រាជធានីភ្នំពេញ ៖ កាលពីវេលាម៉ោង១០និង២៥នាទីយប់ថ្ងៃទី១១ កក្កដា នៅតាមបណ្ដោយវិថីព្រះមុនីរ៉េត ទល់មុខមន្ទីរពហុព្យាបាលវិសាលសុខ ក្នុងសង្កាត់ផ្សារដើមគ ខណ្ឌទួលគោក មានករណីវាយតប់គ្នារវាងអ្នកហូបមីឆានិងអ្នកលក់មីឆា បណ្ដាលឱ្យអ្នកលក់បែកកញ្ចប់មាត់ និងអ្នកហូបមីឆាបែកក្បាល។ ករណីនេះបានបង្ក
រាជធានីភ្នំពេញ ៖ កាលពីវេលាម៉ោង១០និង២៥នាទីយប់ថ្ងៃទី១១ កក្កដា នៅតាមបណ្ដោយវិថីព្រះមុនីរ៉េត ទល់មុខមន្ទីរពហុព្យាបាលវិសាលសុខ ក្នុងសង្កាត់ផ្សារដើមគ ខណ្ឌទួលគោក មានករណីវាយតប់គ្នារវាងអ្នកហូបមីឆានិងអ្នកលក់មីឆា បណ្ដាលឱ្យអ្នកលក់បែកកញ្ចប់មាត់ និងអ្នកហូបមីឆាបែកក្បាល។ ករណីនេះបានបង្កឱ្យមនុស្សផ្អើលចោមរោមមើលកក កុញទាំងកណ្ដាលយប់ ។
ប្រភពព័ត៌មាននៅកន្លែងកើតហេតុបានឱ្យដឹងថា នៅវេលាម៉ោងជាង១០យប់នោះឈ្មោះសុខា ទិតយិន ភេទប្រុស អាយុ៣១ឆ្នាំ បានឌុបប្អូនប្រុសឈ្មោះកែម សុខចិន អាយុ២៣ឆ្នាំ ជានិស្សិតឆ្នាំទី៣នៅសាកលវិទ្យាល័យបញ្ញាជាតិ មានទីលំនៅផ្ទះលេខ១១៣Eo ក្រុមទី១៥ វិថីព្រះមុនីរ៉េត សង្កាត់បឹងសាឡាង ខណ្ឌទួលគោក មកអង្គុយហូបមីឆាសាច់គោដែលឈ្មោះម៉េង ហៀប ភេទប្រុស អាយុ២៣ឆ្នាំ លក់នៅតាមចិញ្ចើមវិថីព្រះមុនីរ៉េត ទល់មុខមន្ទីរពហុព្យាបាលវិសាលសុខ។ ខណៈពេលអង្គុយហូប និងហៅអ្នកលក់មីយកលុយបម្រុងចេញទៅផ្ទះ ស្រាប់តែឈ្មោះគឹម ឡៃម៉េង ភេទប្រុស អាយុ២៤ឆ្នាំ ជាអ្នកលក់មីឆានៅតាមមហាវិថីម៉ៅសេទុងជិតផ្សារដើមគ ដែលជិះម៉ូតូមកទិញដើមខាត់ណានៅផ្សារដើមគ ក៏ជិះម៉ូតូបង្ហួសមកមើលកន្លែងលក់របស់ម៉េង ហៀប ដែលជាប្អូនថ្លៃ។
ប្រភពដដែលបានបន្តទៀតថា ពេលមកដល់កន្លែងលក់របស់ប្អូនថ្លៃឈ្មោះម៉េង ហៀប ក៏ឃើញឈ្មោះសុខា ទិតយិន ដែលជាម៉ូយចាស់និងជំពាក់លុយថ្លៃមីឆា៤ចានជាងមួយខែមកហើយនោះកំពុងអង្គុយហូបក៏ដើរទៅប្រាប់ថា បងនៅខ្វះថ្លៃមីឆាខ្ញុំ៤ចានមិនទាន់សង។ ពេលនោះឈ្មោះសុខា ទិតយិន ហាក់ដូចជានឹកឃើញក៏សួរវិញថា ៤ចានថ្លៃប៉ុន្មាន? ឯឈ្មោះគឹម ឡៃម៉េង ឆ្លើយថា ដោយសារបងជាម៉ូយយូរហើយគិតតម្លៃ១ចាន៥.