ខេត្តមណ្ឌលគិរី ៖ ឯកឧត្តម ឆាយ ឬទ្ឋិសែន រដ្ឋមន្ត្រីក្រសួងអភិវឌ្ឍន៍ជនបទ បានកោតសរសើរចំពោះរដ្ឋបាលខេត្តមណ្ឌលគិរីក្នុងការខិតខំប្រឹងប្រែងចូលរួមដឹកនាំជំរុញឱ្យខេត្តទទួលបានជោគជ័យ ជាខេត្ត ODF ពេលនេះ…
ខេត្តមណ្ឌលគិរី ៖ ឯកឧត្តម ឆាយ ឬទ្ឋិសែន រដ្ឋមន្ត្រីក្រសួងអភិវឌ្ឍន៍ជនបទ បានកោតសរសើរចំពោះរដ្ឋបាលខេត្តមណ្ឌលគិរីក្នុងការខិតខំប្រឹងប្រែងចូលរួមដឹកនាំជំរុញឱ្យខេត្តទទួលបានជោគជ័យ ជាខេត្ត ODF ពេលនេះ ហើយសង្ឃឹមយ៉ាងមុតមាំថា រដ្ឋបាលខេត្ត និងគ្រប់ភាគីពាក់ព័ន្ធទាំងអស់នៅបន្តការចូលរួមយ៉ាងសកម្ម និងជំរុញការងារផ្គត់ផ្គង់ទឹក និងអនាម័យជនបទ ជាពិសេសគឺ ការរិះរកយន្តការរក្សាឱ្យបាននូវនិរន្តរភាព ជាខេត្តបញ្ចប់ការបន្ទោរបង់ពាសវាលពាសកាល
(ODF) ។
ឯកឧត្តមរដ្ឋមន្ត្រីមានប្រសាសន៍បន្តថា បច្ចុប្បន្ន ក្រសួងបាននឹងកំពុងបន្តអនុវត្តផែនការសកម្មភាពជាតិស្តីពីការផ្គត់ផ្គង់ទឹក ការសម្អាត និងអនាម័យជនបទ ហើយគិតមកដល់បច្ចុប្បន្ន អត្រាគ្របដណ្តប់ទឹកស្អាត និងអនាម័យទូទាំងប្រទេសសម្រេចបាន ៩១,៩៨% ក្នុងនោះការ ផ្គត់ផ្គង់ទឹកស្អាតកម្រិតមូលដ្ឋានសម្រេចបាន ៨៩.២១% និងការផ្តល់សេវាអនាម័យ ជនបទកម្រិតមូលដ្ឋានសម្រេចបាន ៩៤.៧៦% ហើយយើងបានប្ដេជ្ញាចិត្តថា នៅ ត្រឹមឆ្នាំ២០៣០ ត្រូវតែសម្រេចអាត្រាគ្របដណ្ដប់ទឹកស្អាត និងអនាម័យនៅទូទាំងប្រទេសឱ្យបាន១០០% ។
ថ្ងៃនេះយើងពិតជាមានមោទនភាព ដែលខេត្តមណ្ឌលគិរី សម្រេចបានជាខេត្តបញ្ចប់ការបន្ទោបង់ពាសវាលពាសកាល (ODF)។ ការសម្រេចបាននេះ គឺមានន័យថានៅខេត្តមណ្ឌលគិរី គ្រប់ខ្នងផ្ទះទាំងអស់មានបង្គន់អនាម័យផ្ទាល់ខ្លួន និងមានបង្គន់អនាម័យប្រើប្រាស់រួមគ្នា ហើយលទ្ធផលដែលទទួលបាននាពេលនេះ បានឆ្លុះបញ្ចាំងពីការចូលរួម និងការខិតខំប្រឹងប្រែងរបស់រដ្ឋបាលខេត្តទាំងមូល អាជ្ញាធរគ្រប់លំដាប់ថ្នាក់ មន្ទីរអភិវឌ្ឍន៍ជនបទខេត្ត ក៏ដូចជាមន្ទីរពាក់ព័ន្ធ តួអភិវឌ្ឍន៍នានា និងអង្គការមិនមែនរដ្ឋាភិបាល វិស័យ ឯកជន ជាពិសេសការចូលរួមចំណែកយ៉ាងសកម្មពីបងប្អូនប្រជាពលរដ្ឋ។
