ទីក្រុងបាងកក៖ តើកូនស្រីលោកថាក់ស៊ីន លោកស្រីផែថងថាន ដែលបច្ចុប្បន្នជារដ្ឋមន្ត្រីក្រសួងវប្បធម៌ និងដែលត្រូវតុលាការធម្មនុញ្ញព្យួរតំណែងនាយករដ្ឋមន្ត្រីនោះអាចនឹងទទួលបានតំណែងត្រឡប់មកវិញឬយ៉ាងណា? នេះជាចម្ងល់ដ៏ធំមួយដែលមជ្ឈដ្ឋានជាតិ និងអន្តរជាតិកំពុងរង់ចាំអ៊ុតលទ្ធផល ខណៈដែលតុលាការត្រៀមប្រកាសសាលក្រមនៅថ្ងៃទី២៩ ខែសីហាខាងមុខនេះ។
តុលាការធម្មនុញ្ញចេញសេចក្ដីប្រកាសនៅថ្ងៃនេះថាសេចក្ដីសម្រេចនឹងប្រកាសនៅម៉ោង៣រសៀលថ្ងៃដដែល។ ក្នុងនាមជាកូនស្រីពៅរបស់លោកថាក់ស៊ីន លោកស្រីផែថងថានជាអ្នកស្នងតំណែងនាយករដ្ឋមន្ត្រីបន្តពីលោកសេដ្ឋា ថាក់វិស៊ីនដែលត្រូវតុលាការដកតំណែងពីបទតែងតាំងសមាជិកគណៈរដ្ឋមន្ត្រីម្នាក់ដែលធ្លាប់មានទោសពៃរ៍ និងជាអ្នកស្ម័គ្រស្មោះចំពោះលោកថាក់ស៊ីន។ កាន់តំណែងបន្តមិនទាន់បានមួយឆ្នាំផង លោកស្រីផែថងថានក៏ប្រឈមនឹងការដកតំណែងទៀត។
បន្ទាប់ពីព្យួរតំណែងកាលពីខែកក្កដា រដ្ឋមន្ត្រីវប្បធម៌វ័យ៣៨ឆ្នាំរូបនេះបាននិយាយការពារចំណាត់ការរបស់ខ្លួនកាលពីពេលកន្លងមក។ លោកស្រីថាអ្វីដែលលោកស្រីធ្វើគឺដើម្បីបម្រើឱ្យផលប្រយោជន៍ជាតិតែប៉ុណ្ណោះ។ ប៉ុន្តែការដែលលោកស្រីក្នុងនាមជាមេដឹកនាំប្រទេសមួយទាំងមូលទៅប្រឡូកប្រឡាក់ជាមួយមេបញ្ជាការភូមិភាគ២របៀបជាការកាច់កុងគ្នានោះត្រូវមជ្ឈដ្ឋានអ្នកនយោបាយថៃចាត់ទុកថាមិនមែនជាការចំណេញសម្រាប់ផលប្រយោជន៍ជាតិទេ។ លោកស្រីចាត់ទុកមេបញ្ជាការភូមិភាគ២ជាក្រុមប្រឆាំងនឹងលោកស្រី។
ក្រុមអ្នកតំណាងរាស្ត្រខាងអភិរក្សនិយម (ក្រុមគាំទ្រយោធា និងព្រះរាជបល្ល័ង្គ) ចោទប្រកាន់ថាលោកស្រីផែថងថានបានធ្វើឱ្យអាប់ឱនមុខមាត់របស់កងទ័ព។ ងាកមកបញ្ហាពាក់ព័ន្ធនឹងការសម្រេចរបស់តុលាការម្ដងវិញ។ បើសិនតុលាការសម្រេចដកតំណែងរបស់លោកស្រីផែថងថានជាស្ថាពរ មានន័យថាគ្រួសារត្រកូលថាក់ស៊ីនត្រូវគេដកតំណែងអស់បីនាក់ លោកថាក់ស៊ីន និងលោកស្រីយីងឡាក់ជាឪពុក និងជាម្ដាយមីងត្រូវបានដកតំណែងដោយរដ្ឋប្រហារ។ ចំណែកលោកស្រីផែថងថានដកតំណែងដោយអំណាចតុលាការ។
រយៈពេល២ទសវត្សចុងក្រោយនេះ នយោបាយថៃត្រូវគ្របដណ្ដប់ដោយការប្រជែងគ្នារវាងក្រុមអ្នកអភិរក្សនិយមដែលប្រមូលផ្ដុំដោយក្រុមអ្នកគាំទ្រយោធា និងព្រះរាជបល្ល័ង្គទល់នឹងក្រុមប្រជានិយម (ឆ្វេងនិយម) ដែលមានលោកថាក់ស៊ីនជាជំហរធំជាងគេ។ ក្រុមខាងស្ដាំយល់ថាក្រុមលោកថាក់ស៊ីនជាគ្រោះគំរាមកំហែងដ៏ធំចំពោះសណ្ដាប់ធ្នាប់សង្គមនៅប្រទេសថៃ។
មិនត្រឹមតែកូនស្រីរបស់លោកថាក់ស៊ីនប៉ុណ្ណោះទេដែលកំពុងប្រឈមនឹងបញ្ហា សូម្បីតែលោកថាក់ស៊ីនខ្លួនឯងក៏មានបញ្ហាដូចគ្នា។ សព្វថ្ងៃនេះ លោកកំពុងជាប់បណ្ដឹងនៅតុលាការពាក់ព័ន្ធនឹងការប្រមាថព្រះមហាក្សត្រ។ តុលាការត្រៀមចេញសេចក្ដីសម្រេចទៅលើសំណុំរឿងនេះនៅថ្ងៃទី២២ ខែសីហា។ នៅក្នុងបទសម្ភាសជាមួយសារព័ត៌មានក្នុងស្រុកកាលពីខែកក្កដា លោកថាក់ស៊ីនអះអាងថាបើលោកស្រីផែថងថានត្រូវតុលាការដកតំណែងមែន ជម្រើសគឺមានតែវិលទៅរស់នៅជាប្រជាជនធម្មតា និងបំពេញតួនាទីជាម្ដាយ៕
ចែករំលែកព័តមាននេះ