ទីក្រុងញូដេលី៖ ប្រទេសឥណ្ឌាជួបប្រទះនឹងសោកនាដកម្មថ្មីមួយទៀតហើយកាលពីយប់មិញពាក់ព័ន្ធនឹងហេតុការណ៍ប្រជ្រៀតគ្នា និងជាន់គ្នាបណ្ដាលឱ្យស្លាប់មនុស្សយ៉ាងតិច៣៦នាក់ និងរបួសជាង៥០នាក់។ កាលនោះ ពួកគេប្រមូលផ្ដុំគ្នាយ៉ាងកកកុញដើម្បីបង្ហាញការគាំទ្រតារាភាពយន្តដ៏មានប្រជាប្រិយភាពម្នាក់ និងកំពុងដើរឃោសនារកសំឡេងឆ្នោត។
រដ្ឋមន្ត្រីក្រសួងសុខាភិបាលឥណ្ឌាប្រចាំរដ្ឋតាមឹល ណាឌូ (Tamil Nadu) ប្រាប់ទីភ្នាក់ងារព័ត៌មានអេភីថាជនរងគ្រោះដែលស្លាប់ទាំងនោះគឺស្លាប់នៅពេលដឹកទៅដល់មន្ទីរពេទ្យ។ នៅក្នុងចំណោមនោះមានកុមារ៨នាក់។ ចំណែកអ្នករងរបួសនៅពេលនេះចាប់ផ្ដើមមានដង្ហើមដកបានស្រួលឡើងវិញហើយ ហើយប្រហែលជាអាចរួចផុតពីគ្រោះថ្នាក់ដល់អាយុជីវិត។
មនុស្សយ៉ាងច្រើនកុះករនាំគ្នាទៅស្ដាប់សន្ទរកថារបស់លោកវិឆៃដែលជាតារាភាពយន្តជនជាតិតាមឹល និងកំពុងបើកយុទ្ធនាការឃោសនា។ លោកវិឆៃជាតារាល្បីលំដាប់កំពូលរបស់តាមឹលរយៈពេលបីទសវត្ស។ ដូច្នេះនៅពេលលោករៀបចំកម្មវិធីជួបជុំគ្នាលើកនេះបានទាក់ទាញអ្នកគាំទ្រយ៉ាងច្រើនសន្ធឹកសន្ធាប់។ គាត់បង្កើតគណបក្សនយោបាយកាលពីឆ្នាំ២០២៤។
លោកវិឆៃដែលមានវ័យ៥១ឆ្នាំសម្ដែងការសោកស្ដាយចំពោះហេតុការណ៍ជាន់គ្នាលើកនេះ។ លោកបានបង្ហោះសារនៅលើបណ្ដាញអ៊ិចថាលោកមានចិត្តក្ដុកក្ដួលយ៉ាងខ្លាំងចំពោះសោកនាដកម្មនេះ។ លោកសូមចូលរួមរំលែកមរណៈទុក្ខដ៏ក្រៀមក្រំបំផុតជូនចំពោះក្រុមគ្រួសារសព។ តាមរយៈវីឌីអូឃ្លីបដែលបង្ហោះនៅលើបណ្ដាញសង្គម គេឃើញមនុស្សជាច្រើនពាន់នាក់ចោមរោមជុំវិញក្បួនដង្ហែរបស់លោកវិឆៃ។
រថយន្តរំកិលខ្លួនទៅមុខបណ្ដើរ លោកវិឆៃឆ្លៀតថ្លែងសុន្ទរកថាបណ្ដើរទៅកាន់អ្នកគាំទ្រ។ នៅពេលជួបជុំគ្នានោះ គេឃើញលោកវិឆៃបោះទឹកពីលើឡានទៅឱ្យក្រុមអ្នកគាំទ្រដែលចាប់ផ្ដើមទន់ដៃទន់ជើង និងដួលសន្លប់ព្រូសៗ។ នៅពេលមនុស្សចាប់ផ្ដើមភ័យស្លន់ស្លោ និងជ្រួលច្របល់ខ្លាំងដល់ដំណាក់កាលគ្រប់គ្រេងលែងជាប់ លោកក៏បានស្នើសុំការធ្វើអន្តរាគមន៍ពីសមត្ថកិច្ច។
ដំណឹងនេះបានលេចឮទៅដល់នាយករដ្ឋមន្ត្រីឥណ្ឌា លោកម៉ូឌីរួចហើយ។ លោកសូមសម្ដែងការសោកស្ដាយជាពន់ពេកចំពោះហេតុការណ៍នេះ។ លោកបង្ហោះសារនៅលើបណ្ដាញសង្គមថាចិត្តរបស់លោកនៅដក់ជាប់នឹងក្រុមគ្រួសាររបស់ជនរងគ្រោះជានិច្ច។ លោកសូមជូនពរឱ្យពួកគេខិតខំតាំងចិត្តឱ្យបានរឹងមាំដើម្បីជម្នះស្ថានភាពដ៏លំបាកនេះ។ នេះបើតាមការផ្សាយរបស់សារព័ត៌មានដឹហ្កាឌាន (The Guardian) និងប្រភពដទៃទៀត៕
ចែករំលែកព័តមាននេះ