ប្រទេសវៀតណាម ៖ យានយន្តប្រើសាំង និងម៉ាស៊ូតអាចនឹងបាត់វត្តមានពីទីប្រជុំជននៃទីក្រុងហូជីមិញ ចាប់ពីឆ្នាំ២០២៦ ក្រោមការជំរុញដ៏មហិច្ឆិតា ដើម្បីកាត់បន្ថយការបំពុល ក៏ដូចជាការពារសុខភាពប្រជាជន និងធ្វើទំនើបកម្មការដឹកជញ្ជូន។ នេះបើយោងតាមប្រភពពីសារព័ត៌មានវៀតណាម…
ប្រទេសវៀតណាម ៖ យានយន្តប្រើសាំង និងម៉ាស៊ូតអាចនឹងបាត់វត្តមានពីទីប្រជុំជននៃទីក្រុងហូជីមិញ ចាប់ពីឆ្នាំ២០២៦ ក្រោមការជំរុញដ៏មហិច្ឆិតា ដើម្បីកាត់បន្ថយការបំពុល ក៏ដូចជាការពារសុខភាពប្រជាជន និងធ្វើទំនើបកម្មការដឹកជញ្ជូន។ នេះបើយោងតាមប្រភពពីសារព័ត៌មានវៀតណាម VnExpress ចេញផ្សាយកាលពីថ្ងៃទី៩ ខែសីហា ឆ្នាំ២០២៥។
ប្រភពដដែលបានបន្តថា សម្ព័ន្ធមួយបានស្នើឱ្យសាកល្បងតំបន់បំភាយឧស្ម័នកម្រិតទាប (LEZs) នៅកណ្តាលទីប្រជុំជន និងតំបន់ឆ្នេរនៅសង្កាត់ Can Gio នៃទីក្រុងហូជីមិញ ដោយរឹតបន្តឹងបន្តិចម្តងៗលើយានយន្តដែលមិនអនុលោមតាមច្បាប់ (ប្រើសាំង និងម៉ាស៊ូត) ចាប់ពីឆ្នាំ២០២៦ មុនពេលបញ្ឈប់ការប្រើប្រាស់ទាំងស្រុងនៅឆ្នាំ២០៣២។
សំណើដែលបានដាក់ជូននាយកដ្ឋានសំណង់កាលពីថ្ងៃទី៨ ខែសីហា បានកំណត់តំបន់គោលដៅដែលមានចរាចរណ៍ និងកម្រិតបំពុលខ្ពស់បំផុត ហើយតំបន់ទីប្រជុំជននឹងគ្របដណ្តប់លើស្ពានសំខាន់ៗ និងផ្លូវដ៏មមាញឹកជាប់នឹងផ្លូវថ្នល់ដូចជា Dien Bien Phu, Hai Ba Trung, Nam Ky Khoi Nghia, Le Van Sy, Nguyen Van Cu, Calmette និង Khanh Hoi។
Can Gio ដែលជាកន្លែងបម្រុងជីវមណ្ឌល និងទទួលស្គាល់ដោយអង្គការយូណេស្កូ ត្រូវបានដាក់បញ្ចូលដើម្បីការពារប្រព័ន្ធអេកូឡូស៊ី ដើម្បីលើកកម្ពស់ទេសចរណ៍ប្រកបដោយនិរន្តរភាព។ ក្រុមមន្ត្រីបានលើកឡើងថា ពួកគេចង់ការពារតំបន់នេះ មុនពេលការបំពុលក្លាយទៅជាវិបត្តិ។
តាមផែនការ ឆ្នាំ២០២៥ គឺជាឆ្នាំរៀបចំ ផ្តោតលើចងក្រងក្របខណ្ឌច្បាប់ និងហេដ្ឋារចនាសម្ព័ន្ធជាមុនសិន។ នៅឆ្នាំ២០២៦ ទីក្រុងនឹងចាប់ផ្តើមដាក់កម្រិតទៅលើរថយន្ត និងទោចក្រយានយន្តពាណិជ្ជកម្មក្នុងប្រព័ន្ធដឹកជញ្ជូន ដែលមិនបានបំពេញតាមស្តង់ដារកំណត់។ នៅឆ្នាំ២០២៧ ទោចក្រយានយន្តទាំងអស់នឹងត្រូវឆ្លងកាត់ការធ្វើតេស្តបំភាយឧស្ម័នកម្រិតទាប។
