ខេត្តរតនគិរី ៖ គ្រោះទឹកជំនន់បណ្តាលឱ្យមនុស្សប្រុសស្រីក្មេងចាស់ចំនួន៥នាក់បាត់បង់ជីវិត និងរកឃើញសពតែម្នាក់ទេ និងកំពុងបាត់ខ្លួន៤នាក់ទៀត ដែលសមត្ថកិច្ចកំពុងស្វះស្វែងតាមរក បន្ទាប់ពីជួបឧបទ្ទវហេតុដ៏អាក្រក់ ដោយសារទឹកហូរបុកយ៉ាងគំហុក និងកួចយកទៅបាត់ ។…
ខេត្តរតនគិរី ៖ គ្រោះទឹកជំនន់បណ្តាលឱ្យមនុស្សប្រុសស្រីក្មេងចាស់ចំនួន៥នាក់បាត់បង់ជីវិត និងរកឃើញសពតែម្នាក់ទេ និងកំពុងបាត់ខ្លួន៤នាក់ទៀត ដែលសមត្ថកិច្ចកំពុងស្វះស្វែងតាមរក បន្ទាប់ពីជួបឧបទ្ទវហេតុដ៏អាក្រក់ ដោយសារទឹកហូរបុកយ៉ាងគំហុក និងកួចយកទៅបាត់ ។
ហេតុការណ៍ទឹកកួចយកមនុស្សទៅនោះ បានកើតឡើងកាលពីវេលាម៉ោងប្រមាណ៤ទៀបភ្លឺ
ថ្ងៃទី២៦ ខែកញ្ញា ឆ្នាំ២០២៥កន្លងទៅ នៅជាប់នឹងអូរកញ្ជាន់ ក្នុងភូមិពីង ឃុំសាមគ្គី ស្រុកអូរជុំ
និងបង្កឱ្យមានការភ្ញាក់ផ្អើលដល់អ្នកភូមិ ហើយរហូតមកដល់ថ្ងៃទី៣០ ខែកញ្ញា ឆ្នាំ២០២៥ក្រុមសមត្ថកិច្ចក៏កំពុងតាមរកនៅឡើយ ។ ជនរងគ្រោះទាំង៥នាក់ ស្ថិតនៅក្នុង២គ្រួសារ និងជាអ្នកស៊ីឈ្នួលនៅក្នុងខ្ទមចម្ការទុរេន ហើយមូលហេតុដែលទឹកកួចយកទៅនោះ គឺខណៈពួកគាត់ដេកនៅក្នុងខ្ទមចម្ការ ។
ការបន្តខិតខំប្រឹងប្រែងស្វះស្វែងរកនេះ សមត្ថកិច្ចក៏បានប្រើកាមេរ៉ាដ្រូនផងដែរ តែនៅពុំទាន់
ប្រទះឃើញសពជនរងគ្រោះនៅឡើយទេ ដែលមិនដឹងថា សាកសពទៅទើរនៅត្រឹមណា ? ឬក៏ហូរធ្លាក់ទៅដល់ទន្លេសេសាន ក្នុងស្រុកតាវែងក៏មិនដឹង ។ ជនរងគ្រោះទាំង៥នាក់ មានទីលំនៅក្នុងភូមិពីង ឃុំសាមគ្គី ស្រុកអូរជុំ ៖
១-ឈ្មោះ ជុំ វ៉ាត់ ភេទប្រុស អាយុ៥៨ឆ្នាំ ជនជាតិទំពួន ជាប្តី រកឃើញសព ។
២-ឈ្មោះ បាំង ឌឿន ភេទស្រី អាយុ៤៤ឆ្នាំ ជនជាតិទំពួន ជាប្រពន្ធ បាត់ខ្លួន ។
៣-ឈ្មោះ វ៉ាត់ ជៀយ ភេទស្រី អាយុ៣១ឆ្នាំ ជនជាតិទំពួន ជាកូន បាត់ខ្លួន ។
៤-ឈ្មោះ ភក្ដ្រ មុខ ភេទប្រុស អាយុ៧ឆ្នាំ ជនជាតិទំពួន ត្រូវជាចៅ បាត់ខ្លួន ។
៥-ឈ្មោះ ភក្រ រ៉េត ភេទប្រុស អាយុ១ឆ្នាំ ជនជាតិទំពួន ជាចៅ បាត់ខ្លួន ។
