ទីក្រុងតេអេរ៉ង់៖ នៅទីបំផុត ប្រទេសអ៊ីរ៉ង់ប្រកាសទទួលស្គាល់ដោយខ្លួនឯងថាកាលពីពេលប៉ះទង្គិចគ្នាមួយប្រាវជាមួយអ៊ីស្រាអែលនោះ ខ្លួននៅមានចំណុចខ្សោយ។ ការវាយប្រហារគ្នាដោយមីស៊ីល និងយន្តហោះទម្លាក់គ្រាប់បែករយៈពេល១២ថ្ងៃនោះមិនសាមញ្ញពេកទេ។ ប្រធានរដ្ឋសភាអ៊ីរ៉ង់ថ្លែងថាបន្ទាប់ពីសិក្សាចំណុចខ្សោយរួចហើយ រដ្ឋាភិបាលរបស់ខ្លួននឹងកែសម្រួលឡើងវិញនូវចំណុចទាំងនោះ។ អ៊ីរ៉ង់ចាត់ទុកថានោះជាចំណុចសំខាន់ជាអាទិភាព។
មន្ត្រីជាន់ខ្ពស់អ៊ីរ៉ង់រូបនេះថ្លែងថាបើសិនមានសង្គ្រាមនាពេលអនាគត អ៊ីរ៉ង់មិនអាចបណ្ដោយឱ្យងាប់ក្រឡាដូចពេលមុនឡើយ។ អ៊ីរ៉ង់នឹងកំណត់ទីតាំងរបស់អ៊ីស្រាអែលដើម្បីវាយបកវិញ។ ការប្រកាសទទួលស្គាល់ចំណុចខ្សោយរបស់អ៊ីរ៉ង់តាមរយៈមន្ត្រីរូបនេះជាករណីដ៏កម្រ។ កាលពីពេលកន្លងមក អ៊ីរ៉ង់តែងតែតាំងខ្លួនជាប្រទេសខ្លាំងផ្នែកយោធា។ ប៉ុន្មានខែមុនផ្ទុះសង្គ្រាមជាមួយអ៊ីស្រាអែល អ៊ីរ៉ង់ធ្លាប់គំរាមវាយប្រហារអ៊ីស្រាអែល និងអាមេរិក។ ប៉ុន្តែនៅពេលអ៊ីស្រាអែលវាយប្រហារតាមអាកាសកាលពីខែមិថុនា គេឃើញថាប្រព័ន្ធការពារដែនអាកាសរបស់អ៊ីរ៉ង់មិនអាចទប់ស្កាត់មីស៊ីល និងយន្តហោះរបស់អ៊ីស្រាអែលប្រកបដោយប្រសិទ្ធភាពទេ។
ការប្ដេជ្ញាពង្រឹងវិស័យការពារជាតិរបស់ខ្លួនដូចខាងលើនេះបង្ហាញថាអ៊ីរ៉ង់នៅតែមិនបោះបង់ចោលការយកអ៊ីស្រាអែលធ្វើជាសត្រូវដដែល។ ថ្មីៗនេះ អ៊ីរ៉ង់បង្ហាញកម្លាំងទ័ពជើងទឹករបស់ខ្លួននៅលើផ្ទៃសមុទ្រ។ ដូច្នេះអាចនឹងធ្វើឱ្យសភាពការណ៍នៅតំបន់មជ្ឈិមបូព៌ាឡើងកម្ដៅជាថ្មី។ នៅពេលវាយប្រហារគ្នាកាលពីខែមិថុនា អ៊ីរ៉ង់បានវាយប្រហារចំគោលដៅជាច្រើនកន្លែងនៅអ៊ីស្រាអែល។ ដូច្នេះ សំណាញ់មេឃារបស់អ៊ីស្រាអែលដែលល្បីថាខ្លាំងនោះមិនអាចទប់ស្កាត់មីស៊ីលរបស់អ៊ីរ៉ង់បាន១០០%ឡើយ។
ប្រធានរដ្ឋសភាអ៊ីរ៉ង់ថ្លែងបន្តទៀតថាដោយយោងទៅតាមស្ថានការណ៍បច្ចុប្បន្ននេះ អ៊ីរ៉ង់ចាំបាច់ត្រូវតែពង្រឹងសមត្ថភាពការពារជាតិរបស់ខ្លួនជាចំណុចអាទិភាព។ លោកថាលើកនេះបើសិនសត្រូវរបស់អ៊ីរ៉ង់ហ៊ានផ្ទុះអាវុធជាថ្មី សង្គ្រាមនឹងរីករាលដាលទៅតំបន់ដទៃទៀត ហើយក្លាយជាសង្គ្រាមសេដ្ឋកិច្ច និងនយោបាយថែមទៀត។ ថ្មីៗនេះ អ៊ីរ៉ង់ធ្វើសមយុទ្ធយោធាទ្រង់ទ្រាយធំដោយបាញ់មីស៊ីលបណ្ដែត ឬមីស៊ីលគ្រូស (cruise missile) នៅឈូងសមុទ្រអូម៉ង់ (Oman) និងមហាសមុទ្រឥណ្ឌា។
ប្រមុខការពារជាតិអ៊ីរ៉ង់ក៏ទើបតែថ្លែងកាលពីសប្ដាហ៍មុនផងដែរថាគ្រាប់មីស៊ីលជំនាន់ថ្មីរបស់ខ្លួនបានដាក់ឱ្យប្រើប្រាស់រួចជាស្រេចដើម្បីចាត់ការទៅលើអ៊ីស្រាអែលឱ្យតែអ៊ីស្រាអែលហ៊ានហក់មកទៀត។ សព្វថ្ងៃនេះ អ៊ីស្រាអែល និងអ៊ីរ៉ង់មិនទាន់ចុះសន្ធិសញ្ញាសន្តិភាពជាមួយគ្នាទេ។ សង្គ្រាមមួយចម្អិនកំពិសនោះបានបញ្ចប់ទៅត្រឹមតែបទឈប់បាញ់ដែលពោរពេញដោយភាពផុយស្រួយ។
មានន័យការផ្ទុះអាវុធអាចនឹងកើតឡើងជាថ្មីខណៈដែលភាគីទាំង២ក៏កំពុងតែសង្គ្រឺតធ្មេញដាក់គ្នាជាប់ជាប្រចាំ។ ឥឡូវនេះ ភាគីចំនួនបីគឺអ៊ីរ៉ង់ អ៊ីស្រាអែល និងថែមអាមេរិកមួយទៀតសុទ្ធតែព្រលយពាក្យដូចៗគ្នាថាពួកគេមិនច្រានចោលឡើយនូវលទ្ធភាពនៃការផ្ទុះសង្គ្រាមជាថ្មី។ ខាងលើនេះជាការដកស្រង់ប្រភពពីទស្សនាវដ្ដីញូស្វីក (Newsweek) និងប្រភពដទៃទៀត៕
ចែករំលែកព័តមាននេះ