នៅចុងឆ្នាំ២០២៨ ទោចក្រយានយន្តត្រូវតែប្រើអគ្គិសនីពេញលេញ ហើយនៅខែធ្នូ ឆ្នាំ២០២៩ ទោចក្រយានយន្តប្រើសាំងនឹងត្រូវបានហាមឃាត់ពីកម្មវិធីសេវាកម្មដឹកជញ្ជូន។ ចាប់ពីឆ្នាំ២០៣០ តទៅ ច្បាប់នៃការបំភាយឧស្ម័នកម្រិតទាប នឹងអនុវត្តចំពោះយានយន្តផ្ទាល់ខ្លួនទាំងអស់នៅក្នុងទីប្រជុំជន។ បន្ទាប់ពីឆ្នាំ២០៣២ ទីក្រុងហូជីមិញនឹងពិនិត្យមើលកម្មវិធី ហើយពិចារណាពង្រីកច្បាប់បំភាយឧស្ម័នកម្រិតទាប ដើម្បីគ្របដណ្តប់ច្រករបៀងផ្លូវក្រវាត់ក្រុងទាំងមូលតែម្តង។ កាមេរ៉ាសម្គាល់ស្លាកលេខនឹងត្រួតពិនិត្យយានយន្តទាំងអស់ដែលចូលនៅក្នុងតំបន់ ដោយពិនិត្យមើលភាពខុសប្រឆាំងនឹងមូលដ្ឋានទិន្នន័យនៃការបំភាយឧស្ម័ន ហើយយានយន្តដែលមិនគោរពច្បាប់នឹងត្រូវពិន័យ។
ទីក្រុងគ្រោងនឹងពង្រីកផ្លូវរថយន្តក្រុងអគ្គិសនី អភិវឌ្ឍប្រព័ន្ធចែករំលែកកង់សាធារណៈ និងបង្កើតច្រករបៀងពណ៌បៃតងសម្រាប់អ្នកថ្មើរជើង និងអ្នកជិះកង់។ ស្របពេលដែលស្ថានីយ៍សាកថ្មអគ្គិសនីនឹងត្រូវបានផ្តល់អាទិភាពនៅចំណតរថយន្ត មជ្ឈមណ្ឌលផ្សារទំនើប និងមជ្ឈមណ្ឌលចរាចរណ៍សំខាន់ៗ។
លោក Bui Hoa An អនុប្រធាននាយកដ្ឋានសំណង់ប្រចាំទីក្រុងហូជីមិញបានថ្លែងថា ប្រជាពលរដ្ឋដែលមានប្រាក់ចំណូលទាប និងម្ចាស់អាជីវកម្មខ្នាតតូចដែលពឹងផ្អែកលើយានជំនិះចាស់ៗ នឹងទទួលបានការគាំទ្រពីរដ្ឋតាមគោលដៅ ដើម្បីធានាថា ពួកគេអាចសម្របខ្លួនដោយមិនប៉ះពាល់ដល់ជីវភាពរស់នៅ។
គិតត្រឹមខែមិថុនា ឆ្នាំ២០២៥ ទីក្រុងហូជីមិញគ្រប់គ្រងយានយន្តបានជាង ៩,៦លានគ្រឿង ដែលជាចំនួនខ្ពស់បំផុតក្នុងប្រទេសវៀតណាម រួមទាំងរថយន្តជាង១លានគ្រឿង និងទោចចក្រយានយន្តជិត ៨,៦លានគ្រឿង។ ចំនួនយានយន្តបានកើនឡើង ៣% បើធៀបនឹងឆ្នាំមុន ដោយគិតតែចំនួនម្ចាស់រថយន្តបានកើនឡើង ៦%។
សូមជម្រាបថា ផែនការតំបន់បំភាយឧស្ម័នកម្រិតទាប គឺជាផ្នែកមួយនៃយុទ្ធសាស្ត្រកាត់បន្ថយការបំភាយជាតិដ៏ទូលំទូលាយរបស់វៀតណាម។ ទីក្រុងហាណូយកំពុងរៀបចំការផ្លាស់ប្តូរស្រដៀងគ្នានេះរួចហើយ ដោយមានបំណងហាមឃាត់ទោចក្រយានយន្តឥន្ធនៈហ្វូស៊ីលពីកណ្តាលទីក្រុង ដែលចាប់ផ្តើមនៅពាក់កណ្តាលឆ្នាំ២០២៦ និងពង្រីកតំបន់បញ្ចេញឧស្ម័នទាបនៅទូទាំងទីក្រុងនៅឆ្នាំ២០៣០៕ ប្រភព ៖ VnExpress
ចែករំលែកព័តមាននេះ