ចំពោះម្ចាស់ចម្ការកៅស៊ូនិងទុរេន នៅសងខាងអូរកញ្ជាន់នោះ ត្រូវបានគេស្គាល់ថាឈ្មោះ ឡុង តាំង ភេទប្រុស អាយុ៦០ឆ្នាំ ជនជាតិខ្មែរ មានទីលំនៅក្នុងភូមិជ័យជំនះ សង្កាត់ឡាបានសៀក ក្រុងបានលុង ។
ឆ្លងតាមការទៅពិនិត្យស្ថានការណ៍ជាក់ស្តែងរបស់ក្រុមអ្នកយកព័ត៌មាន និងសមត្ថកិច្ចកាល
ពីថ្ងៃទី២៨ ខែកញ្ញា ឆ្នាំ២០២៥ នៅទីតាំង ដើមចមដែលបង្កឱ្យកើតឡើងនូវឧបទ្ទវហេតុដ៏អាក្រក់នេះ មានការបញ្ចេញមតិរបស់ប្រជាពលរដ្ឋដែលបានអាស្រ័យផលលើដំណាំកសិកម្មផ្សេងៗតាមដងអូរកញ្ចាន់ថា រយៈកាលជាង២០ឆ្នាំកន្លងមកហើយ គឺពួកគាត់ពុំដែលជួបប្រទះទឹកហូរដ៏សាហាវបែបនេះទេ ។ ករណីនេះបង្កឡើងដោយសារការបាក់ទំនប់ធារាសាស្ត្រធំនៅភាគខាងលើឈ្មោះ ឡុងតាំង ដែលម្ចាស់ចម្ការកៅស៊ូរាប់រយហិកតានោះបានទប់ទឹកដើម្បីស្រោចស្រពដំណាំកសិកម្មផ្សេងៗទៀត នៅក្នុងអូរកញ្ជាន់មួយនេះដែរ ។
ពួកគាត់បន្តថា បញ្ហានេះបង្កផលប៉ះពាល់ដល់ដំណាំដាំដុះពួកគាត់យ៉ាងធ្ងន់ធ្ងរ នៅលើផ្ទៃដីជាង ៥ហិកតា ដែលពួកគាត់ខិតខំដាំដុះ ដោយចំណាយធនធានអស់រាប់ម៉ឺនដុល្លារជាច្រើនឆ្នាំកន្លងមកនេះ ។ ទុរេនទាំងនោះបានផលផ្លែផ្កាខ្លះៗទៅហើយ ដោយដំណាំសំខាន់ៗ ទាំងនោះរួមមាន ទុរេន និងដូងជាដើម ត្រូវដួលរាបដល់ដីប្រមាណជាង៥រយដើម ។
ក្រៅពីនេះ សម្ភារៈប្រើប្រាស់ដូចជាគំនរឈើ គ្រោងផ្ទះជាង៣មែ៉ត្រគូប ម៉ាស៊ីនបូមទឹក៣គ្រឿង ម៉ាស៊ីនកាត់ស្មៅ ៥គ្រឿង ថ្នាំប៉ូវដំណាំចំនួន ២ឡាំង ដែលមានទឹកប្រាក់១ពាន់ដុល្លារ ស្រះចិញ្ចឹមត្រីចំនួន ៣ប្រវែង១០ម៉ែត្របួនជ្រុង ក្នុងមួយស្រះមានត្រី៥រយក្បាល រួមមានត្រីប្រា ត្រីក្រាញ់ និងត្រីអណ្ដែង ជីដាក់ដំណាំ១តោន និងមាន់ ១០០ក្បាល ត្រូវអណ្តែតទៅតាមទឹកហូរអស់គ្មានសល់ឡើយ ។
ពាក់ព័ន្ធនឹងករណីខាងលើនេះ លោក ឡុងតាំង ម្ចាស់ទំនប់បានអះអាងដោយមិនប្រាកដ