ដើម្បីឈានទៅសម្រេចឱ្យបានផែនការ នៃអត្រាគ្របដណ្ដប់ ១០០% នៅទូទាំងប្រទេសនាឆ្នាំ២០៣០ ឯកឧត្តមរដ្ឋមន្ត្រីបានអំពាវនាវដល់គ្រប់ភាគីពាក់ព័ន្ធទាំងអស់ បន្តចូលរួមយ៉ាងសកម្ម និងសហការរួមគ្នា ដោះស្រាយបញ្ហាប្រឈមនានា ដើម្បីលើកកម្ពស់ អនាម័យជនបទឱ្យកាន់តែប្រសើរឡើងថែមទៀត ដោយបន្តយកចិត្តទុកដាក់គាំទ្រ ដល់ប្រជាពលរដ្ឋនៅតាមភូមិដាច់ស្រយាល គ្រួសារក្រីក្រ ជនមានពិការភាព និង ជនងាយរងគ្រោះនានាបានទទួល សេវាទឹកស្អាត ការសម្អាត និងអនាម័យជនបទគ្រប់ៗគ្នា ។
លោក លន់ សុភាព អភិបាលខេត្តមណ្ឌលគិរីស្តីទី មានប្រសាសន៍ថា ការងារផ្គត់ផ្គង់ទឹកស្អាត និង អនាម័យជនបទក្នុងខេត្ត មានការរីកចម្រើនឡើងជាបន្តបន្ទាប់ បង្កលក្ខណ:ឱ្យសម្រេចបានជោគជ័យ តាមគោលដៅនៃផែនការ អាស្រ័យដោយស្ថានភាពជីវភាពរស់នៅ របស់ប្រជាពលរដ្ឋ មានការវិវត្តរីកចម្រើន មានការផ្លាស់ប្ដូរផ្នត់គំនិតជាវិជ្ជមាន និងទម្លាប់ល្អ ក្នុងការរស់នៅរបស់ប្រជាពលរដ្ឋ ទាំងនៅទីប្រជុំជន និងនៅទីជនបទ ។
លោកអភិបាលរងខេត្តបន្តថា ផ្អែកលើទិន្នន័យ បច្ចុប្បន្នភាពរបស់មន្ទីរអភិវឌ្ឍន៍ជនបទខេត្តមណ្ឌលគិរី បានបង្ហាញ ថា ខ្នងផ្ទះប្រើប្រាស់បង្គន់អនាម័យចំនួន ២១ ៥១២ ខ្នងផ្ទះស្មើ ១០០% ។ ក្នុងនោះខ្នងផ្ទះមានបង្គន់ផ្ទាល់ខ្លួន មានចំនួន ១៩ ២៥១ខ្នង ផ្ទះ ស្មើនឹង ៨៩,៥% និងខ្នងផ្ទះប្រើប្រាស់បង្គន់រួមមានចំនួន ២ ២៦១ខ្នងផ្ទះ ស្មើនឹង ១០,៥% ។
លោកបញ្ជាក់ថា ភាពជោគជ័យយ៉ាងត្រចះត្រចង់នេះ គឺបានមកពី មានការយកចិត្តទុកដាក់ និងគាំទ្រពីក្រសួងអភិវឌ្ឍន៍ជនបទ ជាពិសេសការចង្អុលបង្ហាញណែនាំពី ឯកឧត្ដម ឆាយ ឬទ្ធិសែន រដ្ឋមន្ត្រីក្រសួងអភិវឌ្ឍន៍ជន បានដឹកនាំធ្វើឱ្យមានការអភិវឌ្ឍលើគ្រប់វិស័យ ដូចជា ការងារកសាង ហេដ្ឋារចនាសម្ព័ន្ឋផ្លូវជនបទ ផ្ដល់ជូនការងារមុខរបរអាជីវកម្ម ជាពិសេសការងារផ្គត់ផ្គង់ទឹកស្អាត ជនបទ អប់រំអនាម័យ ក្នុងការលើកកម្ពស់សុខភាព ដើម្បីឈានទៅសម្រេចបាននូវទស្សនវិស័យ របស់រាជរដ្ឋាភិបាល ត្រឹមឆ្នាំ២០៣០ ប្រជាពលរដ្ឋគ្រប់រូបទទួលបានសេវាផ្គត់ផ្គង់ទឹកស្អាត ១០០% និង រស់នៅក្នុងបរិស្ថានប្រកបដោយនិរន្តរភាព ។
សូមបញ្ជាក់ថា ពិធីអបអរសាទរខេត្តមណ្ឌលគិរី ទទួលបានជ័យលាភី ជាខេត្តបាន បញ្ចប់ការបន្ទោបង់ពាសវាលពាសកាល នៅបរិវេណសួនច្បារខេត្តមណ្ឌលគិរី នាព្រឹកថ្ងៃទី១៨ ខែសីហា ឆ្នាំ២០២៥ ដោយមានអ្នកចូលរួមប្រមាណជិត៥០០នាក់។
ចែករំលែកព័តមាននេះ