ខេត្តព្រះវិហារ ៖ កាលពីព្រឹកថ្ងៃទី១៨ កក្កដា នៅអគាររដ្ឋបាលសាលាខេត្ដបានរៀបចំពិធីដំឡើងឋានន្តរស័ក្ដិ និងប្រកាសតែងតាំងអភិបាលរងខេត្ដបន្ថែមថ្មីម្នាក់ទៀតគឺលោក អ៊ុន ចាន់ដា មកពីអង្គភាពទីស្ដីការគណៈរដ្ឋមន្ដ្រីនិងជាមន្ដ្រីក្រុមការងារថ្នាក់ ជាតិប្រចាំតំបន់ប្រាសាទព្រះវិហារ ។ ពិធីនេះស្ថិតក្រោមអធិបតីភាព
ខេត្តព្រះវិហារ ៖ កាលពីព្រឹកថ្ងៃទី១៨ កក្កដា នៅអគាររដ្ឋបាលសាលាខេត្ដបានរៀបចំពិធីដំឡើងឋានន្តរស័ក្ដិ និងប្រកាសតែងតាំងអភិបាលរងខេត្ដបន្ថែមថ្មីម្នាក់ទៀតគឺលោក អ៊ុន ចាន់ដា មកពីអង្គភាពទីស្ដីការគណៈរដ្ឋមន្ដ្រីនិងជាមន្ដ្រីក្រុមការងារថ្នាក់ជាតិប្រចាំតំបន់ប្រាសាទព្រះវិហារ ។ ពិធីនេះស្ថិតក្រោមអធិបតីភាពលោកសក់ សេដ្ឋា រដ្ឋលេខាធិការក្រសួងមហាផ្ទៃ ព្រមទាំងមានការចូលរួមពីលោក អ៊ុំ ម៉ារ៉ា អភិបាលខេត្ដ អភិបាលរងខេត្ដ ក្រុមប្រឹក្សាខេត្ដ មន្ដ្រីរាជការ កងកម្លាំងប្រដាប់ អាវុធទាំង៣ប្រភេទ អាជ្ញាធរជាតិព្រះវិហារ ក្រុមការងារថ្នាក់ជាតិ ប្រចាំតំបន់ប្រាសាទព្រះវិហារ អភិបាល អភិបាលរងស្រុក មេឃុំ ទូទាំង៤៩ឃុំ និង២សង្កាត់ សរុបវត្ដមានចូលរួមប្រមាណ ៦០០នាក់ ។
លោកអភិបាលខេត្ដបានលើកឡើងអំពីស្ថានភាពនិងជីវភាពរស់នៅរបស់ប្រជាពលរដ្ឋខេត្ដ ក្នុងនោះកន្លងទៅថ្មីៗបានប្រឈមជាខ្លាំងទៅនឹងអំពើឈ្លានពានរបស់សៀម ដូចជាការបាញ់ផ្លោង ដោយអាវុធធុនធ្ងន់ជាច្រើនរយគ្រាប់មកលើភូមិសាស្ដ្រទឹកដីស្រុកជាំក្សាន្ដ ។ ពេលនោះអាជ្ញាធរខេត្ដរួមជាមួយកាកបាទក្រហមខេត្ដជម្លៀស និងសង្គ្រោះប្រជាពលរដ្ឋឱ្យចេញផុតពីតំបន់អសន្ដិសុខ ។
តាមអនុក្រឹត្យរបស់រាជរដ្ឋាភិបាលបានប្រកាសតែងតាំងលោកអ៊ុន ចាន់ដា ដំឡើងឋានន្ដរស័ក្ដិទៅជាវរមន្ដ្រីថ្នាក់លេខ១០និងប្រកាសតែងតាំងមុខងារជាអភិបាលរងខេត្ដ ។ លោកអ៊ុន ចាន់ដា បានឡើងប្ដេជ្ញាចិត្ដនៅចំពោះមុខអង្គពិធីថា នឹងគោរពនិងប្រតិបត្ដិជានិច្ចបាវចនាជាតិ សាសនា ព្រះមហាក្សត្រ និងគោរពអនុវត្ដយ៉ាងម៉ឺងម៉ាត់រាល់គោលនយោបាយរបស់រាជរដ្ឋាភិបាលកម្ពុជាដែលមានសម្ដេចអគ្គមហាសេនាបតីតេជោ ហ៊ុន សែន ជាប្រមុខដឹកនាំដ៏ឈ្លាសវៃ ។
លោក សក់ សេដ្ឋា រដ្ឋលេខាធិការក្រសួងមហាផ្ទៃបានកោតសរសើរដល់អាជ្ញាធរខេត្ដខិតខំប្រឹងប្រែងដឹកនាំទទួលបានជោគជ័យធំៗ បន្ទាប់ពីខេត្ដមួយនេះបានបញ្ចប់សង្គ្រាមក្រោយគេបង្អស់នៅក្នុងប្រទេសកម្ពុជានិងបានដំណើរការអភិវឌ្ឍលើហេដ្ឋារចនាសម្ព័ន្ធពីទីប្រជុំជនរហូតដល់ទីជនបទ ។ បច្ចុប្បន្នសមិទ្ធផលគួរជាទីមោទនៈសម្រាប់ខេត្ដព្រះវិហារគឺមានផ្លូវជាតិពីរាជធានីភ្នំពេញដល់ជើងភ្នំប្រាសាទព្រះវិហារ ។
លោករដ្ឋលេខាធិការបញ្ជាក់ថាសមទ្ធិផលធំៗទាំងអស់ផ្ដល់មោទនភាពសម្រាប់ខេត្ដ ព្រះវិហារនាពេលនេះក៏អាស្រ័យដោយមានការដឹកនាំដ៏ត្រឹមត្រូវរបស់គណបក្សប្រជាជនកម្ពុជាដែលមានសម្ដេចអគ្គមហាទាំងបីជាអ្នកដឹកនាំ។
លោករដ្ឋលេខាធិការបានរំលឹកដល់អាជ្ញាធរដែនដី និងកងកម្លាំងទាំងអស់ត្រូវយកអស់ស្មារតីខ្ពស់ក្នុងការដឹកនាំអភិវឌ្ឍច្បាប់រដ្ឋាភិបាល និងត្រូវពង្រឹងជាប្រចាំគោលនយោបាយភូមិ-ឃុំ មានសុវត្ថិភាពដើម្បីបង្កើនជំនឿទុកចិត្ដដល់ប្រជាពលរដ្ឋ ៕
ចែករំលែកព័តមាននេះ