ទីក្រុងហាណូយ៖ ចំនួនអ្នកស្លាប់ដោយសារខ្យល់ព្យុះទីហ្វុងឈ្មោះកាជីគិ (Kajiki) នៅវៀតណាមបានកើនឡើងដល់៤នាក់។ ក្រៅពីនេះ ផ្ទះរបស់អ្នកស្រុកជាច្រើនខ្នងខូចខាត រដ្ឋធានីហាណូយត្រូវទឹកលិច តំបន់មាត់សមុទ្រក៏ត្រូវទឹកលិចដូចគ្នា។ ទូរទស្សន៍របស់រដ្ឋាភិបាលវៀតណាម វីធីវី…
ទីក្រុងហាណូយ៖ ចំនួនអ្នកស្លាប់ដោយសារខ្យល់ព្យុះទីហ្វុងឈ្មោះកាជីគិ (Kajiki) នៅវៀតណាមបានកើនឡើងដល់៤នាក់។ ក្រៅពីនេះ ផ្ទះរបស់អ្នកស្រុកជាច្រើនខ្នងខូចខាត រដ្ឋធានីហាណូយត្រូវទឹកលិច តំបន់មាត់សមុទ្រក៏ត្រូវទឹកលិចដូចគ្នា។ ទូរទស្សន៍របស់រដ្ឋាភិបាលវៀតណាម វីធីវី (VTV) ផ្សាយថានៅពេលនេះចំហាយព្យុះកាជីគិកំពុងបក់សំដៅទៅប្រទេសឡាវ។
ប្រទេសថៃក៏មិនអាចរួចខ្លួនពីការវាយប្រហាររបស់ខ្យល់ព្យុះដែរ។ ថ្ងៃនេះ ប្រទេសថៃប្រកាសដាក់ខេត្តចំនួន៧នៅក្នុងគ្រាអាសន្ន មានន័យថានឹងមានភ្លៀងធ្លាក់ខ្លាំង។ ដូច្នេះអាជ្ញាធរបានប្រកាសឱ្យប្រជាជនប្រុងប្រយ័ត្នខ្ពស់ចំពោះករណីជំនន់ទឹកភ្លៀង និងការបាក់ដី។ ងាកមកប្រទេសវៀតណាមវិញ នៅក្នុងចំណោមជនរងគ្រោះទាំង៤នាក់នោះមានលោកតាម្នាក់អាយុ៩០ឆ្នាំ។ គាត់ស្លាប់ដោយសារផ្ទះរបស់គាត់បាក់រលំ។ ក្រៅពីនេះ បុរសម្នាក់ទៀតស្លាប់ដោយសារឆក់ខ្សែភ្លើង។
មនុស្ស១៣នាក់រងរបួស ខណៈដែលផ្ទះរបស់អ្នកស្រុករាប់ពាន់ខ្នងខូចខាតនៅវៀតណាមភាគកណ្ដាល។ នេះបើតាមការផ្សាយរបស់ទូរទស្សន៍វីធីវី (VTV)។ នៅខេត្តញ៉ែអាន (Nghe An) មានសេចក្ដីរាយការណ៍អំពីការដាច់ភ្លើងអគ្គិសនីដោយសារខ្យល់ព្យុះចាប់ពីតាំងពីយប់ថ្ងៃចន្ទ។ នៅហាណូយ ប្រជាជនត្រូវបណ្ដើរម៉ូតូកាត់ទឹកលិចកម្ពស់ណាណី។ ចំណែកឡានតូច និងឡានបឺសថ្វីដ្បិតអាចបើកទៅមុខបាន ក៏ប៉ុន្តែមិនអាចបើកលឿនបានឡើយ ហើយត្រូវតែរំកិលខ្លួនទៅមុខដោយសន្សឹមៗ។
នារីម្នាក់ឈ្មោះង្វៀនធូខ្វៀន (Nguyen Thu Quynh) ជាអ្នកធ្វើការក្នុងការិយាល័យប្រាប់ថាទឹកលិចគ្រប់ទីកន្លែងព្រោះភ្លៀងធ្លាក់ខ្លាំងពេក។ អ្នកស្រីត្រូវផុងខ្លួននៅកណ្ដាលវាលទឹកមិនអាចទៅធ្វើការបានឡើយ។ អ្នកស្រីនិយាយបណ្ដើរ បណ្ដើរម៉ូតូបណ្ដើរកាត់ទឹកលិចត្រឹមជង្គង់។ មុនពេលខ្យល់ព្យុះបក់ទៅដល់វៀតណាមកាលពីល្ងាចថ្ងៃចន្ទ រដ្ឋាភិបាលបានជម្លៀសមនុស្សជិត៦សែននាក់ដែលរស់នៅតំបន់មុខខ្យល់ព្យុះឆ្លងកាត់។ រដ្ឋាភិបាលប្រើប្រាស់ទាហានថ្មើរជើងជាង១៦៥០០នាក់ និងទាហានប៉ារ៉ាជាង១សែននាក់ដើម្បីចូលរួមនៅក្នុងការជម្លៀសមនុស្ស ឬត្រៀមប្រតិបត្តិការស្វែងរក និងជួយសង្គ្រោះ។ ខាងលើនេះជាការដកស្រង់ប្រភពពីទីភ្នាក់ងារព័ត៌មានអេភី (AP)៕
ចែករំលែកព័តមាននេះ