ខេត្តមណ្ឌលគិរី ៖ មហាជនរស់នៅខេត្តមណ្ឌលគិរីប្រមាណជិតមួយម៉ឺននាក់ នាព្រឹកថ្ងៃទី២៩ ខែកក្កដា ឆ្នាំ២០២៥ បានជួបជុំប្រមូលផ្តុំគ្នា ដង្ហែជាក្បួនគាំទ្រដល់រាជរដ្ឋាភិបាល និងផ្តល់កម្លាំងចិត្តដល់យុទ្ធជននៅសមរភូមិជួរមុខ ដែលបានខិតខំច្បាំងការពារដែនបូរណភាពជាតិទាំងចម្បាំងប្រដាប់អាវុធ…
ខេត្តមណ្ឌលគិរី ៖ មហាជនរស់នៅខេត្តមណ្ឌលគិរីប្រមាណជិតមួយម៉ឺននាក់ នាព្រឹកថ្ងៃទី២៩ ខែកក្កដា ឆ្នាំ២០២៥ បានជួបជុំប្រមូលផ្តុំគ្នា ដង្ហែជាក្បួនគាំទ្រដល់រាជរដ្ឋាភិបាល និងផ្តល់កម្លាំងចិត្តដល់យុទ្ធជននៅសមរភូមិជួរមុខ ដែលបានខិតខំច្បាំងការពារដែនបូរណភាពជាតិទាំងចម្បាំងប្រដាប់អាវុធ និងការទូតប្រកបដោយភាពអង់អាចក្លាហាន ។
ក្នុងទឹកមុខរឹងមាំពោរពេញដោយកម្លាំងស្នេហាជាតិ ថ្នាក់ដឹកនាំខេត្ត មន្ត្រីរាជការ ព្រះសង្ឃ អាជីវករ ប្រជាពលរដ្ឋ ឥស្លាមសាសនា គ្រឹស្តសាសនា លោកគ្រូ អ្នកគ្រូ យុវជន និស្សានុសិស្ស និងបងប្អូនជនជាតិដើមភាគតិច បានដង្ហែក្បួនប្រឆាំងសៀមឈ្លានពាន និងបំផ្លាញបេតិកភណ្ឌពិភពលោក ប្រាសាទព្រះវិហារ ប្រាសាទតាមាន់តូច តាមាន់ធំ តាក្របី តាមដងផ្លូវជាតិលេខ៧៦ ចាប់ពីនៅរង្វង់មូលគោព្រៃ ឆ្ពោះទៅវិមានឯករាជ្យ ក្រុងសែនមនោរម្យ ។
ក្នុងក្បួនដង្ហែដែលមានប្រវែងជិត២គីឡូម៉ែត្រ គេបានមើលឃើញពីពាក្យស្លោកជាច្រើន ដែលប្រជាពលរដ្ឋបានកាន់ ហើយស្រែកថ្កោលទោស អំពើអមនុស្សធម៌របស់កងទ័ពសៀម មកលើប្រជាពលរដ្ឋស្លូតត្រង់របស់កម្ពុជា ខណៈដែលចោរសៀមទាំងនោះ បានប្រើប្រាស់សុទ្ឋតែអាវុធធុនធ្ងន់ ផ្តាច់ផ្តិលអាយុជីវិតកងទ័ព និងប្រជាជនខ្មែរជាច្រើននាក់ ។
ក្រៅពីការអំពាវនាវដល់មជ្ឈដ្ឋានអន្តរជាតិជួយអន្តរាគមន៍ដល់ប្រទេសកម្ពុជាពីការឈ្លានពានដ៏សាហាវឃោរឃៅពីសំណាក់ចោរសៀមបំផ្លាញសម្បត្តិបេតិកភណ្ឌពិភពលោក បំផ្លាញសេចក្តីសុខក្សេមក្សាន្តរបស់ប្រជាពលរដ្ឋខ្មែរ ។
ក្បួនមហាជនក៏បានថ្លែងអំណរអបសារទរពីកិច្ចខិតខំប្រឹងប្រែងរបស់ប្រមុខរាជរដ្ឋាភិបាល ដែលបានច្បាំងផ្នែកការទូតរហូតធ្វើឲ្យសត្រូវបច្ចាមិត្ត ទទួលយកកិច្ចព្រមព្រៀងបទឈប់បាញ់ទាំងបង្ខំនាពាក់កណ្តាល អធ្រាតនាថ្ងៃទី២៩ កក្កដា ។
ទន្ទឹមនេះ ថ្នាក់ដឹកនាំខេត្ត មន្ត្រីរាជការ ព្រះសង្ឃ អាជីវករ ប្រជាពលរដ្ឋ ឥស្លាមសាសនា គ្រឹស្តសាសនា លោកគ្រូ អ្នកគ្រូ យុវជន សិស្សានុសិស្ស និងបងប្អូនជនជាតិដើមភាគតិច ទូទាំងខេត្តមណ្ឌលគិរី ដែលនៅសមរភូមិជួរក្រោយ សូមរួមសុខ រួមទុក្ខ លើកទឹកចិត្ត ផ្ដល់កម្លាំងចិត្ត និងជួយគាំទ្រតាមគ្រប់រូបភាព ជូនដល់បងៗយុទ្ធជន វីរកងទ័ពដ៏ក្លាហាន ក្នុងបុព្វហេតុការពារជាតិ មាតុភូមិ និងប្រជាជនកម្ពុជា គ្រប់ពេលវេលា ៕
ចែករំលែកព័តមាននេះ