រាជធានីភ្នំពេញ ៖ បុរសម្នាក់បានបើកបររថយន្តតាក់ស៊ី ១គ្រឿងថយក្រោយកិនតុលក់សម្ភារៈផ្សេងៗ រួមខ្នាយតាន់ ខ្សែដៃអង្កាំ បន្តោងខ្សែកព្រះ និងជុំក្រឡង់ជាដើម ដែលកំពុងដាក់លក់នៅលើចិញ្ចើមផ្លូវ បង្កឲ្យមានរឿងទំនាស់គ្នាជាមួយអ្នកលក់នៅមុខព្រលានយន្តហោះអន្តរជាតិភ្នំពេញ(ពោធិ៍ចិនតុង)។…
រាជធានីភ្នំពេញ ៖ បុរសម្នាក់បានបើកបររថយន្តតាក់ស៊ី ១គ្រឿងថយក្រោយកិនតុលក់សម្ភារៈផ្សេងៗ រួមខ្នាយតាន់ ខ្សែដៃអង្កាំ បន្តោងខ្សែកព្រះ និងជុំក្រឡង់ជាដើម ដែលកំពុងដាក់លក់នៅលើចិញ្ចើមផ្លូវ បង្កឲ្យមានរឿងទំនាស់គ្នាជាមួយអ្នកលក់នៅមុខព្រលានយន្តហោះអន្តរជាតិភ្នំពេញ(ពោធិ៍ចិនតុង)។ បន្ទាប់មក បុរសអ្នកបើករថយន្តបានវាយទៅលើបុរសអ្នកលក់ខ្នាយតាន់ចំនួន៣ដៃ ក៏ត្រូវបានអ្នកលក់ខ្នាយតាន់ ខលហៅប្រពន្ធ និងកូនប្រុសព្រមទាំងបងប្អូនឲ្យទៅជួយ។ ពេលទៅដល់ ក្រុមគ្រួសារអ្នកលក់ខ្នាយតាន់ ក៏បានព្រួវាយទាត់ធាក់សងសឹកទៅលើបុរសអ្នកបើករថយន្តតាក់ស៊ីនោះវិញ រហូតទ្រមខ្លួនតែម្ដង ហើយទីបំផុត ក៏ត្រូវបានកម្លាំងនគរបាលឃាត់ខ្លួនទាំងសងខាង សរុប០៥នាក់ ។
ហេតុការណ៍នោះបានកើតឡើងបង្កឲ្យមានការភ្ញាក់ផ្អើលតាមដងផ្លូវ កាលពីវេលាម៉ោង១២និង២៥នាទីថ្ងៃត្រង់ថ្ងៃទី០៧ ខែកក្កដា ឆ្នាំ២០២៥ ត្រង់ចំណុចភ្លើងស្តុបមហាវិថីសហព័ន្ធរុស្ស៊ី ស្ថិតនៅក្នុងភូមិក្បាលដំរី២ សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ ។
បុរសអ្នកបើករថយន្តតាក់ស៊ីនោះឈ្មោះ សួន សាក់ អាយុ៣២ឆ្នាំ មានទីលំនៅភូមិអូរដឹម សង្កាត់ចោមចៅទី៣ ខណ្ឌពោធិ៍សែនជ័យ ត្រូវនគរបាលឃាត់ខ្លួន ហើយបានទ្រមខ្លួនក្រោមកណ្ដាប់ដៃរន្ទះជើងរបស់អ្នកលក់ខ្នាយតាន់ និងក្រុមគ្រួសារ ដែលបានវាយសងសឹក ។
ដោយឡែកបុរសអ្នកលក់ខ្នាយតាន់ ឈ្មោះ បង វែង អាយុជាង៣០ឆ្នាំ មានទីលំនៅភូមិប៉ប្រកខាងត្បូង សង្កាត់កាកាបទី១ ខណ្ឌពោធិ៍សែនជ័យ បុរសនេះ រួមជាមួយក្រុមគ្រួសារ មានប្រពន្ធ និងកូនប្រុសម្នាក់ ព្រមទាំងបងប្អូនម្នាក់ទៀតសរុប៤នាក់ ត្រូវនគរបាលឃាត់ខ្លួនដែរ ។