ប្រជា ម្តងថាចាក់ដីទប់ធ្វើផ្លូវដើរឆ្លងកាត់ ម្តងថា ទំនប់របស់គាត់មាន៣ទីតាំងឯណោះក្នុងអូរនោះ ។ ក្នុងការទប់ដីអូរធ្វើផ្លូវនីមួយៗ គាត់បានដាក់លូដែលមានមុខកាត់ ៥០សង្ទីម៉ែត្រទៅ៦០សង្ទីម៉ែត្រ និងបំពង់ដែកត្រឹមត្រូវផងដែរ ។
គាត់បន្តទៀតថា ការកសាងផ្លូវឆ្លងកាត់អូរនោះគឺតាំងពីឆ្នាំ២០១១មកម៉្លេះ ហើយប្រជាពលរដ្ឋក៏សាទរក្នុងការកសាងផ្លូវរបស់គាត់ថែមទៀតផង ក្នុងនោះរួមទាំងអាជ្ញាធរឃុំឯកភាពក៏ដឹងឮដែរ ។
ពាក់ព័ន្ធកនឹងារលើកឡើងរបស់លោក ឡុងតាំង នេះ អតីតមេឃុំឯកភាព លោក រ៉ាក់ ភឿងបានឱ្យដឹងកាលពីល្ងាចថ្ងៃទី២៩ ខែកញ្ញា ឆ្នាំ២០២៥ថា បញ្ហានោះលោកមិនបានដឹងឮរឿងកសាងផ្លូវឯកជននោះទេ ។ ការកសាងផ្លូវនោះពុំមានឯកសារណាមួយបញ្ជាក់ជាលាយលក្ខណ៍
អក្សរនោះឡើយ លោកទទួលដឹងឮតែផ្លូវខេត្តនិងផ្លូវជាតិប៉ុណ្ណោះ ។ ដោយឡែកផ្លូវតាមតំបន់ដាច់ស្រយាល លោកឱ្យទាក់ទងទៅអាជ្ញាធរមូលដ្ឋានបានហើយ ។
លោក អ៊ុំ វណ្ណា ប្រធានមន្ទីរធនធានទឹកនិងឧតុនិយមខេត្ត នៅព្រឹកថ្ងៃទី៣០ ខែកញ្ញា ឆ្នាំ២០២៥ បានឱ្យដឹងថា មុននឹងមានការកសាងអ្វីនៅលើដីរបស់រដ្ឋនោះ គឺត្រូវឆ្លងកាត់អាជ្ញាធរមូលដ្ឋាន ភូមិ ឃុំ ស្រុក ដឹងឮនិងអនុញ្ញាតជាមុនសិន ។ ជាពិសេស ពាក់ព័ន្ធនឹងការកសាងទំនប់ធារាសាស្ត្រជាដើម ។
អភិបាលស្រុកអូរជុំ លោក គៀង តុលា នៅព្រឹកថ្ងៃទី៣០ ខែកញ្ញា ឆ្មាំ២០២៥ មិនអាចសុំការបំភ្លឺបានឡើយ ដោយសារទូរស័ព្ទហៅចូលហើយពុំមានអ្នកលើក ។
ទោះជាយ៉ាងណា ប្រជាពលរដ្ឋជាច្រើនគ្រួសាររស់នៅតាមបណ្ដោយអូរកញ្ជាន់ ដែលកំពុងប្រឈមនឹងហានិភ័យផ្សេងៗ និងរងការគំរាមកំហែងពីជំនន់ទឹក ដែលបង្កឡើងដោយម្ចាស់ចម្ការកែច្នៃធ្វើផ្លូវដាក់លូកាយដីកប់លំៗខ្វះបទដ្ឋានបច្ចេកទេស បង្កការភ័យខ្លាចដល់ប្រជាពលរដ្ឋ ពួកគាត់បានសំណូមពរដល់អាជ្ញាធរមូលដ្ឋាន គួរតែត្រួតពិនិត្យឱ្យបានជាប់ជាប្រចាំ ជួយមានវិធានការទប់ស្កាត់រាល់ភាពមិនប្រក្រតីដែលកើតមានឡើងជាយថាហេតុ និងផ្ដល់ឱកាសឱ្យប្រជាពលរដ្ឋបានបង្កបង្កើនផល និងអាស្រ័យផលលើដំណាំកសិកម្មដើម្បីចិញ្ចឹមជីវិតផង ៕
ចែករំលែកព័តមាននេះ