ក្នុងចម្ងាយ ៨ ម៉ែត្រ ដើម្បីធានាថា ផ្លូវជាតិលេខ៣ អាចដំណើរការបានពេញលេញ ផ្តល់ភាពងាយស្រួល និងសុវត្ថិភាពខ្ពស់សម្រាប់ការធ្វើចរាចរណ៍សាធារណៈ ។
សកម្មភាពនេះសបញ្ជាក់ឱ្យឃើញពីការប្ដេជ្ញាចិត្តខ្ពស់របស់រដ្ឋបាលខណ្ឌកំបូល ក្នុងការអនុវត្តច្បាប់ និងរក្សាវិន័យសង្គម ដើម្បីផលប្រយោជន៍រួមរបស់ប្រជាពលរដ្ឋ និងសោភ័ណភាពរាជធានីភ្នំពេញ ៕
ចែករំលែកព័តមាននេះ