រាជធានីភ្នំពេញ ៖ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រីហង់ ជួនណារ៉ុន បានបញ្ជាក់ថា បញ្ញាសិប្បនិម្មិត នឹងនាំមកនូវការផ្លាស់ប្តូរថ្មីលើគ្រប់វិស័យជាពិសេសវិស័យអប់រំ ដែលនឹងក្លាយជាឧបករណ៍ជំនួយដ៏មានប្រសិទ្ធភាព ក្នុងការជួយសម្រួល…
រាជធានីភ្នំពេញ ៖ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រីហង់ ជួនណារ៉ុន បានបញ្ជាក់ថា បញ្ញាសិប្បនិម្មិត នឹងនាំមកនូវការផ្លាស់ប្តូរថ្មីលើគ្រប់វិស័យជាពិសេសវិស័យអប់រំ ដែលនឹងក្លាយជាឧបករណ៍ជំនួយដ៏មានប្រសិទ្ធភាព ក្នុងការជួយសម្រួល និងបង្កើនប្រសិទ្ធភាពដល់ការងាររបស់គ្រូបង្រៀន និងការរៀនសូត្ររបស់សិស្សានុសិស្ស ។
ការបញ្ជាក់បែបនេះ នៅពេលឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានអញ្ជើញជាអធិបតីក្នុងពិធីសម្ពោធពិព័រណ៍ស្តីពី «ការប្រើប្រាស់បញ្ញាសិប្បនិម្មិតសម្រាប់ការអប់រំ» កាលពីនារសៀលថ្ងៃទី៥ ខែតុលា ឆ្នាំ២០២៥ នៅវិទ្យាស្ថានជាតិអប់រំ ។
នឹងនាំមកនូវការផ្លាស់ប្តូរថ្មីលើគ្រប់វិស័យ ជាពិសេសវិស័យអប់រំ ដែលនឹងក្លាយជាឧបករណ៍ជំនួយដ៏មានប្រសិទ្ធភាព ក្នុងការជួយសម្រួល និងបង្កើនប្រសិទ្ធភាពដល់ការងាររបស់គ្រូបង្រៀន និងការរៀនសូត្ររបស់សិស្សានុសិស្ស ។
យ៉ាងណាមិញ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី ក៏បានក្រើនរំលឹកដែរថា បញ្ញាសិប្បនិម្មិតនាពេលនេះ គឺនៅតែជាឧបករណ៍ជំនួយប៉ុណ្ណោះដោយយើងមិនអាចពឹងផ្អែកទាំងស្រុង ទៅលើបច្ចេកវិទ្យានេះបានទេដែលអាចបណ្តាលឱ្យបាត់បង់នូវឯករាជ្យភាពនៃការគិតរបស់ខ្លួន ដូច្នេះយើងត្រូវតែចេះប្រើប្រាស់ចំណុចខ្លាំង និងទប់ស្កាត់ចំណុចខ្សោយរវាងសមត្ថភាពរបស់ម៉ាស៊ីន និងមនុស្ស ប្រកបដោយតុល្យភាព ដើម្បីធានាឱ្យដំណើរការរៀនសូត្រកាន់តែមានប្រសិទ្ធភាពខ្ពស់ និងស្របតាមក្របសីលធម៌នៃការប្រើប្រាស់បច្ចេកវិទ្យា ។
គួរបញ្ជាក់ដែរថា ពិធីសម្ពោធពិព័រណ៍ស្តីពី «ការប្រើប្រាស់បញ្ញាសិប្បនិម្មិតសម្រាប់ការអប់រំ» គឺជាកម្មវិធីអមនៃទិវាគ្រូបង្រៀន ។ ក្នុងឱកាសនោះដែរ ឯកឧត្តមរដ្ឋមន្ត្រីក៏បានចុះទស្សនាការតាំងពិព័រណ៌ និងស្តាប់បទបង្ហាញពីអ្នកជំនាញរួចមកតាងនាមក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានកោតសរសើរ និងថ្លែងអំណរគុណយ៉ាងជ្រាលជ្រៅដល់ក្រុមការងារ និងភាគីពាក់ព័ន្ធទាំងអស់ ដែលបានខិតខំប្រឹងប្រែងរៀបចំពិព័រណ៍ស្តីពីបញ្ញាសិប្បនិម្មិតនេះឡើង ដែលជាការបោះជំហានដ៏សំខាន់មួយក្នុងការប្រើប្រាស់បញ្ញាសិប្បនិម្មិតក្នុងការអប់រំ។
សូមជម្រាបថាពិព័រណ៍ស្តីពី «ការប្រើប្រាស់បញ្ញាសិប្បនិម្មិតសម្រាប់ការអប់រំ» រៀបចំឡើងក្រោមកិច្ចសហការរវាងក្រុមប្រឹក្សាសាកលវិទ្យាធិការកម្ពុជា ជាមួយមូលនិធិសម្រាប់ការស្រាវជ្រាវ គំនិតច្នៃប្រឌិត និងនវានុវត្តន៍ និងមជ្ឈមណ្ឌលសម្រាប់ការអប់រំឌីជីថល និងការអប់រំពីចម្ងាយនៃក្រសួងអប់រំ យុវជន និងកីឡា ។ ពិព័រណ៍នេះ បានបង្ហាញស្នាដៃចំនួន៣ប្រភេទរួមមាន ៖ ១. លទ្ធផលនៃការស្រាវជ្រាវជាវត្ថុគំរូកម្មវិធី ឬប្រព័ន្ធដែលពាក់ព័ន្ធនឹងAI ២. កម្មវិធីសិក្សា ឬការស្រាវជ្រាវដែលកំពុងដំណើរការពាក់ព័ន្ធនឹងAI ៣. គម្រោងផែនការ ឬគំនិតផ្តួចផ្តើមថ្មីៗស្តីពីការស្រាវជ្រាវដើម្បីអភិវឌ្ឍផ្នែក AI ៕
ចែករំលែកព័តមាននេះ