លោក ឃួង ស្រេង ប្រាប់ប្រតិភូ AIMF ថា ថៃបង្កជម្លោះរហូតប្រើយន្តហោះចម្បាំងទម្លាក់គ្រាប់បែកលើប្រាសាទកម្ពុជា ជាបេតិកភណ្ឌពិភពលោក
រាជធានីភ្នំពេញ ៖ លោក ឃួង ស្រេង អភិបាលរាជធានីភ្នំពេញ បានប្រាប់លោក Frédéric VALLIER អគ្គប្រតិភូ…
រាជធានីភ្នំពេញ ៖ លោក ឃួង ស្រេង អភិបាលរាជធានីភ្នំពេញ បានប្រាប់លោក Frédéric VALLIER អគ្គប្រតិភូ នៃសមាគមអន្តរជាតិ អភិបាលក្រុងប្រើប្រាស់ភាសាបារាំង AIMF ថា ជាការហួសចិត្ត និងនឹកស្មានមិនដល់នោះ គឺប្រទេសថៃ មិនគួរប្រើយន្តហោះចម្បាំង ទម្លាក់គ្រាប់បែក បំផ្លិចបំផ្លាញប្រាសាទព្រះវិហារ ដែលបានចុះបញ្ជី ជាបេតិកភណ្ឌពិភពលោក នោះទេ ។
ការថ្លែងរបស់លោក ឃួង ស្រេង ប្រាប់ទៅលោក Frédéric VALLIER ធ្វើឡើងក្នុងជំនួបសម្តែងការគួរសម និងពិភាក្សាការងារនាព្រឹកថ្ងៃទី២៥ ខែកក្កដា ឆ្នាំ២០២៥នេះ នៅសាលារាជធានីភ្នំពេញ ។
ឆ្លៀតក្នុងឱកាស នៃជំនួបនេះលោក ឃួង ស្រេង បានប្រាប់លោក Frédéric VALLIER ថា ថៃមានមហិច្ចតា ចង់បានប្រាសាទនានារបស់កម្ពុជា មកធ្វើជារបស់ខ្លួន ថៃបានបង្កឱ្យមានជម្លោះ នៅតាមព្រំដែន រហូតបាញ់មកលើកម្ពុជា ធ្វើឲ្យកម្ពុជា ប្រើសិទ្ធិការពារខ្លួនបាញ់តបវិញ ដើម្បីការពារបូរណៈភាពទឹកដី ពីចោរឈ្លានពាន ។ ប្រទេសកម្ពុជា មានសន្តិភាពពេញលេញ តែត្រូវបានអ្នកជិតខាងបង្កជាជំលោះ ដែលជម្លោះនេះ គឺដោយសារតែភាគីថៃ មិនគោរពតាមកិច្ចព្រមព្រៀង ដោយបានរំលោភបំពានបូរណភាពទឹកដីកម្ពុជា រហូតបង្កឱ្យមានការផ្ទុះអាវុធ ដាក់គ្នាកាលពីថ្ងៃទី២៤ខែកក្ដដា លើសពីនេះភាគីថៃ បានពង្រីកបញ្ហាព្រំដែននេះ ឲ្យប៉ះពាល់ទៅដល់វិស័យពាណិជ្ជកម្មថែមទៀត តាមរយៈការបិទច្រកព្រំដែនរវាងប្រទេសទាំងពីរ។
លោក ឃួង ស្រេង បញ្ជាក់ថា អ្វីដែលជាការហួសចិត្ត និងនឹកមិនស្មានដល់សោះនោះ គឺប្រទេសថៃ ជាអរិយៈប្រទេសគួរឱ្យកត់សម្គាល់មួយដែរ មិនគួរដល់ថ្នាក់ ប្រើយន្តហោះចម្បាំង ទម្លាក់គ្រាប់បែកបំផ្លិចបំផ្លាញប្រាសាទ ដែលបានចុះបញ្ជី ជាបេតិកភណ្ឌពិភពលោកនោះទេ។ តាមរយៈសកម្មភាពឈ្លានពាន របស់ប្រទេសថៃនេះ លោកសង្ឃឹមថា ប្រទេសបារាំង និងគាំទ្រកម្ពុជា ដោយជំរុញឱ្យភាគីថៃ អនុវត្តទៅតាមកិច្ចព្រមព្រៀងបារាំង-សៀម ដែលមានកន្លងមក ជៀសវាងការប្រើប្រាស់ផែនទី ដែលគូសដោយឯកតោភាគី។ ជុំវិញការដោះស្រាយបញ្ហាព្រំដែន តាមរយៈការប្ដឹងទៅប្តឹងទៅតុលាការអន្តរជាតិ ICJ លោក ឃួង ស្រេង ក៏សង្ឃឹមដែរថា បារាំង នឹងគាំទ្រកម្ពុជា ។
ក្នុងជំនួបនោះលោក Frédéric VALLIER បានលើកឡើងថា មិនមែនក្នុងនាមប្រទេសបារាំងនោះទេ តែក្នុងនាមជាតំណាងសមាគមអន្តរជាតិអភិបាលក្រុងប្រើប្រាស់ភាសាបារាំង AIMF ជម្លោះប្រដាប់អាវុធ រវាងប្រទេសថៃ និងប្រទេសកម្ពុជា លោកពិតជាសម្ដែង នូវការព្រួយបារម្ភយ៉ាងខ្លាំង ដោយសង្ឃឹមថា ជម្លោះដ៏តានតឹងនេះ នឹងវិលត្រឡប់ទៅរកភាពប្រក្រតីដូចដើមវិញ។ ប្រទេសកម្ពុជា និងថៃ នឹងរកដំណោះស្រាយបានដ៏ល្អនៅថ្ងៃអនាគត។ មកដល់សតវត្សទី២១ហើយ មិនគួរ និងកើតឡើង នូវជម្លោះដណ្ដើមប្រាសាទគ្នានោះទេ។ គេពិតជាបានដឹងហើយថា ប្រាសាទទាំងនោះ នៅក្នុងទឹកដីអ្នកណា ។
ក្នុងឱកាសនោះដែរ លោក ឃួង ស្រេង ក៏បានលើកឡើងទៀតថា ការអភិវឌ្ឍន៍រាជធានីភ្នំពេញ គឺពិតជាមានការចូលរួម ពីប្រទេសបារាំងផងដែរ តាមរយៈផ្ដល់នូវបច្ចេកទេស ការផ្ដល់នូវប្រឡាយ លូជាដើម។ សមាគមអន្តរជាតិអភិបាលក្រុងប្រើប្រាស់ភាសាបារាំង AIMF បានជួយរាជធានីភ្នំពេញ ទៅលើការកសាងស្ថានីយ៍ប្រព្រឹត្តកម្មសំណល់ ភក់បង្គន់ក្នុងសង្កាត់ភ្លើងឆេះរទេះ ខណ្ឌកំបូលផងដែរ ។
ជាមួយគ្នានេះដែរ លោក Frédéric VALLIER ក៏ថ្លែងនូវការអរគុណចំពោះការប្តេជ្ញាចិត្ត របស់រាជធានីភ្នំពេញ ក្នុងការគាំទ្រចំពោះសកម្មភាពរបស់ AIMFផងដែរ ៕
ចែករំលែកព័តមាននេះ