ខេត្តប៉ៃលិន ៖ កាលពីថ្ងៃទី១០ ខែតុលា ឆ្នាំ២០២៥ មានជនជាតិថៃ ចំនួន០៥នាក់ (ស្រី៣នាក់) ដែលបានលួចឆ្លងដែន បម្រុងនឹងចូលមកស្នាក់នៅ…
ខេត្តប៉ៃលិន ៖ កាលពីថ្ងៃទី១០ ខែតុលា ឆ្នាំ២០២៥ មានជនជាតិថៃ ចំនួន០៥នាក់ (ស្រី៣នាក់) ដែលបានលួចឆ្លងដែន បម្រុងនឹងចូលមកស្នាក់នៅ និងធ្វើការក្នុងទឹកដីខេត្តប៉ៃលិន ប្រទេសកម្ពុជាដោយខុសច្បាប់ ត្រូវបានអាជ្ញាធរខេត្ត ចាប់បញ្ជូនទៅប្រទេសថៃវិញ តាមច្រកទ្វារព្រំដែនអន្តរជាតិព្រំ ស្ថិតក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន។
បើតាមប្រភពបញ្ជាក់ពីសមត្ថកិច្ចប្រចាំការនៅព្រំដែនបានរៀបរាប់ឱ្យដឹងថា ជនជាតិថៃទាំង០៥នាក់ បានលួចឆ្លងដែនចូលមកក្នុងទឹកដីប្រទេសកម្ពុជា តាមច្រកធម្មជាតិ (ច្រករបៀង) ដើម្បីមកធ្វើការនៅប្រទេសកម្ពុជា តែត្រូវបានកងកម្លាំងការពារព្រំដែន ស្ទាក់ចាប់ឃាត់ខ្លួនបាន ខណៈពេលដែលពួកគេកំពុងធ្វើដំណើរដោយថ្មើរជើងឆ្លងព្រំដែន ក្នុងភូមិសាស្ត្រខេត្តប៉ៃលិន កាលពីយប់ថ្ងៃទី០៩ ខែតុលា ឆ្នាំ២០២៥។ប្រភពដដែលបានបន្តទៀតថា ដោយមានការចង្អុរបង្ហាញពីសំណាក់លោកជំទាវ បាន ស្រីមុំ អភិបាលខេត្ត ក្រុមការងារបានរៀបចំអាហារ និងកន្លែងស្នាក់នៅ ជូនជនជាតិថៃទាំងនោះ ព្រមទាំងធ្វើការទំនាក់ទំនងទៅភាគីថៃ ដើម្បីបញ្ជូនពួកគេទាំងនោះត្រឡប់ទៅប្រទេសថៃរបស់ខ្លួនវិញ ខណៈអត់មានលិខិតឆ្លងដែនត្រឹមត្រូវ។
លោកជំទាវ បាន ស្រីមុំ អភិបាលខេត្តប៉ៃលិន ក៍បានបញ្ជាក់ថា ទោះបីជាមានការបិទច្រកព្រំដែនកម្ពុជា-ថៃ និងស្ថានភាពនៅតាមបន្ទាត់ព្រំដែន មានភាពតានតឹងយ៉ាងណាក៏ដោយ ហើយទោះបីជាមានការបង្ក្រាបជាញឹកញាប់ ពីសំណាក់សមត្ថកិច្ចទាំងពីរប្រទេស ក៏បទល្មើសលួចឆ្លងដែនខុសច្បាប់នៅតែកើតមានឡើង រវាងប្រជាជនដែលនៃប្រទេសទាំងពីរ ហើយលោកជំទាវក៏បានណែនាំដល់មន្ត្រីសមត្ថកិច្ចទាំងអស់ដែលកំពុងប្រចាំការនៅក្បែរព្រំដែន ត្រូវយកចិត្តទុកដាក់យាមល្បាតឱ្យបានដិតដល់ និងមិនត្រូវអនុញ្ញាតឱ្យប្រជាពលរដ្ឋខ្មែរឆ្លងដែនខុសច្បាប់ទៅធ្វើការនៅក្នុងប្រទេសថៃឡើយ ដើម្បីជៀសវាងកើតមានបញ្ហាគ្រោះថ្នាក់ណាមួយដល់ពួកគាត់៕
ចែករំលែកព័តមាននេះ