៥០០រៀល សរុបទាំងអស់២២.០០០រៀល។ ភ្លាមនោះឈ្មោះសុខា ទិតយិន ក៏ហុចលុយ២៥.០០០រៀលឱ្យ ហើយអាប់ឱ្យ៣.០០០រៀលវិញ។ លុះទទួលយកលុយអាប់ហើយ ឈ្មោះសុខា ទិតយិន សម្ដែងអាការដូចស្រវឹងជោក និងខឹងទាំងកំរោលយកដៃចង្អុលមុខអ្នកទារលុយ ឯអ្នកទារលុយក៏តបវិញថា បានជាខ្ញុំទារលុយ ដោយសារបងជំពាក់ជាងមួយខែហើយ ថែមទាំងមិនដែលទៅហូបកន្លែងខ្ញុំទៀត បែរជាមកហូបនៅកន្លែងផ្សេងវិញ ។
ខណៈឮអ្នកលក់មីឆានិយាយដូច្នេះ ឈ្មោះសុខា ទិតយិន ក៏ស្ទុះទៅវាយអ្នកលក់មីឆាដែល ទារលុយមួយដៃបែកកញ្ចប់មាត់ ហើយរករឿងឈ្លោះប្រកែកគ្នាផ្អើលមនុស្សចោមរោមមើលណែនណាន់តាន់តាប់តែម្ដង ។ ខណៈឃើញមានការវាយតប់គ្នាដូច្នេះ អ្នកលក់មីឆានៅកន្លែងកើតហេតុក៏ជួយវាយទៅលើអ្នកហូបមីឆាវិញ ចំណែកប្អូនប្រុសរបស់សុខា ទិតយិន ឈ្មោះកែម សុខចិន ក៏ចូលទៅជួយវាយបងប្រុសដែរ និងរងរបួសបែកក្បាលហូរឈាម។ ក្នុងពេលនោះឈ្មោះកែម សុខចិន បានចោទថា អ្នកលក់មីឆាយកកាំបិតកាប់ ចំណែកភាគីខាងលក់មីឆាអះអាងថា យុវជនរូបនេះចូលមកប្រវាយប្រតប់ប៉ះកែវលើតុមុតនិងដួលដោយខ្លួនឯង ។
ភ្លាមៗនោះ មានការផ្អើលឆោឡោដល់សមត្ថកិច្ចប៉ុស្ដិ៍ផ្សារដើមគចុះទៅធ្វើអន្ដរាគមន៍ ដោយនាំភាគីទាំងពីរទៅកាន់ប៉ុស្ដិ៍រដ្ឋបាលផ្សារដើមគ កុំឱ្យបង្កភាពអនាធិបតេយ្យកណ្ដាលផ្លូវសាធារណៈប៉ះពាល់ដល់សណ្ដាប់ធ្នាប់ ប៉ុន្ដែភាគីខាងអ្នកហូបមីឆាមិនព្រមស្ដាប់ការសម្របសម្រួលនោះទេ ទើបលោកអធិការរងខណ្ឌទួលគោកទទួលបន្ទុកផ្នែកព្រហ្មទណ្ឌ យករថយន្ដទៅដឹកភាគីទាំងសងខាងទៅអធិការដ្ឋានខណ្ឌ។ មិនដឹងថា មានការដោះស្រាយវិវាទគ្នានេះដោយវិធីណាទេ ហើយព័ត៌មាននេះគ្រាន់តែចង់បង្ហាញថា រឿងតូចតាចសោះបង្កឱ្យទៅជារឿងធំដោយសារទោសៈ មោហៈ ឬថាខឹងខុស ខឹងខូច ខឹងខាត៕
ចែករំលែកព័តមាននេះ