រាជធានីភ្នំពេញ ៖ នៅទីបំផុត តារាចម្រៀងនាង ឈិត សុវណ្ណបញ្ញា បានវិលត្រឡប់មកកាន់អាជីពជាតារាចម្រៀងវិញហើយ បន្ទាប់ពីនាងបាត់វត្តមានអស់រយៈពេលជាង៦ឆ្នាំមកនេះ ខណៈពេលដែលការវិលមកលើកនេះ គឺនាងប្រកាសក្លាយខ្លួនជាតារាចម្រៀងឯករាជ្យ…
រាជធានីភ្នំពេញ ៖ នៅទីបំផុត តារាចម្រៀងនាង ឈិត សុវណ្ណបញ្ញា បានវិលត្រឡប់មកកាន់អាជីពជាតារាចម្រៀងវិញហើយ បន្ទាប់ពីនាងបាត់វត្តមានអស់រយៈពេលជាង៦ឆ្នាំមកនេះ ខណៈពេលដែលការវិលមកលើកនេះ គឺនាងប្រកាសក្លាយខ្លួនជាតារាចម្រៀងឯករាជ្យ ពោលគឺមិនស្ថិតក្រោមផលិតកម្មណាមួយឡើយ ។
ទន្ទឹមនឹងការវិលមកវិញនាពេលនេះ ឈិត សុវណ្ណបញ្ញា ក៏បានបញ្ចេញនូវបទចម្រៀងរបស់ខ្លួនជាលើកដំបូងផងដែរ តាមរយៈបទ«សតិអារម្មណ៍»នឹងបានចេញផ្លូវតាមរយៈឆាណែលយូធូបផ្លូវការរបស់នាងកាលពីពេលថ្មីៗនេះ ។
តាមរយៈបទចម្រៀងខាងលើនេះ គេសង្កេតឃើញមានការចាប់អារម្មណ៍ពីប្រិយមិត្តអ្នកគាំទ្រច្រើនផងដែរ ក្នុងពេលដែលពួកគេក៏បានសម្តែងការស្វាគមន៍ពីការវិលត្រឡប់របស់នាងមកកាន់វិថីសិល្បៈចម្រៀងជាថ្មីម្តងទៀតតាមការចង់បាន ក្រោយបាត់មុខអស់ជាច្រើនឆ្នាំ ។
ការវិលត្រឡប់នាពេលនេះ ត្រូវបាន ឈិត សុវណ្ណបញ្ញា បានប្រកាសតាមរយៈសំណេរបង្ហោះលើបណ្តាញសង្គមថា ពេលវេលាដែលរង់ចាំជាង៦ឆ្នាំបានមកដល់ហើយមកលើកនេះជាតារាចម្រៀងឯករាជ្យ រំភើបខ្លាំងមែនទែន សម្រាប់ការស្រលាញ់មួយនេះ អរគុណខ្លាំងមែនទែនពីនាងខ្ញុំ ឈិត សុវណ្ណបញ្ញា ។
យ៉ាងណា ការវិលត្រឡប់មកវិស័យចម្រៀងជាថ្មីនាពេល ទោះបីជាបាន ឬមិនបានទទួលជោគជ័យដូចមុនក៏ដោយ ប៉ុន្តែ ឈិត សុវណ្ណបញ្ញា នៅតែបង្ហាញក្តីសង្ឃឹម និងភាពរីករាយដែលអាចនាងបានវិលមកជួបអ្នកគាំទ្ររូបនាងជាថ្មីនាពេលនេះ ។
ជាការកត់សម្គាល់ តារាចម្រៀង ឈិត សុវណ្ណបញ្ញា បានចំណាយពេលអស់រយៈពេលជាង៦ឆ្នាំ ដោយ ជ្រើសរើសជីវិតតាមមាគាព្រះពុទ្ធសាសនា ស្លៀកស ញុាំអាហារបួស ធ្វើសមាធិឱ្យចិត្តស្ងប់ ដោយនាងមិនខ្វល់ពីរឿងឡើងឆាកសម្តែង ឬរកប្រាក់ចំណូលពីអាជីពសិល្បៈដូចកាលពីមុនឡើយ ។ ជាទូទៅនាងតែងតែបង្ហោះរូបភាពនៅលើបណ្តាញសង្គមបង្ហាញពីសកម្មភាពទៅធ្វើបុណ្យ ឬតាំងសមាធិនៅតាមទីវត្តអារាមនានាជាបន្តបន្ទាប់ ។ យូរៗម្តងនាងក៏តែងតែបង្ហាញខ្លួនចូលរួមក្នុងកម្មវិធីអ្នកសិល្បៈដូចគ្នាផងដែរ ។
កន្លងមកតារាចម្រៀងរូបនេះធ្លាប់បានអះអាងប្រាប់បណ្តាញសារព័ត៌មានក្នុងស្រុកថា នាងមិនវិលត្រឡប់មកកាន់សិល្បៈវិញទេ នាងរកឃើញផ្លូវដែលខ្លួនត្រូវដើរហើយ ដោយតាមពិតវិស័យពុទ្ធសាសនាគឺបានធ្វើឱ្យចិត្តរបស់នាងស្ងប់សុខ មិនសូវគិតពីរឿងអវិជ្ជមាន ។
ទោះជាយ៉ាងណា នៅពេលនេះ នាងក៏បានកែប្រែចិត្តឡើងវិញ ដោយវិលមកកាន់ក្បាលមេក្រូបង្ហើរសំនៀងជាថ្មីម្តងទៀត ដើម្បីជាការឆ្លើយតបទៅនឹងពីសំណាក់ទស្សនិកជន ជាពិសេសបណ្តាអ្នកគាំទ្រដែលចង់បាន ខណៈពេលដែលការវិលមកជាថ្មីឡើងវិញ របស់នាងនៅពេលនេះ គេរំពឹងថា តារារូបនេះនឹងនៅតែទទួលបានការគាំទ្រដូចមុនដដែល ៕
ចែករំលែកព័តមាននេះ