ទីក្រុងញូដេលី៖ ឥណ្ឌាចង់តដៃជាមួយអាមេរិកវិញបន្ទាប់ពីត្រូវថ្នាំខ្លាំងពីម្សិលមិញ។ អាមេរិកថាចាំតែមើលចុះ បើជំនួបកំពូលត្រាំ-ពូទីននៅអាឡាស់ស្កាជោគជ័យមិនអីទេ។ ប៉ុន្តែបើបរាជ័យវិញ អាមេរិកនឹងដំឡើងពន្ធគយទៅលើទំនិញឥណ្ឌា។ អាមេរិកថាឥណ្ឌាជាអ្នកជួយជ្រោមជ្រែងរុស្ស៊ីដើម្បីមានលុយធ្វើសង្គ្រាម, ឥណ្ឌាទិញប្រេងឆៅពីរុស្ស៊ីចន្លោះពី៣៥%ទៅ៤០%។
ដូច្នេះនៅថ្ងៃនេះ នាយករដ្ឋមន្ត្រីឥណ្ឌាប្រកាសជាសារនយោបាយត្រឡប់ទៅវិញ និងជំរុញឱ្យប្រជាជនពង្រឹងភាពឯករាជ្យ-ម្ចាស់ការ ឬខ្លួនទីពឹងខ្លួន។ ពោលគឺខិតខំផលិតអ្វីៗគ្រប់យ៉ាងតាំងពីជីកសិកម្មរហូតដល់ម៉ាស៊ីនយន្តនោះ និងអាគុយឡានអគ្គិសនី។ លោកសន្យាថានឹងខិតខំលើកស្ទួយកសិករនៅចំពោះមុខនៃជម្លោះពាណិជ្ជកម្មដ៏ពុះកញ្ជ្រោលជាមួយអាមេរិក។
ដោយសារអាមេរិកដំឡើងពន្ធខ្ពស់ពេក នាយករដ្ឋមន្ត្រីឥណ្ឌា លោកម៉ូឌី ក៏ប្រកាសបន្ធូរបន្ថយពន្ធរបស់រដ្ឋាភិបាលទៅលើមុខទំនិញ និងសេវាទូទៅចាប់ពីខែតុលាតទៅដើម្បីសម្រាលបន្ទុករបស់ប្រជាជនដែលប្រើប្រាស់ផលិតផលក្នុងស្រុក។ លោកម៉ូឌីក៏ប្រកាសឱ្យដឹងអំពីផែនការដំឡើងប្រព័ន្ធការពារដែនអាកាសស៊េរីថ្មីម៉ាក «ស៊ូដាសាន់ ចក្រា -Sudarshan Chakra»។
ការសម្រេចបែបនេះបន្ទាប់ពីឥណ្ឌា និងប៉ាគីស្ថានធ្លាប់ប៉ះគ្នាមួយប្រាវរយៈពេល៤ថ្ងៃនៅក្នុងសង្គ្រាម១ចម្អិនកំពិសកាលពីខែឧសភា។ លោកម៉ូឌីមិនបានធ្វើអត្ថាធិប្បាយបន្ថែមទេ។ ប៉ុន្តែរដ្ឋាភិបាលចេញសេចក្ដីថ្លែងការណ៍ដែលមានសេចក្ដីជាអាទិ៍ថាប្រព័ន្ធការពារដែនអាកាសនេះមានគោលដៅពង្រឹងសមត្ថភាពការពារខ្លួន និងទប់ទល់នឹងការវាយលុករបស់សត្រូវ។
នៅក្នុងការចរចាគ្នាជាមួយអាមេរិកកាលពីពេលកន្លងមកមូលហេតុដែលគ្មានជោគជ័យដោយសារនិយាយមិនត្រូវគ្នា។ អាមេរិកចង់នាំផលិតផលធ្វើពីទឹកដោះគោ និងកសិផលទៅប្រទេសឥណ្ឌាដើម្បីកុំឱ្យមានឱនភាពពាណិជ្ជកម្មច្រើនពេក។ សូមបញ្ជាក់ថានៅក្នុងការថ្លែងសុន្ទរកថាថ្ងៃនេះ នាយករដ្ឋមន្ត្រីឥណ្ឌាមិនបាននិយាយត្រង់ៗអំពីការដំឡើងពន្ធរបស់អាមេរិកនោះទេ៕
ចែករំលែកព័តមាននេះ