ទីក្រុងហ្កាហ្សា៖ នៅទីបំផុត ក្រុមហាម៉ាស់បញ្ចេញប្រតិកម្មតបទៅនឹងការលើកឡើងរបស់លោកណឺតាន់យ៉ាហ៊ូដែលចង់ស្នើឱ្យកាកបាទក្រហមអន្តរជាតិយកម្ហូបអាហារ និងថ្នាំពេទ្យចែកជូនចំណាប់ខ្មាំងដែលកំពុងស្ថិតនៅក្នុងដៃរបស់ក្រុមហាម៉ាស់។ មើលទៅហាក់ដូចជាវេទាភ្នែកពេក។ ចំណាប់ខ្មាំងមានរូបរាងស្គាំងស្គមសល់តែស្បែកដណ្ដប់ឆ្អឹង។ ដូច្នេះតបទៅនឹងសំណើនេះ ក្រុមហាម៉ាស់ប្រកាសថាខ្លួនយល់ព្រមអនុញ្ញាតឱ្យកាកបាទក្រហមធ្វើដូច្នេះបានលុះត្រាអ៊ីស្រាអែលឈប់វាយប្រហារតាមអាកាស។
រូបវីឌីអូចំណាប់ខ្មាំងនោះបង្កការភ្ញាក់ផ្អើល និងការរិះគន់ពីសំណាក់ក្រុមបស្ចិមប្រទេស។ ក្រុមហាម៉ាស់ថ្លែងថាបើចង់បានការសម្របសម្រួលពីកាកបាទក្រហមអន្តរជាតិលុះត្រាតែអ៊ីស្រាអែលយល់ព្រមបង្កើតតំបន់សុវត្ថិភាពមនុស្សធម៌នៅហ្កាហ្សា និងផ្អាកវាយប្រហារតាមអាកាសនៅពេលចែកអំណោយ (នៅហ្កាហ្សា)។ មន្ត្រីរដ្ឋាភិបាលអ៊ីស្រាអែលអះអាងថាសព្វថ្ងៃនេះនៅសល់ចំណាប់ខ្មាំងប្រហែល៥០ទៀតនៅក្នុងដៃរបស់ក្រុមហាម៉ាស់។ ក្នុងនោះ មានត្រឹមតែ២០នាក់ប៉ុណ្ណោះដែលនៅរស់។
ក្រុមហាម៉ាស់រហូតមកទល់នឹងពេលនេះមិនដែលអនុញ្ញាតឱ្យអង្គការមនុស្សធម៌ណា១ចូលទៅជួបចំណាប់ខ្មាំងទេ។ ហេតុនេះធ្វើឱ្យក្រុមគ្រួសារចំណាប់ខ្មាំងកើតទុក្ខរីងរៃព្រោះពួកគេគ្មានដំណឹងអំពីសាច់ញាតិរបស់ខ្លួនទាល់តែសោះ។ កាលពីថ្ងៃសៅរ៍ ក្រុមហាម៉ាស់ផ្សព្វផ្សាយវីឌីអូទី២របស់ខ្លួនបង្ហាញរូបចំណាប់ខ្មាំងឈ្មោះអេវីយ៉ាតា ដេវីដ (Evyatar David)។ នៅក្នុងវីឌីអូនោះ ដេវីដទំនងជាមិនសង្ឃឹមថានៅរស់បានវិលត្រឡប់ទៅមាតុភូមិវិញនោះទេ។ គាត់ចាប់ផ្ដើមជីករណ្ដៅកប់ខ្លួនឯង។
ប្រទេសខ្លះដូចជាបារាំង អាល្លឺម៉ង់ អង់គ្លេស និងអាមេរិករិះគន់ចំពោះរូបភាពបែបនេះ។ ប្រជាជនអ៊ីស្រាអែលក៏មានអារម្មណ៍ភ្ញាក់ផ្អើលមិនតិចដែរ។ តបតាមសំណូមរបស់ក្រសួងការបរទេសអ៊ីស្រាអែល ក្រុមប្រឹក្សាសន្តិសុខអង្គការសហប្រជាជាតិនឹងកោះប្រជុំជាបន្ទាន់នៅព្រឹកថ្ងៃអង្គារដើម្បីពិភាក្សាអំពីស្ថានភាពចំណាប់ខ្មាំងនៅតំបន់ហ្កាហ្សា៕
ចែករំលែកព័តមាននេះ