សមត្ថកិច្ច បានប្រាប់ឲ្យដឹងថា នៅមុនពេលកើតហេតុឈ្មោះ សួន សាក់ បានបានបើករថយន្ត១គ្រឿងម៉ាកឡិចស៊ីស RX-300 ពណ៌ទឹកមាស ពាក់ស្លាកលេខភ្នំពេញ 2AL-3615 ថយក្រោយ ជ្រុលទៅកិនតុដាក់លក់ខ្នាយតាន់ បន្តោងខ្សែកព្រះ ខ្សែដៃអង្កាំជាដើម ដែលបុរសឈ្មោះបង វែង កំពុងដាក់លក់លើចិញ្ចើមផ្លូវ ត្រង់ចំណុចខាងលើ បណ្ដាលឲ្យកំពប់និងខូចខាត។ ពេលនោះបុរស ដែលជាអ្នកលក់ខ្នាយតាន់បានប្រាប់ថា «ថយកិនរបស់ខ្ញុំហើយ» អ្នកបើករថយន្តតាក់ស៊ី ក៏បានឆ្លើយតបវិញថា «តើតុរបស់អ្ហែងហ្នឹងថ្លៃប៉ុន្មាន ?» រួចក៏ដើរចូលទៅក្នុងរថយន្តប្រុងបើកចេញទាំងមិនទទួលខុសត្រូវ ប៉ុន្តែអ្នកបើកតាក់ស៊ីថា ខ្លួនមិនបានបើករត់ទេ គឺដើរទៅយកទឹកដបនៅក្នុងរថយន្តដើម្បីផឹកទេ ។
សមត្ថកិច្ច បានប្រាប់បន្តទៀតថា ភ្លាមៗនោះបុរសអ្នកលក់ខ្នាយតាន់បានរត់ទៅឃាត់ និងដកយកសោរថយន្ត ទើបបណ្ដាលឲ្យមានទំនាស់គ្នា រហូតអ្នកបើករថយន្តតាក់ស៊ីទ្រាំមិនបាន ក៏បានវាយអ្នកលក់ខ្នាយតាន់៣ដៃ ជាការរំសាយកំហឹង។ ក្រោយរងកណ្ដាប់អ្នកបើកតាក់ស៊ី បុរសអ្នកលក់ខ្នាយតាន់រូបនោះ ក៏បានខលហៅប្រពន្ធ និងកូនប្រុស ព្រមទាំងបងប្អូនឲ្យទៅជួយ ហើយគ្រាន់តែទៅដល់ភ្លាម ក៏បានព្រួតគ្នាវាយទាត់ធាក់សងសឹកទៅលើអ្នកបើករថយន្តតាក់ស៊ីនោះ ដើម្បីរំសាយកំហឹងវិញ រហូតទ្រមខ្លួន ហើយទោះជាអ្នកនៅជិតនោះនាំគ្នាស្រែកឃាត់ក៏មិនព្រមឈប់វាយដែរ ។
សមត្ថកិច្ចដដែល បានបញ្ជាក់ប្រាប់ឲ្យដឹងទៀតថា ពេលនោះ ប្រជាពលរដ្ឋបានខលរាយការណ៍ជូននគរបាលឲ្យជួយអន្តរាគមន៍ ហើយកម្លាំងនគរបាលប៉ុស្តិ៍កាកាបទី២ ចុះទៅឃាត់ខ្លួនភាគីទាំងសងខាងតែម្ដង ។ ដោយក្នុងនោះភាគីម្ខាងមានចំនួន៤នាក់ គឺបុរសអ្នកលក់ខ្នាយតាន់ ប្រពន្ធរបស់គាត់ កូនប្រុសរបស់គាត់ម្នាក់ និងបងប្អូនម្នាក់ ចំណែកភាគីម្ខាងទៀតគឺបុរសអ្នករត់តាក់ស៊ី ។ បន្ទាប់មកនគរបាលបាននាំទៅសាកសួរប៉ុស្តិ៍កាកាបទី២ មួយជំហាន ហើយបានបញ្ជូនបន្តទៅកាន់អធិការដ្ឋាននគរបាលខណ្ឌពោធិ៍សែនជ័យ ចាត់ការបន្តទៀត ៕
ចែករំលែកព័តមាននេះ