ខេត្តសៀមរាប៖ ផ្លូវទៅកំពង់ភ្លុកនឹងក្លាយជាផ្លូវគំរូសម្រាប់ទាក់ទាញភ្ញៀវទេសចរ ក្នុងស្រុកប្រាសាទបាគង តាមរយៈការដាំដើមត្នោត និងចូលរួមថែរក្សាបរិស្ថានជាដើម។

យោងតាមការចុះផ្សាយរបស់មន្ទីរព័ត៌មានខេត្តសៀមរាប បានឱ្យដឹងថា ក្នុងឱកាសដឹកនាំប្រជាពលរដ្ឋ ព្រះសង្ឃ និងសិស្សានុសិស្ស ដាំកូនក្ងោក ១.០០០ដើម អមតាមផ្លូវចុះពីផ្លូវជាតិលេខ៦ ទៅកាន់តំបន់កំពង់ភ្លុក ក្នុងស្រុកប្រាសាទបាគង ខេត្តសៀមរាប ដែលជាអំណោយរបស់ សម្ដេចធិបតី នាយករដ្ឋមន្ត្រី នៅព្រឹកថ្ងៃទី២៦ ខែសីហានេះ លោក សូរ ប្លាតុង អភិបាលស្រុក បានបង្ហាញថា ផ្លូវទៅកំពង់ភ្លុក នឹងក្លាយជាផ្លូវគំរូសម្រាប់ទាក់ទាញភ្ញៀវទេសចរ ដោយអាជ្ញាធរស្រុកបានដាក់ចេញនូវគម្រោងចំនួន៥ ដើម្បីអនុវត្តស្របទៅនឹងគោលដៅនេះ។

លោក សូរ ប្លាតុង បញ្ជាក់ថា គម្រោងទាំង៥ រួមមាន៖ទី១.ការដាំកូនឈើអមសងខាងផ្លូវ ជាពិសេសដើមត្នោតដែលជាអត្តសញ្ញាណជាតិ។ទី២.រៀបចំដាក់បន្ទះសូឡានៅតាមដងផ្លូវសម្រាប់បំភ្លឺផ្លូវនៅពេលយប់។ ទី៣.ជំរុញឱ្យពលរដ្ឋអមសងខាងផ្លូវ ចូលរួមថែរក្សាបរិស្ថាន ទុកដាក់សំរាម ថង់ប្លាស្ទិកឱ្យបានល្អ។ទី៤.ណែនាំឱ្យពលរដ្ឋតាមផ្ទះនីមួយៗត្រូវមានទង់ជាតិដាក់នៅមុខផ្ទះពេលមានពិធីបុណ្យទានផ្សេងៗដែលបង្ហាញពីអត្តសញ្ញាណជាតិ និងលម្អសោភណភាពកាន់តែស្រស់ស្អាត និងទី៥. រដ្ឋបាលស្រុក នឹងចាប់ផ្ដើមរៀបចំធ្វើចរាចរណ៍នៅតាមបណ្ដោយផ្លូវទៅកំពង់ភ្លុកដើម្បីកាត់បន្ថយការកកស្ទះ និងគ្រោះថ្នាក់ផ្សេងៗជូនដល់បងប្អូនប្រជាពលរដ្ឋ។

ក្នុងឱកាសនោះដែរ លោក ឌី រ៉ាដូ អភិបាលរងខេត្តសៀមរាប បានអំពាវនាវដល់បងប្អូនប្រជាពលរដ្ឋនៅក្នុងមូលដ្ឋានចូលរួមដាំកូនឈើ និងថែរក្សាបរិស្ថានឱ្យបានស្អាត ដើម្បីជាផ្នែកមួយក្នុងការទាក់ទាញភ្ញៀវទេសចរមកកម្សាន្តនៅក្នុងរមណីយដ្ឋានដែលអាចឱ្យប្រជាពលរដ្ឋរកប្រាក់ចំណូល សម្រាប់ផ្គត់ផ្គង់ជីវភាពគ្រួសារប្រចាំថ្ងៃតាមរយៈវិស័យទេសចរណ៍៕